Read Southern Rengma Naga KERATHÜ 21 Bible Online

KERATHÜ 21 - Southern Rengma Naga bible

KERATHÜ 21

¹Israel nyu le Mizpah nyu kequen kelo ka Npugü mhundyü nyu zoshwikeshü nme thyü; “Ngun nme-e a-nyu pe Benjamin temi ka kalu loho.”

²Tson-o Israel nyu le Bethel ka gü Sunggigü mhundyü nyu dun bin-o ngwün güti. Anyugun nyugwamvu lo chechü nra nhuo,

³“Israel nyu Npugü Sunggigü, nyu genyu hihontsela la? Nyugenyu Benjamin tsipwen no Israel nyu dan nyu ndi gü jüla sela?”

⁴Lonyü nshwe temi dan le tsüka kershvubin nme thyülo-o kepfüshe kerüshvu lo apentha rope kerüshvu peha thyü shü.

⁵Anyugun le ketso shü, “Israel nyu dan nyu dan nme-e Mizpah ka Npugü mhundyü nyu kequen kethyü ka gü kemvu le bin le?” (Anyugun le ligü higü Mizpah ka gü kemvu gü no siti tse keswe thyü njü.)

⁶Israel nyu le anyugun tsasikezen Benjamin dan genyu rünyumvu sala, tson-o, “Nthu Israel nyu le tsipwen nme nmhen laso.

⁷Benjamin temi rhünkebin dan genyu ngun dihontse anyugun nu fü pe tsü tila? Ngun le ngun nyugi nme-e pe anyugun tsü loho tse Npugü mhundyü nyu zoshwishü laso.”

⁸Anyugun le Israel tsipwen dan nyu peha le Mizpah nyu kequen kethyü ka gü kemvu le bin le ndi yo ketsogun, laryü Gilead ka Jabesh nyu nme-e tsüka bin kemvu hyulo;

⁹rihü dan zan ko kegun ka Jabesh nyu nme khinshü mvula.

¹⁰Tsügenyu kehun gü le kepeche temi yie tseryü kenyhun nishüo, “Gü Jabesh nyu tenu nyu lo ntsenyu kesin temi aphu dushvu lalo, tse ahza shüla.

¹¹Pechenyu aphu lo tenunyue phusen kemvu aphu dushvula lo.”

¹²Anyugun le Jabesh nyu dan nyu lünyu phusen tsizi hyulo, tson-o tsüdan zen Shiloh nyu kensenbin ka zenryü, tsü le Kanan kazü nyu.

¹³Kehun gü apentha jolo nipe Rimmon tsonye ki kebin Benjamin tsipwen dan tsüo terithyü mvula sele tse shü.

¹⁴Tson_o rani ryü, lo Israel tsipwen kecha dan le anyugun le boshvu mvukela Jabesh nyu lünyu dan tsü pe anyugun tsü shü. Ai tsü le anyugun genyu rhola.

¹⁵Temi dan le Benjamin dan njün hola, Npugü le Israel tsipwen dan kengü nme kethyü bokho kela genyu.

¹⁶Tson-o kehun kebin ka sharhi ju le zoshü, “Benjamin tsipwen dan nyu tenu ndi laso. Ngun dihontse rhünkebin temi dan hi nu fü pe tsü tila?

¹⁷Israel tsipwen tseryü kenyhun dan nyu nme nmhenla loshvu. Benjamin tsipwen no yhunlo nrün tson fü mvu loshvu le,

¹⁸ai ngun we ngun nyu pe anyugun ka kalu keloi mvu, ngun segü le anyu pe Benjamin tsipwen ka kalu yo no shochün pfü lotse ngun le zokela si genyu.”

¹⁹Anyugun le tson rüchün tseo, “Thon mvutse chenkechwi Shiloh ka Npugü nga thyü kehü tsüle ryüjü nyo.” (Shiloh tsüle Bethel tesozin, Lebenon tesinzin lo Bethel lo Shechem au jaka tson gü nphozin bin.)

²⁰Tsügenyu anyugun le Benjamin tsipwen dan ka zoshü, “Gü vain low nyu kebuo

²¹khwe binlo. Tson-o lünyu dan le nga ka nyhun titse Shiloh ka ryülo hagun le vain low nyu chwiryü lo. Hagun le lünyu dan dan nyu anyugun kemvu thyüo nmeme tenzen Benjamin lojvü ki gü pe hagun nu thyü lolo.

²²Anyugun pvünyu nmvue anyugun tsünyu le hagun ki ryü kenya yatselo, hagun le anyugun ka, ‘Anyugun pe agun nu thyü titse agun le terinyu hagun ben ka anyugun tenlo bin mvu laryü no agun zen binlo tse zolo gwa. Lo hagun le pe agun tsübin kemvu genyu hagun le zoshwishü kenjü gwenrho-o mula mvu le.’ ”

²³Tson-o Benjamin dan le tsühontse lo; anyugun nmeme tse lünyu dan le Shiloh nyu nyhun kebin ka a-nu kejü lo-o zen tinla. Tson njüo anyu kazü ki rani gü rünyi thyünio tsüki yhun lo.

²⁴Lo Israel nyu dan ko ranio a-tsipwen lo a-kaminyu a-hon ki gunla.

²⁵Tsügwenkho ka Israel nyu dan nyu raja ndi. Aphu tse a-le nyu thyü nyüyo thyü hü.