Read Southern Rengma Naga KERATHÜ 4 Bible Online

KERATHÜ 4 - Southern Rengma Naga bible

KERATHÜ 4

¹Ehud le sikela siki Israel nyu le Npugü mhundyü nyu mu nila.

²Tson-o Npugü le Hazor nyu keda thyü kebin Kanan nyu raja gü Jabin no anyugun so kvu lola. Judah kemvunyu rünyi Harosheth ka kebin gü Sisera le a-rihüdan so keda thyübin.

³Jabin le tegi pe kecha terigari tsitekü le bin lo a-le chen nki Israel nyu so gon-o anyugun nshwe ryü. Tsüselo Israel nyu le chüo Npugü ka keche hishü.

⁴Lo tsügwenkho ka Lappidoth nu Deborah sidyükesha gi le Israel nyu dan nyu kerathü thyü hü.

⁵A-le Efraim rincho ki Ramah lo Bethel au jaka kvubin nme hensin dun bin hü, lo Israel nyu le tsüka gü a-no jopen shühü.

⁶Khenyü me a-le me nipe Naftali ki Keddesh nyida nyu Abinoam nyugü Barak ka shüo a-ka zoshü, “Npugü Israel nyu Sunggigü le ahza higü pe ntsü shü le: ‘Naftali lo Zebulun tsipwen temi yietseryü zen Tabor kazüthun ge külo.

⁷Lo ale Jabin rihüdan so keda gü Sisera zenryü Kishon züri ka nzen kega ti. A-le terigari lo shüpahü le bin-e, ale a-so kvukelo pe ntsüti.’ ”

⁸Tsontsin Barak le a-jokenishü, “Nle azen gülo güti, ai nle azen gü kemvu we ako gü mvu le.”

⁹Tsügi le zonishü, “Tsonlo, ale nzen güti, ai nle kvukelo zankegwa hyu loho, Npugü le Sisera khipe tenunyu nme ben nyu shükela genyu.” Tson-o Deborah le Barak zen Kedesh ki gü.

¹⁰Barak le Zebulun lo Naftali tsipwen kope Kedesh ki shü laryü, temi yietseryü le a-then ryü. Deborah le a-zen gü.

¹¹Tsügwünkho ka Kenite nyu temi Heber le Zannanim ka teshobin tenyu Kedesh kho kenika phika thyüo bin. A-le Mosa a-min gü Hobab tsipwen Kenite nyu gü khoka bin mvuo tinla.

¹²Sisera le Barak le Tabor kazüthun ge kükela shalo ntsin,

¹³tegi pe kecha terigari tsitekü lo a-temi aphu sin-o Judah kemvu rünyi Harosheth ka anyugun nipe Kishon züri ki shü.

¹⁴Tsüselo Deborah le Barak ka zoshü, “Gülo! Npugü le ntson ri hünyo! Nthu a-le Sisera so kvukelo pe ntsü laso.” Tson-o Barak le Tabor kazüthun ge a-temi yietseryü zen nshe.

¹⁵Barak le a-rihü dan zen gü lo Npugü le kevükeben kethyü pe Sisera, a-terigari lo a-temi aphu geshüla. Sisera le terigari ge tsen-o tsonchüo tinla.

¹⁶Barak le terigari lo rihü dan hü gü Judah kemvu nyu rünyi Harosheth tio Sisera rihü a-pentha dushvula. Temi nme-e kheshümvu.

¹⁷Sisera le tin-o Kenite nyu Heber nu Jael phi kanyu yüla. Hazor raja gü Jabin le Heber kaminyu zen gwatho kenjü genyu.

¹⁸Jael le chwigü Sisera teno-o a-ka zoshü, “Yüryü lo kedagü, aphika nyu ryülo. Nshvunya.” Tson-o a-le yüo tsügi le phi süren kebin sizin a-kebula.

¹⁹A-le tsügi ka, “Züpe ala shülo; ale teri laso.” Tson-o tsügi le nyüzü thyügi tsun nme khinshe pe a-la shüo a-khipe kebu nila.

²⁰Tsüselo a-le tsügi ka, “Phika gü khenpvü ka so bin-o mele ryü, temi peha le hika bin le tse ketso lo ndile tse zola lo,” tsonshü.

²¹Sisera le kenjünthyü kela genyu zhüsa tinla. Tsüselo Jael le kejonvü nme lo phika dyüthun nme tse khilo-o nkhvu tsegü a-nyejwi nme zin yhephe gü kazü tio no sila.

²²Barak le Sisera füryü ntsin Jael le chwi gü a-teno-o a-ka, “Hika ryülo! Nle fü kehü gü tsin pe nhi tile,” tsonshü. Tson-o a-le tsügi then yü laryü Sisera le dyüthun no a-pe yhepvüo kazü nyu keto si kebin hyulo.

²³Tsünyü Sunggigü le Kanan nyu raja gü Jabin so kvukelo pe Israel nyu tsüshü.

²⁴Israel nyu le Jabin nkiela kemvuthen a-nshwe ketsin tsin sola.