Read Southern Rengma Naga KERATHÜ 7 Bible Online

KERATHÜ 7 - Southern Rengma Naga bible

KERATHÜ 7

¹Tsüselo Gideon lo a-temi aphu lonyü nshwe so-o gü Harod zükenthün kho ka kensenbin thyülo. Lo Midiannyu le anyugun sozin Moreh rincho khoka ketejon nyu kensenbin thyülo.

²Npugü le Gideon ka zoshü, “Nzenkehü temi dan tsüle ale Midiannyu so kvukelo pe anyugun tsü nrün genyu chonri tsin le. Anyugun npvü anyu le kvulo letse rüchün ketekho-o arüchün mvula lo keshvu genyu.

³Tsügenyu, temi dan tesha shülo, ‘ligü higü nshvu kebin nyu le ka ki rani lalo, lo agun le hika Gilead kazüthun ka bin ti..’ ” Tson-o yie nkikenyhun le ranila, ai yie tseryü le bin.

⁴Npugü le Gideon ka zoshü, “Nle ntso-e temi chonri le bin zun. Anyugun zen zü ki gülo, lo ale anyugun kejükho pe ntsü shüti. Ale temi higü no nzen güti, tsonshülo a-le güti, temi higü no nzen gü loho, tsonshülo a-no gü nya.”

⁵Tson-o Gideon le temi dan zen zü ki gü, lo Npugü le a-ka zoshü, “Ligü higü tehi hontse a-yi pe zü lvutsü kethyü nyu lo khosen-o zütsü kethyü nyu tse pe kechacha thyülo.”

⁶Tsonshü laryü temi tsishen le a-ben pe zü thyü senryü lvulo; ai kechanyu aphu khosen tsü gü zütsü.

⁷Npugü le Gideon ka zoshü, “Zülvu tsü kethyü tsishen dan hi zen-o ale hagun kenishü lo Midian nyu so kvu kelo pe hagun tsüti. Kechanyu aphu no ka ki gun lalo tse zo shülo.”

⁸Tson-o Gideon le mvulo keshvu aphu lo shu sen kehü tsishen dan no bin, lo kechanyu we aphu nipe ka ki shüla. Midiannyu kensenbin le anyugun hensin ketejon nyu bin.

⁹Tsüje Npugü le Gideon ka zoshü, “Sogü kensenbin gü whe lo, ale tsüso kvukelo pe ntsü bin nle.

¹⁰Ai nle gü whe nshvu yatselo ngogü Purah hai anyugun kensenbin ki nshelo.

¹¹Tson yatselo anyugun le nyu zobin yo nle nyü loti, lo nle pecheo anyugun whe loti.” Tson-o Gideon lo a-go gü Purah au le kensenbin teka nshelo.

¹²Laryü Midiannyu Amaleknyu lo npho kipon tsipwen temi dan le tsekhvu dan hontse ketejon gü hen bin, lo anyugun ut le chon pe züda seka hachon hontse bin.

¹³Gideon le keryüka temi nme le a-pvügü ka a-mi zokebin nyülo. A-le zo-o, “Amiki barley pe kethyü tensü thün nme le keto sen-o ngun kensenbin nyu ryüo phika nme jonshü. Tsontsin phika gü le nren-o kazünyu che lale,” tsonzo.

¹⁴A-pvügü le a-jokenio, “Tsüle Joash nyugü Gideon! Israel nyu jenthon gü so. Tsüle thakecha kemvuiso! Sunggigü le Midian nyu lo ngun rihü apentha so kvukelo pe a-tsü laso!”

¹⁵Gideon le temi gü mi, lo tsükon le nyuyo nyü kelo ka, a-le khosen tsügü Sunggigü rüshvu. Tsonshüo a-le rani kensenbin ki gü anyugun ka, “Solo! Npugü le Midian nyu rihü dan so kvukelo pe hagun tsü bin nle!”

¹⁶A-le a-temi tsishen dan kenjün pe jünshen thyülo, lo temi nmeme tse shu nme lo laki, nme ka makenben nmeme pe shü pe tsüshü.

¹⁷A-le anyugun ka, “Ale kensenbin teka gü lo a nrio, ale nyu thyü yo tsü thyülo.

¹⁸Ale lo azen kehü jule shukhun shülo, hagun kensenbin kehun aphu shukhun shüo, ‘Npugü genyu lo Gideon genyu tson shülo!’ ”

¹⁹Tson-o Gideon lo a-zenkehü temi tsime ju le, rikhun kelu kela sika, tsanglvu timvu din ka ryü kensenbin te tilo. Tsüselo anyugun le shukhun shüo anyu le sen kehü laki dan boren shü,

²⁰lo dan kecha hvu ko tsonshü. Anyu aphu ngwazin mah kenben lo nzhüzin shu sen, nra sen-o, “Npugü lo Gideon genyu jenthon!”

²¹Anyugun nme me tse kensenbin hunpfüo a-bin ka sobin, lo shwikerüchün nyu rihü apentha nra-o kehü tinla.

²²Gideon temi jule anyugun shukhun kebin ka, Npugü le shwikerüchünnyu rihü dan no jenthon sen khinyunyu whe so. Anyugun le tin-o Zarethan denzin Bethshittah keti lo Tabbath khoki Abel Meholah keti güla.

²³Tsüselo Naftali, Asher lo Manasseh tsipwen kenyhun nren ka temi koshüo anyugun le ryü Midiannyu hü.

²⁴Gideon le lilo nipe Efraim rincho aphu shüo, “Nsheryü Midiannyu galo. Jordan züri lo Bethbarah rinyu keti Midiannyu no pfüthü tinla mvu nrün genyu, khinlo.” Tson-o Efraim temi ko kequen shüo anyugun le Jordan züri lo Bethbarah rinyu keti khinlo.

²⁵Anyugun le Midiannyu raja mihvu Oreb lo Zeeb tenlo; Oreb tsonye ki Oreb dushvula, lo Zeeb vainsha kethun bin ka Zeeb dushvula. Anyugun le Midian nyu hü, lo Oreb lo Zeeb au pe thü sen-o Jordan nphozin ryü Gideon kishü.