Read Southern Rengma Naga KERATHÜ 16 Bible Online

KERATHÜ 16 - Southern Rengma Naga bible

KERATHÜ 16

¹Khenyüme Samson le Filistian nyu nyida Gaza kigü, a-le tsünyu keyülachün ketyü nyu nme teno lo-o tsügi jü kigü la.

²Samson le tsünyu kebin Gaza nyu temi dan le hyushü, tsüselo anyugun le bin tsügü hun lo-o khensin khinrun ka a-khwe bin. Anyugun le, “Ngun le a-khwe pe tsang nben-o a-dushvula ti,” tse rüchün-o khensin matse bin.

³Ai Samson le zhübin-o khejenyu luka soryü kachon, lo khincha tse aphu süthola. Tson-o pe a buthun ge shü pfüo kügü Hebron kepen ki rinchothun ra kishü la.

⁴Tsüsiki, Samson le Sorek ketejon ki kebin Delilah tse kethyü tenunyu nme zen keso lola.

⁵Tsontsin Filistian nyu raja minpvün ju le gü tsügi ka zoshü, “Samson le nyu genyu nkosa yo lo dihontseo agun le a-nyekvulo a-phin lo-o no thame thyü lomvula tiyo a-shün-o no nka zoshülo. Tson yatselo agun nmeme le rakagi tsi tseryü nmeme pe ntsüti.”

⁶Tsüselo Delilah le Samson ka zoshü, “Nyu genyu nle nkosa hüyo. Lo temi peha le nphin lo-o nno thame thyülomvula tiya tselo a-le nyuthyü lo gwayo? ncheno-e pe aka zoshülo.”

⁷Tsontsin Samson le zoshü, “Anyugun le tholevü ron keshün a-kerhün tsenyü pe aphin la yatselo, ako kechanyu hontse kvumvu kelai le.”

⁸Tsontsin Filistian nyu raja jule tholevü ron keshün a-kerhün tsenyü senryü Delilah tsüshü, lo tsügi le pe Samson phinla.

⁹Tsügi le temi peha no katsen kecha zin khwe bin, tsüselo a-le nrasen-o, “Samson! Filistian nyu le ryüzhü laso!” Ai a-le soryülaryü mah le ni kesükeshü hontse tholevü ron dan süthü la. Tson-o a-le nyugenyu nko bin yo anyugun le shalo mvula.

¹⁰Delilah le Samson ka zoshü, “Hire, nle jo ketsin aka zomvuo asa bin nyo. Ncheno-e dihontse nphin logwa yo aka zoshü ta.”

¹¹Samson le zoshü, “Anyugun le ron keshün sen mvushü kethyü pe aphin la yatselo ako kechanyu hontse kvumvu kelai le.”

¹²Tson-o Delilah le ron keshün peha pe a-phinlao, nrasen shü, “Samson! Filistian nyu le ryüjü laso!” Temi dan le katsen kechazin khwebin. Ai a-le a-bu ge ron tsüle ni hontse süthü la.

¹³Delilah le Samson ka zoshü, “Nle ntsoka keti ketsin aka zomvuo asa bin nle. Dihontse mele nphin logwayo aka zoshülo.” A-le zoshü, “Nle ashün sin tsenyü pe ndyükeda nyu shüo dala yatselo ale kechanyu hontse kvumvu kelai le.”

¹⁴Tsüselo Delilah le a-no zhütin la njüo a-shün sin tsenyü pe dyünyu dala. A-le tsü pe dyü nyu da nko salao, “Samson! Filistian nyu le ryüjü laso,tse nra shü!” Tsontsin a-le so-o dyükeda nyu a-shün tho lola.

¹⁵Tsontsin tsügi le a-ka zoshü, “Nle aso kemvu le, dihontse nle aso hü nle tse zolo tila? Nle gwenshen ge asa laso lo ntsoka keti nyu le nthyü pe nkosa hüyo aka zomvu.”

