Read Southern Rengma Naga KERATHÜ 14 Bible Online

KERATHÜ 14 - Southern Rengma Naga bible

KERATHÜ 14

¹Khenyüme Samson le Timnah ki nsheo tsünyu Filistian nyu lünyu nme hyushü.

²A-le ka ki nigü a-pvü lo a-jvü au ka zoshü, Timnah nyu Filistian nyu lünyu nme shwi a yhüdyü bin nle, tsügenyu tsü lope ano anu thyülo.”

³Ai a-pvü lo a-jvü au le, “Nyuthyüo nle gü Judanyu kemvu Filistian nyu lope nnu thyü titse ola? Ngun pfüphun ngun temi dan nyu lünyu nme hyulo mvu ole?” tson-o ketsoshü. Ai Samson le a-pvü ka zoshü, “Ale a-shwi akenyü tsügenyu tsügi lope a tsülo,” tsonla.

⁴A-pvü a-jvü au le Npugü le Samson tsontsin-o hithyü kebin shamvu, Npugü le Filistian nyu zen kega nrün gwenkho fü kebin genyu. Higwenkho ka Filistian nyu le Israel nyu sa gon bin.

⁵Tson-o Samson le a-pvü lo a-jvü au zen Timnah ki nshe. Anyugun le vain low pfüthü gun kejü ka Shünyho bwe nme le nho kebin a-le nyülo.

⁶Npugü kekvu le Samson thyü nko whütse shüo a-le tenyü nyu nme hontse a-ben pe shünyho gü sürhen la. Ai a-le nyuthyü layo tsüpe a-pvü a-jvü au ka zomvu.

⁷Tson-o a-le gü lünyu gi zen kenthon, lo tsügi shwi a-kenyü sa.

⁸Jon keshanyu siki Samson le lünyu gi lo titse niryü. A-le boshvu kela shünyho gü shwishü titse tson teki gü laryü, khu le shünyho kesi min nyu bin, tson-o khuzü le kebin hyulo.

⁹A-le khuzü gü ha lo-o tsonchü nsen tyü bin. Tson-o a-pvü lo a-jvü au kiryüo peha pe au tsüshü. Au ko tyü ai Samson le a-le shünyho kesi min nyu khuzü gü khilo letse au ka zomvu.

¹⁰A-pvü le lünyu gi kaki gü, lo Samson le keho ndoshü. Ponyu dan le tsonshü kehü tsü le tejvü.

¹¹Filistian nyu le a-hyushüo selo temi shenryü no a-nizin thyü lotse nishü.

¹²Samson le anyugun ka zoshü, “Ano thako nme pe hagun khenta.Tson-o keho jon tsenyü mhundyü hagun le khenlo yatselo ale linen phi kegwa nme lo phinya kekelu nme tse hagun nmeme tsü ti, ai hagun le khenlo mvu laya tselo linen phi kegwa shenryü lo phinya kelu shenryü pe atsüti,” tsonshü. Tsontsin anyugun le, “Nyu yo agun no nyü shüta.”

¹⁴A-le zoshü, “Tünketyü gü ge ketyüi le ryü; Kenko gü ge kennyün peha le ryü.” Joshen sikie anyugun le thakhen gü shalo mvula.

¹⁵Jonzi nyü anyugun le Samson nu ka zoshü, “N nyepvü sa-o thakhen gü kon pe agun ka zoshülo. Nmvu yatselo agun le npvü ka roshüo nroshvu lati. Hai le agun hon selo titseo agun koshü mvu ole?” tsonso.

¹⁶Tsügenyu Samson nu le chüo a-ka, “Nle aso mvule! Nle a shwirüchün bin nle! Nle apvünyu dan ka thakhen-o a-kon pe aka zomvu!” A-le zoshü, “Hire, ale apvü ajvü au kae zomvu. Ale nyu tsethyü nka zomon?”

¹⁷Jon tsenyü ho kebin then tsügi le tsügenyu chü bin. Ai jon tsenyü nyü tsügi le tserü lo kela genyu thakhen gü kon pe a-ka zoshüla. Tsüselo a-le pe Filistian nyu ka zoshüla.

¹⁸Tson-o jon tsenyü nyü Samson le zhütsen ki yükemvu ka, nyida günyu temi dan le a-ka zoshü, “Khuzü nyeki nyule nnyüh ola? Shünyho nyeki nyule nko kvu ola?” Samson le anyugun jokenishü, “Hagun le athu zen lotsü kemvu we, hagun ntsoka tsü kon sha loho.”

¹⁹Whütse Npugü kekvu le a-thyü nko shüo a-le Ashkelon ki nshe gü temi shenryü boshvulao anyugun phinya kegwa yhün pe thakhen kon zokelo dan tsüla. Tson njo tsügenyu a-nyunta satse a-kaki gunla,

²⁰lo a-nu pe sunkethyü ka a-nizin gü tsüla.