Read Southern Rengma Naga KERATHÜ 18 Bible Online

KERATHÜ 18 - Southern Rengma Naga bible

KERATHÜ 18

¹Tsügwenkho ka Israel nyu raja ndi. Tsüka Dan tsipwen le Israel nyu dan nyu anyugun kazü kendi genyu kazü peha nkhen pe anyugun hon thyü titse fü hü.

²Tsügenyu Dan tsipwen le anyugun dan nyu thathyülo kekü minpvün kejülo-o, anyugun no kazü rhi lotse Zorah lo Eshtaol rünyi nyu anyugun nishü. Anyugun le Efraim rincho tilo-o Mikah kanyu binlo.

³Anyugun le tsünyu kebin ka, Levinyu ponyu gü khwe shalo njüo, gü a-ka, “Nle hiki nyuthyü bin nla? Segü le nzen hiki ryü la?” tse ketso so.

⁴Tsontsin a-le zoshü, “Ale Mikah zen kegwensha lo-o a-le ashün thyüo ale a-püshükeda hontse thyü bin nle.”

⁵Anyugun le a-ka zoshü, “Ncheno-e agun kenjwen hile thyü tolo tile nmvuyo Sunggigü ka ketso shwilo.”

⁶Püshükeda gü le zoshü, “Hagun nyunkhi nya. Hagun kenjwen hinyu Npugü le hagun ntsen hü nyo!”

⁷Tson-o minpvün jule tsü nken-o Laish rünyi nyu gü. Anyugun le gü tsünyu temi le Sidon nyu hontse kenshvu ndio yhun kebin hyulo. Anyugun le temi nme zen kevükeben mvutse bwenye lo je tse bin; anyugun genyu mvulo keshvu aphu bin. Anyugun le Sidon nyu zen nithen ki yhunbin lo temi nme zen-o kengü mvu.

⁸Minpvün jule Zorah lo Eshtaol nyu ranikeryü ka anyugun temi dan le anyugun le dihontse hyu yo ketsoshü.

⁹Tsontsin anyugun le “Ryülo!” “Ngun Laish whe tinu. Agun le kazü gü hyu laso, tsüle gwa ritsin. Thame thyü mvutse hika sun bin nya; whütse! Gü tsü lolo la tile!

¹⁰Tsüki gülo, temi dan le thame rüchün nshvu kemvu hyu loti. Tsüle kazü keda nme; tsünyu temi le senmvulo keshvu lihie bin nyo, lo Sunggigü le tsüpe hagun tsü laso.”

¹¹Tson-o Dan tsipwen temi tsitsero le teri kanyü nda lo-o Zorah lo Eshtaol nken-o tsonchü shü.

¹²Anyugun le nsin gü Juda kazü nyu Kiriath Jearim nkhünzin kensenbin thyülo. Tsügenyu bin tsügü pe Dan kensenbin tse kolo.

¹³Anyugun le tsü nyu bin-o Efraim rincho ki Mikah kanyu ryü.

¹⁴Tson-o gü Laish kazü rhi kethyü jule anyu pvünyu dan ka zoshü, “Ka hidan nme nyu tesen pe teromen du-o rakagi pe je kethyü nme le kebin hagun le shale mvula? Teromen kecha ko lo ephod ko tse bin nle. Tsügenyu dihontse tiyo hagun le rüchün bin nle nmvu la?”

¹⁵Tson-o anyugun le Mikah kanyu Levinyu ponyu gü le kebin bin ki gü a-le dihontse bin yo ketsoshü.

¹⁶Tson kebin ka Dan temi terithyü titse ndo sen kehü tsitsero dan le khinrun ka sobin.

¹⁷Püshükeda gü le terikanyü sen kehü temi tsitsero dan zen khinrun ki kebin ka, rüzükeryü minpvün jule njü gü tesen pe teromen du-o rakagi pe je kethyü gü, teromen kecha dan, lo ephod khilo la.

¹⁸Temi jule gü Mikah kanyu kenshün kanyü gü khikebin ka, püshükeda güle hagun le nyuthyü bin nla? tse ketsoshü.

¹⁹Anyugun le a-ka zoshü, “Matse binlo. Jo nme zo nya. Ryü agun püshükeda thyü lo tharhi pe agun tsülo. Nle temi nme kami püshükeda thyü kebin nyeki Israel tsipwen nme püshükeda thyü mvuti ole?”

²⁰Tsonshü laryü püshükeda gü le a-sherhün sala, tson-o a-le kenshün kanyü dan khilo-o anyugun zen güla.

²¹Anyugun le ranio anyu nyenyu, anyu senru lo anyu hon kesen dan no rio tsonchü shüla.

²²Anyugun le Mikah ka nken-o nithen ki gükela siki Mikah le teri thyü titseo a-kazonyu kolo. Anyugun le ryü Dan temi dan hülo-o

²³nrashü. Tsüka Dan temi dan le rani ryüo Mikah ketsoshü, “Nyuthyü ola? Nyugenyu temi hi aphu zen hü nla?”

²⁴Mikah le zoshü, “ ‘Nyuthyü ola?’ tse tsüle hagun le nyu zobin nla? Hagun le a püshükeda lo ale thyükelo teromen khisen tin laso! Ale nyu kecha le bin ni ola?”

²⁵Temi dan le Mikah ka zoshü, “Temi hidan no anyugun nyunta lo-o n whe kebin nyeki nle thame zomvu kela we gwakvu. Anyugun nyunta lolo nle lo nkami apentha sila ti.”

²⁶Tsonshüo güla. Mikah le temi tsüdan le kvusa kebin hyu shüo rani a-kaki gunla.

²⁷Dan temi dan le püshükeda gü lo Mikah le kethyü hon dan khikelo siki gü bwenye lo ntsema kebin Bethrehob ketejon hontse kebin Laish rünyi rola. Laish le Sidon zen nithen kela genyu temi nme-e anyugun kenikeshü ndila, lo anyugun le temi kecha nme zen kengü hümvu. Dan temi dan le rünyi tsügü thyünilo-o tsünyu binlo.

²⁹Anyugun le Laish zantho kela pe Dan thyülo, anyugun bon Dan, Jakob nyugü zan ka.

³⁰Dan temi dan le rüshvu titseo teromen gü pe shülo, lo Jonathan, Gershon nyugü a-bon le Mosa tsü no Dan tsipwen püshükeda thyülo, lo a-tsipwen no püshükeda thyü bin-o anyugun tenzen-o melojvü ki gü kela ti.

³¹Sunggigü kerüshvu phika gü le Shiloh nyu kebin gwenkho aphu ka Mikah teromen le tsüka bin hü.