Read Southern Rengma Naga KERATHÜ 6 Bible Online

KERATHÜ 6 - Southern Rengma Naga bible

KERATHÜ 6

¹Israel nyu le Npugü mhundyü ka kemu thyü nila, tsügenyu a-le Midian nyu no chen tsenyü anyugun so gonla.

²Midian nyu le Israel nye kvu lao, Israel nyu temi no tsokünyu lo rincho bin kecha ki anyugun kebu tinla.

³Israel nyu le ntsi shüshü lo, Midian nyu le Amelek nyu lo kazü kesi kipon kebin tsipwen dan zenryü anyugun whe so lahü.

⁴Anyugun le ryü kensenbin thyü lo-o nshegü tesinzin Gaza keti anyugun low ketsü nkiela latse. Anyugun le thame kheshü mvutse tanyü, methu lo gada aphu sen tin lahü.

⁵Anyugun le chon pe tsekhvu hontse anyugun senru lo phika sen ryü lahü. Anyugun lo anyu ut le sülo kebui mvu. Anyugun le ryü kazü gü nkie bula,

⁶lo Israel nyu le thame thyü anyugun ntsun lomvula.

⁷Tsüselo Israel nyu le Npugü no Midian nyu ntsun shü lotse a-ka keche hishü,

⁸tsontsin, Npugü, Israel nyu Sunggigü le sidyükeshanyu nme nishüo no jolo higü sen anyugun karyü: “Hagun le Ijipt nyu medo thyü kebin ale hagun zen chwiryü,

⁹ale Ijipt nyu lo kazü higü ka hagun zen kega kethyü nyu ben nyu hagun kenishwishü. Hagun le kethün keshü ka ale anyugun hülao anyugun kazü pe hagun tsüshü.

¹⁰Ale Npugü hagun Sunggigü tsügenyu hagun no hagun le ntsoka a-kazünyu kebin Amornyu tero rüshvu nyalo tse zoshü. Ai hagun le akhwenyü mvula.”

¹¹Tson-o Npugü jolo gü le ryüo Ophrah rünyi nyu, Abiezer pfüphun ka Joash hon teshobin nme hensin dun bin. A-nyugü Gideon le Midian nyu kebuo vainsha kethün bin nme ka thoshe nyuh bin.

¹²Npugü jolo gü le tsüka a-yhühyu thyüshüo a-ka, “Npugü le nzen hü nyo, temi kepeche lo kekvu gü!” tsonshü.

¹³Gideon le a-ka zoshü, “Kedagü, Npugü le agun zen hü yatselo nyuthyüo tha hi aphu agun ge ryüla ola? Npugü le ndun tho thyü kehü-- lo a-le dihontse Ijipt nyu anyugun zen chwiryü yo agun pvünyu le agun ka zokehü rüla tsü aphu nyu thyüla se ola? Npugü le agun khela lo agun hope Midian nyu ben nyu shü laso.”

¹⁴Tsontsin Npugü le ahza pe a-tsüo, “Nkekvu keda aphu sen-o gü Midian nyu ben nyu Israel nyu kenishwi shülo. Ale a npvü nni bin nle.”

¹⁵Gideon le zonishü, “Ai Npugü ale dihontse Israel nyu kenishwi shü lomon? Agun pvüphun le Manasseh tsipwen dan nyu kvukemvu tsingü, lo a-kaminyu dan nyu ale keshetsin gü le.”

¹⁶Npugü le zonishü, “Nle thyü logwa ale nkeche nrün genyu. Midian nyu le temi nme nti hontse nle loni tse anyugun boren lati.”

¹⁷Gideon le zonishü, “Nle a-shwi nkenyü bin yatselo, nle Npugü ketsin tse kethyü tha peha tsin shülo.

¹⁸Ncheno-e ale ketyüketsü senryü ntsü kemvu ka tinla nyalo.” A-le zoshü, “Nle rani ryü kemvuthen ale bin ti.”

¹⁹Tson-o Gideon le a-ka ki gü tenyü nyu nme dushvu pe nilo lo tho kilogram tseryü pe kebu no shükemvu tensü thyülo. A-le tensü lo thyü tse pe rokhu nme ka shülo henzü gü pe la nme nyu shü senryü teshobin hensin nyu Npugü jolo gü tsüshü.

²⁰Npugü jolo gü le zoshü, thyü lo tensü gü pe tso hi ge shü lo henzü pe a-so ge jashü lo.” Gideon le tsonshü.

