Read Southern Rengma Naga KERATHÜ 19 Bible Online

KERATHÜ 19 - Southern Rengma Naga bible

KERATHÜ 19

¹Tsügwenkho ka, Israel nyu le a-raja ndi, lo Efraim rincho nithen ki Levinyu nme le yhun hü. A-le Juda kazü Bethlehem nyu a-thenu thyü titse lünyu nme lolo,

²ai tsügi le a-ge a-nyu ntao rani Bethlehem ki a-pvü kanyu gun gü shyezi bin tinla.

³Tsüselo temi güle tsügi sithen gü no rani a-kiryü lalo tse koti tse rhilo. Tson-o a-le a-go gü lo gada kenyhun zenlo. Lünyu gi le ka gü tsin pe Levinyu gü zenshü, lo tsügi a-pvü le a-hyushüo shekerhün thyü a-zenlo.

⁴Tsügi a-pvü le a-no bin lo tse tenge kela genyu a-le jonshen bin tinla. Au le tyütsü lo njüo tsüje tsüka bin.

⁵Jonzi nyü lonyü nshwe soryüo au le gun titse ndo lo. Ai lünyu gi a-pvü le Levinyu gü ka zoshü, “Tha peha tyülo rilo. Tsonyatselo hai genyu gwati. Tsonkelo siki gü logwa.”

⁶Tson-o au bin-o kengü tyütsü lo. Tsüselo lünyu gi a-pvü le a-ka zoshü, “Ntsoje hika bin-o shekerhün thyü lolo.”

⁷Levinyu gü le gun titse solo, ai a-pvü le tenge tselo kela genyu kheje me tsünyu bin ni tinla.

⁸Jonpvün gü lonyü nshwe a-le tsonchü shüla titse so, ai tenu gi a-pvü le, “Tha peha tyülo rilo. Nhenyu ki gülo.” Tson-o au kengü tytsü lo.

⁹Temi gü, a-thenu gi lo a-go tse tsonchü shü laryü, a-pvü le zoshü, “Ngwün güzhü laso; tsügenyu zhütin lalo. Thon mvuo zün kelai so. Ntsoje hika bin tseo. Lonyü nshwe so-o gun logwa le,” tson.

¹⁰Ai temi gü le khejeme tsünyu sun ninyü mvuo a-thenu gi, au gogü lo gada kenyhun le kanyü pfü tse tsonchü shü. Anyugun le Jebus (tsüle Jerusalem) kho nni keryü tsüle ngwün la, tsügenyu gogü le a-npugü ka zoshü, “Nyuthyüo ngun ntsoje Jebus nyu nyida hinyu sun tinla mvu ola?” tson.

¹²Ai a-npugü le zoshü, “Ngun le gü Israel nyu kemvu rünyi nyu sun kemvui le. Ngun hi nken-o keshanyu kethün gü Gibeah nmvue Ramah ka ntsoje sun tile.”

¹⁴Tson-o anyugun le Jebus nken gun. Anyugun le ryü Benjamin tsipwen lojvü nyu Gibeah tikelo tsüle yhüko chela.

¹⁵Lo anyugun le tsüje bin titse tsünyu gü. Anyugun le nyida tsünyu yügü tsoncho ka dun bin, ai temi nme anyugun zen a-kanyu gü kethyü ndila.

¹⁶Tsontsin kethen nyu nme le loki bin hü, ai ntsoka we ryü Gibeah nyu yhun hü. (Tsünyu kebin kechanyu le Benjamin tsipwen.)

¹⁷Kethen nyu gü le tesin le nyida gü tsoncho nyu kebin shalo-o, “Hagun le dikiryüla? lo dikipon gü jü nla? tse ketsoshü.

¹⁸Tsontsin Levinyu gü le zoshü, “Agun le Judia nyu Bethlehem ki bin hüo Efraim rincho ki agun kaki gun jü nle. Lo temi nme ntsoje agun no a-kanyu sun keloi mi ndi,

¹⁹agun le gada chvü npenkon, lo athenu gi, agogü agun genyu tensü lo vainzu ai pfü hü. Agun genyu senmvulo keshvu aphu bin nle.”

²⁰Kethen nyugüle zoshü, “Hagun aka ki ryülo! Ale hagun nucha loti; kheje nyu tsoncho nyu bin nyalo.”

²¹Tson-o a-le anyugun zen a-ka ki gun-o gada chvü thyüshü. A-sin ju pha sü lao anyugun no tyütsü lo.

²²Tson-o anyugun shekerhün thyü bin laryü nyida gü nyu serikemvu nyu peha le ryü ka hunpfü lo-o kakhin kekho so. Anyugun le kethen nyu gü ka, “Nka ki ryü kebin pechenyu gü tsü zenchwi ryülo! Agun le zen-o serikemvu tho thyü nyü bin nle!” tson so.

²³Ai kethen nyu gü le kamhun ki chwigü anyugun ka zoshü, “Nmvu, apvünyu ju, hagun cheno-e serikemvu, gwakemvu tsühon tse thyü nyalo! Temi higü le asin le.

²⁴Hire, a-thenu gi lo anyugi phusen nme le bin nle. Ale ntsoka au zen chwiryü tile. Hagun le au zen nyuthyü ny yo thyülo. Ai temi higü ge we serikemvu tson kethyü thyü nyalo!”

²⁵Ai temi dan le a-khwenyümvu. Tsügenyu Levinyu gü le a-thenugi tsenshwi pe kamhun ki anyugun tsüla. Anyugun le khensin a-zenzhü lo a-zen serikemvu thyü bin-o lonyü gü ti.

²⁶Lonyü gü tenu gi le ryüo a-nyepvü le kebin kethen nyu gü ka khenpvü ka keto bin. A-le tsüka bin-o tsangben chwi keryü ti.

²⁷A-nyepvü le lonyü gü so-o tsonchü shü titse kakhin she chwiryü laryü a-thenu gi le kakhin phaka keto-o a-ben keto pe kakhin nmhu kebin hyulo.

²⁸Tson-o a-le, “So-o ngun gunla tile,” tsonshü. Ai nra mvula. Tson-o a-le a-min pen pe gada ge kepha lo njüo a-kaki gunla.

²⁹Tson-o a-ka tilo ntsin zhe nme khilo-o a-thenu gi jünthü pe tseryü kenyhun thyülo-o sime pe Israel nyu tsipwen nmeme tsüshü.

³⁰Tsü kehyu nyu aphu tse, “Ngun le khenyüme-e hihontse nyülo shwimvu, Israel nyu le Ijipt nken chwikeryü hihontse kethyü thyümvu zun! Ngun tha peha thyü mvulo shvu! Dihontse tila?”