¹⁶Tson-o tsügi le khenyütsen a-ketsobin gwenzin la. Tsügi le tsü ketso tserü kethyü genyu a-nyutsemi lo a-kevü sala,

¹⁷tsügenyu a-le kenkhin ki jo ketsin pe a-ka zoshüla. A-le zoshü, “Ashün thu hümvu, a nnyu lo nyemhun akhikho kecha thyüpe Nazirit nyu thyüo Sunggigü tsü laso. Tsügenyu ashün thu laya tselo akekvu ndi lati, lo kechanyu hontse ale kvumvu kelai le.”

¹⁸Delilah le a-le ketsin gü pe a-ka zoshü kela shalo-o jolo nipe Filistian nyu raja ju kishüo, “Gwengwa niryülo. A-le ketsin gü pe aka zoshü laso.” Tson-o anyugun le pisa sen ryü.

¹⁹Delilah le Samson no a-din ge zhütin lao temi nme ko pe no Samson shün thula. A-le a-kenko ndi kelasi genyu tsügi le a-nthyü nnyü sola.

²⁰Tson-o a-le nrao, “Samson! Filistian nyu le ryüjü so!” A-le chon soryü, a-kerüchün le, “Himhundyü hontse a-keshathyü tinla ti,” tse bin. Npugü le a-khe kela shamvuo.

²¹Filistian nyu le a-tenlo-o a-yhütyü hvu tseri thola. Anyugun le lazo ron pe aphin zen-o Gaza kiryü lo a-no doka nyu shye ra hü.

²²Lo a-shün le sen ni sola.

²³Filistian raja jule keteno-o anyugun shekerhün genyu kerüshvu keda nme thyüpe anyugun tero Dagon tsütitse kequen lo. Anyugun le, “Agun tero gü le agun shwikerüchün gü Samson so kvukelo pe agun tsü laso!” tse lüthyü shü.

²⁴Anyugun shekerhün thyü kebin genyu, anyugun le zoshü, “Samson koshüo no kecho pe ngun hiti nu!” Tson-o anyugun le do kanyu Samson zenchwiryü no kecho pe anyugun hi, lo a-no kachon jaka solo. Temi dan le a-hyu shüo anyugun tero gü shweo lüthyü shü: “Agun tero güle agun kazü nkiela lo agun temi kechon boshvu kela agun shwikerüchün gü so kvukelo pe agun tsü laso!” tson bin.

²⁶Samson le a-ben süo a-tsonri kehü ponyu gü ka zoshü, “Ano gü ka gü le a-ge dun kebin kachon dan kesü lolo. Ale tsü ge nngü lonyü bin nle.”

²⁷Ka tsügü nyu pechenyu lo tenu nyue tse süto tse bin. Filistian raja minpvün ju aphu bin, lo ka so ge pechenyu lo tenunyu kesin yieshen kho le kecho kethyü shwi bin.

²⁸Tsüselo Samson le kehithyüo, “Kekvutsin Npugü, arüchün shüta, Sunggigü akekvu tsü gwengwa nme pe atsünishü, tson_o ano Filistian nyu le a-yhütyü tseritho kela akhün lo lota.”

²⁹Tson-o Samson le ka gü rhunpfü kebin kachon lvu hvu nmhulo. A-ben nme pe kachon nmeme chen pen-o

³⁰nrao, “Ano Filistian nyu zen-o sila lo!” A-le a-kekvu aphu hoshüo kagü chenren pe raja pvün lo kechanyu aphu sa shüla. Samson le a-kerhün ka nyeki a-kesi ka temi chonkvu boshvula.

³¹A-tsasikezen lo a-kami kechanyu le a-min pen lo titse ryü. A-nyugun le a-pen gü Zorah lo Eshtaol au jaka a-pvü Manoah sika nyu sunla. A-le chen nki Israel nyu sharhi thyü.