Read Southern Rengma Naga KERATHÜ 3 Bible Online

KERATHÜ 3 - Southern Rengma Naga bible

KERATHÜ 3

¹Tsügenyu, Kanan nyu terithyü kemvu Israel temi dan kegwa keshvu shwi titse Npugü le senye peha khepe kazü günyu shüla.

²A-le himhundyü terithyü mvushü kethyü Israel nyu shehe nmeme tse teri kethyü jvü pe senthyü nrün genyu hi thyü shü.

³Khe pe kazü günyu kebin le Filistian nyu nyida pvün, Kanan nyu aphu, Sidon nyu, lo Baal Hermon kazüthun kagü Hamath kazükenchon keti Lebanon kazüthun ge keyhun Hivnyu.

⁴Npugü le Mosa ge johoshü pe anyugun bonnyu ketsü Israel nyu le zen tile mvuyo hidan ge hi shwishü nrün genyu.

⁵Tsügenyu Israel nyu le Kanan nyu, Hitnyu, Amornyu, Periz nyu, Hivnyu lo Jebus nyu dan nyu binlo.

⁶Anyugun le tsüdan zen kelo lo anyugun tero dan-e rüshvu tinla.

⁷Israel nyu le Npugü anyugun Sunggigü nmhinla; anyugun le Baal lo Asherah men rüshvuo a-mhundyü nyu mula.

⁸Tsügenyu Npugü le Israel nyu ge a-nyuntao Mesopotamia nyu raja gü Kushan Rishthaim no anyu so kvula, a-le chen tetse a-nyu so gon.

⁹Tson-o Israel nyu le Npugü ka hishü, tsontsin Npugü le temi nme nipe no anyugun kenishü. Tsüle Kaleb sikezen gü Kenaz nyu gü Othniel.

¹⁰Npugü kapu gü le a-ge ryülo-o a-le Israel nyu sharhi thyülo. Othniel le terithyü gü, lo Npugü le Mesopotamia nyu raja gü so kvukelo pe a-tsüshü.

¹¹Tson-o chen henzi kazü gü le bwe lo, tsüsiki Othniel le sila.

¹²Israel nyu le Npugü mhundyü ka kemu thyü nila. Tsügenyu Npugü le Moab nyu raja gü Eglon no Israel nyu nyeki kvula.

¹³Eglon le Amornyu lo Amalek nyu zen kerhünlo njüo Israel nyu nyekvu lao Kvubin nyida gü, Jeriko lolo la.

¹⁴Tson-o Israel nyu le chen tseryüo tetse Eglon hensin bin.

¹⁵Tsüselo Israel nyu le Npugü ka hishü, lo a-le temi nme nipe no anyugun kenishü. Tsüle Benjamin tsipwen ka Gera nyugü Ehud, a-ben ngwazin sen kehü gü. Israel nyu le a-no jwe sen-o Moab raja gü Eglon ki gü.

¹⁶Ehud le jenthon yikepen kethyü kethon tsume kho nme thyülo. A-le tsüpe a-phisin ki a-din njüzin phinlo.

¹⁷Tson-o a-le jwe gü sen Eglon kiryü, tsügü le dasa kethyü temi nme.

¹⁸Ehud le jwe gü pe tsüshü laryü, a-le tsü pen kehü dan no ka ki nigun lalo tsela.

¹⁹Ai Ehud le Gilgal khoka tso keho ka rani Eglon ki ryüo a-ka zoshü, “Raja ale kebu jo nme nka kezoi le bin nle,” tsonshü. Tson-o raja güle a-gonyu ju no, “Tin lalo tse ahza shü!” Tsüselo anyugun aphu tinla.

²⁰Lo raja gü le a-npvü teso ki katsen kekun gü nyu dun kebin ka Ehud le gü a-ka zoshü, “Ale ngenyu Sunggigü ki jo shakelo nme le bin nle.” Tsonshü laryü Raja gü le solo.

²¹Tsüselo Ehud le a-ben ngwazin pe a-din njüzin jenthon gü tho lo njüo pe raja gü ginda jenphün shüla.

²²Jenthon gü lo a-de apentha yüla-o a-keshvu le keminkhin la. Ehud le raja gü ginda ka tsü sütho mvuo no a-sizin jenphe sen-o a-pha hvu jaki chwila.

²³Tson-o Ehud le chwiryü kakhin lao chabi shü la,

²⁴njüo tinla. Gonyu ju le ryü kakhin kenjü hyu, ai raja gü le kanyu ki rüyü bin ado tse rüchün la.

²⁵Anyugun le khwe mvuloshvu ado tse kerüchün kho khwe ai a-le kakhin she shü kemvu genyu, anyugun le chabin senryü khinshe shü, laryü anyugun npugü le keto-o si kebin hyulo.

²⁶Anyugun le khwe ketse ka Ehud le tinla. A-le tso keho nken-o Seirah ki güla.

²⁷A-le ryü Efraim rincho tilo njüo, teri thyü nrün genyu shukhun-o Israel nyu temi koshü; tson-o anyugun zen nsheryü.

²⁸A-le zoshü, “Asithenlo! Npugü le hagun shwikerüchün Moab nyu so kvukelo pe hagun tsü laso.” Tson-o anyugun le Ehud then nsheryü Moab nyu le Jordan pfüthü kehü tson khin lola; anyugun le temi nme-e no tsü pfüthü mvu.

²⁹Tsünyü anyugun le Moab nyu shüpahü kegwatsin yietseryü kho dushvula; nme-e no tinla mvu.

³⁰Tsünyü Israel nyu le Moab so kvulo-o, chen hentetse kazü gü le bwe lo.

³¹Tsüsika sharhi gü le Anath nyu gü Shamgar. A-ko Methutse kehüvü pe Filistian nyu tsitsero ga lao Israel nyu kenishwi shü.