Read Southern Rengma Naga KERATHÜ 20 Bible Online

KERATHÜ 20 - Southern Rengma Naga bible

KERATHÜ 20

¹Tesozin Dan ka gü tesinzin Beersheba keti, lo nphozin Gilead kazü nyu tse Israel nyu aphu chwiryü. Anyugun le nme thyüo Mizpah ka Npugü mhundyü nyu kequenlo.

²Sunggigü temi dan le kequen kebin hinyu Israel tsipwen aphu nyu sharhi ju kobin, tsüka tsonkechü shüpahü lak pezi le bin.

³Lo Benjamin tsipwen le Israel nyu tsipwen kecha aphu Mizpah ka kequen kebin rüla nyülo. Israel nyu dan le ketsoshü, “Dihontse kemu higü thyülayo agun ka zoshü lo?”

⁴Tsontsin a-thenu boshvu kela gü Levinyu güle zoshü, “Ale lo athenu gi ayi le Benjamin kazü Gibeah rünyi nyu kheje ki zhülo titse gü.

⁵Tsüka Gibeah nyu le kheje nyu ryü a wheo ka gü hun lola. Anyugun le a dushvu kela nda; lo anyugun le athenu gi zenzhüo no sila le.

⁶Lo ale a-min khilo-o duthüo nmeme pe Israel nyu tsipwen tseryü kenyhun ju kenjün shü le. Anyugun le ngun dan nyu gwakemvu serikemvu thyü kela genyu.

⁷Hagun hinyu kebin nyu aphu Israel nyu. Hi genyu ngun nyuthyü tila?”

⁸Temi aphu kengü solo njüo zoshü, “Phika nyu yhun nmvue kanyu bin kehü nyue ngun nme rani a-kaki gun loho.

⁹Ngun hihontse ti: ngun whenshwio temi peha kejü pe Gibeah whe ti.

¹⁰Israel nyu jüntseryü ka jünme no rihü dan ketyüketsü thyü lo kechanyu le gü Gibeah nyu le Israel nyu dan nyu serikemvu thyü kela shaja pe anyugun tsüti.”

¹¹Tson-o Israel nyu aphu rünyi tsügü whe nrün genyu kequenlo.

¹²Israel nyu tsipwen dan le lilo nipe Benjamin tsipwen kazü aphu nyu shüo, “Hagun le ntsethyü kemu hi thyüla ola? tse zoshü.

¹³Ntsoka Gibeah nyu serikemvu ju tsüpe agun ben ka shüla lo, tson-o agun no anyugun dushvu lao Israel dan nyu gwakemvu tsü khi lalo,” tsonshü. Ai Benjamin tsipwen le Israel kechanyu dan khwenyü mvula.

¹⁴Anyugun le Israel kechanyu dan zen terithyü ti tseo Benjamin nyida aphu nyu temi le ryü Gibeah nyu kequenlo.

¹⁵Tsünyü anyugun le anyu nyida nyu shüpahü yie nkio tsero kolo. Tsünyeki Gibeah phenyü nyu a-ben ngwa shwe kehü tsi tsenyü kejülo. Anyugun aphu kezün vü ge tso shwe pe shüntsü me-e jonzü hümvu.

¹⁶

¹⁷Benjamin tsipwen sin mvuo Israel tsipwen kecha dan ko terithyü kesha shüpahü lak pezi le kequen lo.

¹⁸Israel nyu le Bethel ki kershvubin ka gü, “Tsipwen digü no Benjamin whe teri tiyo,” tse Sunggigü ketsoshü. Tsüka Npugü le zoshü, “Juda tsipwen le ti.”

¹⁹Tson-o Israel nyu le tsüsigü lonyü chwigü Gibeah nyida khoka kensenbin thyülo.

²⁰Anyugun le Benjamin rihü whe güo shüpahü dan a-bin bin ka binlo.

²¹Benjamin rihü dan le nyida günyu chwiryüo tsünyü Israel shüpahü yie nkikenyhun dushvula.

²²Tsüselo Israel nyu le kershvubin ki gü Npugü mhundyü nyu chechü bin-o ngwün kishü. Anyugun le, “Agun no ni gü agun tsasikezen Benjamin dan zen terithyü ni tile?” tseo a-ketso. Npugü le “Ele" tson zoshü. Tson-o Israel rihü dan le pecheo kerinyü hontse anyugun shüpahü dan no a-bin kemenyu tsü binlo.

²³

²⁴Anyugun le Benjamin rihü dan nren titse gwenhvu ge ryü.

²⁵Lo gwenhvu gü ko Benjamin temi le Gibeah nyu chwiryüo Israel shüpahü terithyü kesha yie tseryüo tetse dushvu la.

