Read Southern Rengma Naga KERATHÜ 15 Bible Online

KERATHÜ 15 - Southern Rengma Naga bible

KERATHÜ 15

¹Tsüsiki thoshe logvü ka Samson le a-nu teno shü titse tenyü bwe nme khisen tseryü. Tson-o a-nu a-pvü ka, “Ale a-nu tsenki günyü bin nle,” tsonshü. Ai a-le Samson no yü mvula.

²A-le Samson ka zoshü, “Akerüchün le nno a-shwinyü mvu ketsin thyüla se ado tse a-khipe npvü gü tsü laso. Ai a-sikezengi le a-nyeki zegwa. Nle a-sun ka tsügi lo logwa le.”

³Samson le zoshü, “Nthu gwen we ale Filistian nyu ge nyu thyü shüyo tsüle age kemvu so!”

⁴Tson-o a-le gü Mesükerun tsishen tenlo.Lo kenyhun yhun ma phin kesü shüo mahne thyü pe a-ge phin shü.

⁵Tson-o mahne dan nben shü njüo ho pe Filistian nyu thoshe low nyu shü. Hihontse-o a-le lowgvü kenjü nti mvu, ai gvü kemvu lo oliv low aphu rola.

⁶Filistian nyu le segü le hihontse shüyo ketso gü Timnah nyu Samson a-min le Samson nu pe a-pvü gü tsükela genyu Samson le honshü letse shalo. Tson njüo Filistian nyu le gü tenu gi roshvula lo a-pvü ka rola.

⁷Samson le anyugun ka zoshü, “Hagun le hihontse thyüshü! Ale hagun pu kethun kemvu we kheshü kemvui tse swe shü bin nle!”

⁸A-le anyugun whe-o anyugun kechon dushvula. Tson-o gü Etam ka tsokü nyu bin.

⁹Filistian nyu le ry"o Judah ka kensenbin thyülo njüo Lehi rünyi whe.

¹⁰Tsontsin Juda temi dan le anyugun ka, “Hagun le nyugenyu agun whe bin nla?” tse ketsoshü. Anyugun le zonishü, “Agun le Samson tenlo njüo a-le agun ge thyü keshü hontse a-ge thyüshü titse ryü le.”

¹¹Tson-o Juda temi nyeshen le Etam tsokü ki gü Samson ka zoshü, “Filistian nyu le ngun sa gon kebin nle shamvu ole? Nle agun ge nyuthyü shüla sela?” Tsontsin a-le, “Anyugun le age nyuthyü shüyo ale anyugun ge tsüthyü shüle.”

¹²Anyugun le zoshü, “Agun le nphin sen gü anyugun tsüla titse ryü bin nle.” Samson le zoshü, “Hagun le hagun npvü a boshvula loho tse hagun zoshü shü lo.”

¹³Anyugun le zoshü, “Ele, agun le nphin sen gü anyugun tsü gwenzin ti. Agun le nboshvu loho.” Tson-o anyugun le ron keshün kenyhun pe a-phin lo-o tsokü nyu a-zen ryü.

¹⁴A-le ryü Lohi tikeloka Filistian nyu le nrasen-o kehü ryü. Tsontsin Npugü kekvu le a-thyü nko shüo a-bu lo a-ben kephin ron dan le mahchu hontsela.

¹⁵Tson-o a-le gada sapha ru keshün nme hyulo. A-le nkhün gü tsü khipe temi yieme dushvu la.

¹⁶Samson le lüthyü, “Ale gada nme sapha ru sen-o temi yieme dushvula; ale gada sapha ru nme sen-o anyugun boshvu pe khwen la.”

¹⁷Tson-o a-le sapha ru gü pe shwenla. Hihontse kela bin gü pe Ramah Lehi tse kola.

¹⁸Tsüselo Samson le teri sala, tsügenyu a-le Npugü ko-o zoshü, “Nle kvukelo keda higü pe atsüshü, lo ano ntsoka teri silao Juda kemvu Filistian nyu ben nyu yüla ti ole?”

¹⁹Tsontsin Npugü le Lehi ka bin kenshün nme khinshe shüo tsünyu zü le chwiryü. Samson le tsülo-o a-sherhünlo. Tsügenyu zü kenthün tsüpe Hakkore tse kolo, tsü le nthu keti Lehi ka bin.

²⁰Filistian nyu le kazü gü sa gon kebin ka Samson le chen nki Israel nyu sharhi thyü.