Read Southern Rengma Naga KERATHÜ 2 Bible Online

KERATHÜ 2 - Southern Rengma Naga bible

KERATHÜ 2

¹Npugü lokethyügü le Gilgal nyu Bochim ki gü Israel nyu ka zoshü, “Ale Ijipt ki hagun zen chwiryüo ale hagun bonnyu ka zoshü kenjü kazü gü nyu shü. ‘Ale thame kae hagun zen kejozen kenjü gü khela loho,’ tse zoshü.

²Hagun le kazü higü nyu keyhun nyu zen kejozen nya. Anyugun kershvubin borhola mvuloshvu. Ai ale hagun ka kezo hagun le thyümvu. Hagun le tsü seri kethyü tho thyü laso!

³Tsügenyu ntsoka ale hagun ka zobin nle hagun le kethün shüe ale temi hidan hü loho. Anyugun no hagun shwikerüchün nyu thyüti, lo anyugun tero kerüshvu nyu hagun min ti.”

⁴Tsangge logü le jo hizoshü ntsin, Israel nyu temi aphu chü sola,

⁵tsügenyu bin tsügü pe Bochim tse kola. Tsüka anyugun le kerüshvu thyü pe Npugü tsü.

⁶Joshua le Israel nyu temi dan nipe anyugun tson nyu shü küla, lo nmeme tse kazü a-jün gwen loti tse güla.

⁷Joshua le rhün kebin then temi dan le Npugü lothyü, lo a-kesi sikie Npugü le Israel nyu genyu tha keda thyükeshü kehyu sharhi ju le rhün kebin then tsühontse thyü.

⁸Nun nyugü Npugü go gü Joshua le chen tsio tseryü ka sila.

⁹Tson-o pe Gaash kazüthun sozin Efraim rincho ki Timnath Serah ka a-npvü a-kazü nyu sunla.

¹⁰Shehe tsügü a-pentha sibula, sheshün le soryü Npugü lo a-le Israel nyu genyu tha thyü keshü dan tsü nmhinla.

¹¹Tsüselo Israel nyu le Baal lothyüo Npugü mhundyü nyu mula.

¹²Anyugun le Ijipt nyu anyu zen chwikeryü anyugun bonnyu Sunggigü, Npugü tsü rüshvu mvulao tero kecha, anyugun hun kebin temi dan tero rüshvu sola. Anyugun le nkhün tsü gü tsüdan rüshvuo Npugü no a-nyunta la.

¹³Anyugun le Npugü rüshvu mvuo Baal lo Astartes lothyü tinla.

¹⁴Tsügenyu Npugü le Israel nyu ge a-nyunta sa lao mehon khin, lo selola kehü nyu no anyugun whe. A-le anyugun hun kebin shwikerüchün nyu no anyu so kvula, tson-o Israel nyu no sun binlo nrün ndila.

¹⁵Npugü le tsonti tse zokeshü hontse anyugun le terinyu kegü tsen Npugü le anyugun ntsunla. Anyugun le rhokedyü thyüla.

¹⁶Tsontsin Npugü le sharhi ju pe Israel nyu tsü shüo tsü dan no mehon khin lola kehünyu ben nyu anyugun kenishü.

¹⁷Ai Israel nyu le anyugun sharhi ju khwen-e nyümvu. Israel nyu le Npugü khelao tero kecha rüshvu. Anyugun pvübon nyu le Npugü johokeshü zen hü ai sheshün higü le whütse tson mvula.

¹⁸Npugü le sharhi pe Israel nyu tsülo, tsügü le rhün kebin then Npugü le a-cheo no shwikerüchün nyu ben nyu temi dan kenishü hü. Mele anyugun nshweo kenjünthyü kebin ka Npugü le anyu shwi njün kela genyu.

¹⁹Ai sharhi gü le sila lo, temi dan le rani gü tsümhundyü shehe nyeki shvukvula. Anyugun le tero kecha lothyü lo rüshvuo anyugun gwakemvu tson gü kheshü mvula.

²⁰Tson-o Npugü le Israel nyu ge a-nyunta sao zo, “Senye higü le anyugun no zen hülo tse ale anyugun bon nyu zen Kejozenkelo gü borho laso. Anyugun le a-jozen kemvu genyu,

²¹Joshua le kesi gwenkho ka kazü günyu kebin senye nme-e ale hüshwi sin loho.

²²Tsüge tsü, Israel nyu dan hile anyugun bon nyu hontse atson then tile mvuyo shwishü ti.”

²³Tson-o Npugü le senye hidan no kazü günyu bin; a-le tsüdan so kvukelo pe Joshua tsü mvu, nmvue Joshua le sila nyemhun anyugun hü lamvu.