Read Southern Rengma Naga KERATHÜ 5 Bible Online

KERATHÜ 5 - Southern Rengma Naga bible

KERATHÜ 5

¹Tsünyü Deborah lo Abinoam nyugü Barak au le lü higü thyü:

²Npugü shwe! Israel nyu le terithyü titse rhilo; temi dan le a-kenyüo a-hoshü.

³Nyülo, hagun rajanyu ju! Khwenyüshü, hagun kedanyu ju! Ale lüthyü, ale baja khun pe Israel Sunggigü, Npugü ki shüti.

⁴Npugü, nle Seir kazüthun khe kela ka, Nle Edom lojvü nyu chwiryü kela ka, kazü le nnu, lo tsangge tsangri tsüryü. Ele, nmhu ge zü le ja tsüryü.

⁵Sinai Npugü mhundyü nyu kazüthun le nnu la, Npugü Israel Sunggigü mhundyü nyu.

⁶Anath nyugü Shamgar gwenkho ka, Jael gwenkho ka, kenjwen nyu le a-dan thyü kazü gü pfüthü mvula, lo kenjwen nyu le tsonba ki gü tinla.

⁷Israel nyu rünyi dan khela, Deborah; nle soryü kemvu ka tsüle nrun bin, nle Israel a-jvü hontse soryülo.

⁸Tson-o kazü günyu terithyü Israel nyu le tero keshün kejülo kela ka. Israel temi yie henzi dan nyu temi nme-e gida pvü lo mi sen ole?

⁹Anyugun le Israel nyu sharhi gü ki bin, a-kenyüo a-hoshü kebin dan. Npugü shwe!

¹⁰Tsü zoshü lo, hagun gada kechon ge kebin nyu, phabin kegwa ka dun kebin nyu, lo hagun lika hikae tsonchü mvulo keshvu ju.

¹¹Nyülo! danda le nranrio zülvu hun kebin Npugü kvukelo rüla zobin, Israel nyu kvukelo! Tson-o Npugü temi le anyugun nyida nyu tsonchü nsheryü.

¹²Rilo! Deborah, rilo! Rilo! Lü nme thyülo! Rilo! Mhundyü kipon Abinoam nyugü Barak nle do ten kelo dan mhundyü rilo!

¹³Tson-o jozen kehü dan le anyugun sharhi juki nsheryü; Npugü temi dan le terithyü titse ndo lo-o a-kiryü.

¹⁴Anyugun le Efraim nyu bin-o ketejon gü nyu ryü, tsüsika Benjamin tsipwen lo anyugun temi dan. Sharhi ju le Machir nyu bin-o nsheryü, kedanyu ju le Zebulun nyu bin-o ryü.

¹⁵Issachar ka sharhi ju le Deborah zen ryü; ele, Issachar lo Barak ko tse ryü, lo anyugun le a-sithen-o ketejon nyu gü. Ai Reuben tsipwen le kenjünkho la; anyugun le ryü tile mvuyo tse rhilo mvula.

¹⁶Nle nyuthyüo tanyü zen-o me siki bin tinla la? Tanyü kekhwenyu le tanyü keko nyü ti tse ole? Ele, Reuben tsipwen le kenjün khola; anyugun le ryü tile mvuyo rhilo mvula.

¹⁷Gad tsipwen le Jordan nphozin bin, lo Dan tsipwen le zürun nyu bin tinla. Asher tsipwen le zida seki bin; anyugun le züda seki bin tinla.

¹⁸Ai Zebulun lo Naftali temi dan le anyugun keyhun hoshüo teribin nyu gü.

¹⁹Megiddo züri Taanak ka, raja ju le ryüo kega; Kanan raja ju le kega ai anyugun le rükagi sen tin mvu.

²⁰Shenyü dan le tsangge bin-o kega; anyugun le tsangneki pfüthü gü kejü nyu, Sisera zen kega.

²¹Kishon zü keda le anyugun chün sen tinla-- Kishon züri zükeda. Ale nkvüo, tsonchü, tsonchü ti!

²²Tsüselo keru dan le nchwü kehüo, anyugun chen le kazü tsu kherara tse.

²³“Shochün pe Meroz tsüla lo,” Npugü jolo gü le zo, “Tsünyu keyhun nyu swe tsüla, swe tsüla. Anyugun le ryü Npugü keche mvu, Shüpahü nyu hontse ryü a-genyu terithyü mvu.”

²⁴Tenunyu yhekegwa tsin gi le Jael, Kenite temi gü Heber nu-- Phika nyu yhun kehü tenunyu yhekegwa tsin gi.

²⁵Sisera le zühi, ai tsügi le nyüzü pe a-tsüshü; tsügi le dohi pe khun kezegwa nme ka shü senryü a-tsü.

²⁶Tsügi le a-ben nme pe phika dyüthun sen, lo kecha gü pe kejonvü nme sen; a-le Sisera vüo a-pekhunru boren la; a-le tsügü pe yhephe la.

²⁷A-le khosen che tsügü tsügi phaka keto la. A-le tsügi phaka khosen-o che tsüla; a-le kazü nyu cheo sila.

²⁸Sisera a-jvü le kafüphe ka nrio; tsügi le kafüphe ka shwi shü. “Nyunthyüo a-terigari le ntsü ritsin ryü jü yo?” tse ketsoshü. “Nyuthyüo a-keru le nyajü ritsin-o rani ryü jü nla?”

²⁹Anyugun dan nyu thakeshatsin gile tsügi jo kenishü, lo a-le a-npvü a-nthon ni nio,

³⁰“Anyugun le thahyulo, lo kenjünlo nrün genyu nti fü hü, shüpahü nyu nme genyu lünyu nme nmvue mihvu, Sisera genyu phi kegwa, raja gi gunda ka keshü genyu a-jvükezü phi dan.”

³¹Nshwikerüchün nyu aphu no tsü hontseo si lalo, O Npugü, ai npvünyu ju we no yhüko chwiryü kejü hontse ben nda! Chen henzi kazü gü nyu kebwe le bin lo.