²¹Tsüselo Npugü jolo gü le a-thün ra pe thyü lo tensü gü kesüshü. Tsontsin tsonye gü ge mah le chwiryüo thyü lo tensü gü rola. Lo tsangge jolo gü hyu mvula.

²²Gideon le a-le kehyu gü tsüle Npugü jolo gü tse shalo njüo, nshvuo zoshü, “Aphusokeda Npugü! Ale mhuntsun njolo gü hyu laso!” tsonshü.

²³Ai Npugü le a-ka zoshü, “Nnyubwelo. N shvunya. Nle sila loho.”

²⁴Tsüka Gideon le kershvubin nme thyülo-o a-zan tho pe, “Npugü le Nyunkebwe khishü kehü gü,” tselo. (Tsüle nthu keti Ophrah ka Abiezer pfüphun hon.)

²⁵Tsüje Npugü le Gideon ka zoshü, “Npvü hon methutse lo methutse kecha chen tsenyü nme khilo-o npvü le Baal kershvubin kethyü tsü borhola, lo tsükho ka kebin Asherah tero gi mekezü tsü phünla lo.

²⁶Tson- tsonye higü soge kershvubin nme khwen kegwa thyüpe Npugü hagun Sunggigü tsülo. Lo nle phün kela Asherah men kethyü tesen tsü pe mah thyüo methutse kenyhun gü tsü apentha pe kero kerüshvu thyü shülo,” tsonshü.

²⁷Tsügenyu Gideon le a-gonyu mi tseryü zen lo-o Npugü le a-ka nyuzo shü yo tsü thyülo. A-le a-kami lo rünyi nyu temi dan kenshvu genyu nhenyu mvuo kheje nyu tsü thyüla.

²⁸Rünyinyu temi dan le lonyü nshwe sokeryü ka Baal kershvubin lo Asherah teromen phün kela, lo kershvubin khwen kelo gü ge methutse kenyhun gü pe rüshvu kela hyulo.

²⁹Anyugun le khinyunyu ketso-o, “Segü le hi thyü shüla?” Anyugun le ketso ketsü gun gü Joash nyugü Gideon le thyüla letse shalo.

³⁰Tson-o anyugun le Joash ka zoshü, “Nnyu zen hika ryüo agun le dushvu lati! Ale Baal kershvubin borho la lo a-khoka Asherah men phün laso,” tsonshü.

³¹Ai Joash le a-ntsun kebin nyu aphu ka zoshü, “Hagun le Baal genyu me nren tile? Hagun le a-nopen tile? Ligü higü a-no pen kethyü gü we lonyü tsangben kemvu ka dushvu lati. Baal le teronyu yatselo no a-npvü a-nopen lota. Borho kela tsüle a-kershvubin le.”

³²Tsügerhonyu Gideon pe Jerubbaal letse la, Joash le, “Baal no a-npvü a-nopen lolo; borho kela tsüle a-kerüshvubin le,” tsezo kela genyu.

³³Tsüselo Midian nyu, Amaleknyu lo nphozin temi dan le kequenlo-o Jordan züri pfüthü ryüo Jezreel ketejon ka kensenbin thyülo.

³⁴Lo Npugü kapu gü le Gideon ge ryülo-o a-le Abiezer pfüphun no a-sithen lo tse shukhun-o koshü.

³⁵A-le lilo nipe Manasseh bin kenyhun nren nyu kebin aphu no a-sithen lotse koshü. A-le lilo nipe Asher, Zebulun lo Naftali koshüo anyugun koryü a-zen kerhünlo.

³⁶Tsüselo Gideon le Sunggigü ka zoshü, “Nle a sen-o Israel nyu kenishwishü titse rhilo la sele tsezo.

³⁷Ale thyühüphi peha pe agun shekenyuh bin kazünyu la shüti. Lonyü gü thyühüphi ge nti khezü le bin ai kazü nyu ndi yatselo, nle asen-o Israel nyu kenishwishü titse ale sha loti.”

³⁸Ketsin thyü tsü hontsela. Gideon le lonyü nshwe soryü ntsin, thyühüphi gü ge khezü kechon le bin-o a-le thün pe khun nme süla.

³⁹Tsüselo Gideon le Sunggigü ka zoshü, “Age nnyunta nyalo; ano jo nme zonishülo. Ano thyühüphi ge thakon me shani shülo ta. Ntsoka we thyühüphi gü no sinla, lo kazü gü no chien lalo.”

⁴⁰Tsüje Npugü le tsü hontse thyüshü. Tsüsigü lonyü thyühüphi gü le sin, ai khezü le kazü gü ntsen la.