²⁶Tsüselo Israel temi aphu Bethel ki nsin gü chechü. Anyugun le tsünyü Npugü mhundyü ka dun-o tyütsü mvu bin ngwün gü ti. Anyugun le kepfüshe kerüshvu thyüshü lo apentha rope kerüshvu peha thyü- aphu Npugü mhundyü nyu.

²⁷Tsügwenkho tsüle Sunggigü zen kejozen kelo Khinpha le Bethel ka bin, lo Aron nyu Eleazar nyugü Phinehas le tsü ntsen hü. Temi dan le Npugü ka ketso-o, “Agun no gü agun tsasikezen Benjamin dan zen kenren le khela mon?” Npugü le zoshü, “Nren lo, senduki anyugun sa kvukelo pe hagun tsü ti.”

²⁸

²⁹Tson-o Israel nyu le shüpahü peha no Gibeah hun-o kebu bin.

³⁰Lo jonshen kesin-o anyugun le Benjamin rihü dan nren, anyugun le himhundyü kethyü hontse shüpahü dan no Gibeah ntsun-o a-bin ka bin.

³¹Benjamin dan le anyugun nren chwiryü lo nsü zen-o nyida gü nken tinla. Himhundyü hontse Bethel tson lo Gibeah tson ki kendo nyu Israel nyu peha dushvula. Anyugun le Israel nyu shenryü laki dushvula.

³²Benjamin dan le zoshü, “Himhundyü hontse anyugun nke lalo.” Ai Israel nyu le tesen nyida gü nyu anyugun nsü zen-o tsonda kishü la titse ndo bin.

³³Tson-o Israel nyu rihü danda gü le tesen nigü Baaltamar ka a-dan thyü nilo, lo Gibeah hunpfüo tsokhin ki kebu kebin dan le kehü chwiryü.

³⁴Israel nyu aphu ka kejükelo temi yie tseryü dan le Gibeah whe lola, lo teri le rüsa la. Benjamin dan le nke gü jü kela anyugun npfü anyu shalo mvula.

³⁵Npugü le Benjamin dan sakvukelo pe Israel tsüla. Tsünyü Israel nyu le anyu shwikerüchün nyu yie nkipvün-o tsime dushvula,

³⁶tson-o Benjamin dan le anyugun le mezenlomvu kela shalo. Israel nyu rihü kechon gü le anyugun le no kebuo Gibeah hun kebin dan tenyen-o Benjamin dan mhundyü nyu tesen tinla.

³⁷Temi hidan le tin whütse Gibeah nyu ryüo nyida günyu temi aphu dushvula.

³⁸Israel rihü kechon gü lo kebu kebin dan le zansü nme kenthon njü. Anyugun le rünyi günyu mahkekhu keda nme hyu shü lo,

³⁹teri bin nyu kebin Israel nyu dan le rani ryüti. Higwenkho hile Benjamin dan le Israel nyu min shenryü boshvu laso. Anyugun npfü kenthon-o, “Himhundyü hontse anyugun nke laso,” tson bin.

⁴⁰Tsüselo zansü gü le chwiryüla; rünyi günyu mahkhu chwiryüla. Benjamin dan le rani shü laryü nyida gü apentha mah le nnyükebin hyu pe anyu dun thyüla.

⁴¹Tsüselo Israel nyu le rani ryü laryü Benjamin dan le anyugun nke güjü kela shalo_o anyu rhokedyü thyüla.

⁴²Anyugun le Israel nyu mhundyü nyu ranio tehen nyu gü ai kebu lo nrün ndi la. Anyugun le rihü kechon gü lo nyida günyu chwiryü kebin dan ja nyu bin lolao anyugun nke la.

⁴³Israel nyu le shwikerüchün nyu khinthü lo-o kheshü mvutse hü gü Gibeah npho tio anyugun then-o dushvu.

⁴⁴Benjamin shüpahü kegwatsin yie tseryüo tetse dushvu la.

⁴⁵Kecha dan le ranio tin Timmon tsonye kipon gü. Tson nyu anyugun min yie pvün dushvula. Israel nyu le a-sen dan hü Gidom ki gü yie hvu dushvu nila.

⁴⁶Tsünyü Benjamin nyu aphu kesin le yie nkio pvün dushvula-anyugun aphu shüpahü kepeche nti.

⁴⁷Ai temi tsei tsero we Rimmon tsonye ki güo simvu lo, tson-o anyugun le shyezi tsüki bin tinla.

⁴⁸Israel nyu le rani ryüo Benjamin temi peche, tenu, ntsenyu lo senru aphu dushvu la. Anyugun le rünyi hyukelo aphu rola.