Read Southern Rengma Naga KERATHÜ 17 Bible Online

KERATHÜ 17 - Southern Rengma Naga bible

KERATHÜ 17

¹Gwengwa me ka Mikah tse kethyü temi nme le Efraim rincho ki yhun hü.

²A-le a-jvü ka zoshü, “Temi peha le nhon rakagi tsi tseryü nme khilo kela ka nle shochün pe kerühu gü tsü. Nle tson kebin ale nyülo. Ale pisa tsü sen hünyo. Khi kelo gü tsüle ale.” A-jvü le zoshü, “Npugü no jochü pe ntsü nda, anyugü!”

³A-le pisa gü rani pe a-jvü tsüla, lo tsügi le zoshü, “Shochün no anyu ge ryü mvu nrün genyu, ale a npvü pisa gü khikho pe Npugü tsü laso. Tesen pe teromen nme thyülo-o rakagi tsü pe je lati. Tsügenyu ntsoka ale rakagi tsüdan pe ntsüni lati.”

⁴Tson-o a-le tsü rani pe a-jvü tsüla. Tsügi le rakagi tsihvu pe tegi kechanyu nme tsüshü, tson-o tsü güle tesen pe teromen nme du lo-o rakagi tsü pe jeshü. Tsüpe Mikah kanyu shübin.

⁵Mikah higü hile a-kershvubin le bin. A-le teromen peha lo püshükeda phi nme thyülo, lo anyu nme no a-püshükeda thyü shü.

⁶Tsügwenkho ka Israel nyu dan nyu raja ndi; temi aphu a-le nyuthyü nyü yo thyü hü.

⁷Tsügwenkho ka Judah kazü Bethlehem rünyi nyu Levi nyu ponyu nme ko yhun bin.

⁸A-le Bethlehem kheo bin kecha peha ki yhun titse gü. Tson-o a-le njwen-o Efraim rincho ki Mikah kanyu ryü.

⁹Mikah le, a-ka, “Nle dikipon ryüla? tse ketso shü. Tsontsin a-le, “Ale Judah kazü Bethlehem nyu Levinyu nme. Lo ale bin peha ka yhun titse fü hü nle.”

¹⁰Mikah le zoshü, “Azen binlo. A tsontsin lo a-püshükeda thyülo, lo ale chen me ka rakagi tseryü, phinya peha lo nketyüketsü pe ntsü tile.”

¹¹Levinyu ponyu gü tsüle Mikah zen bin titse a-kendo lo, tson-o a-nyu nme hontselo.

¹²Mikah le a-lope a-püshükeda hontse lo-o a-le Mikah kanyu bin hü.

¹³Mikah le zo, “Ntsoka we ale Levinyu nme pe a püshükeda thyülo laso, tsügenyu Npugü le a keche shüti.”