Read Southern Rengma Naga KERATHÜ 8 Bible Online

KERATHÜ 8 - Southern Rengma Naga bible

KERATHÜ 8

¹Efraim temi dan le Gideon ka zoshü, “Nyuthyüo hagun le Midiannyu zen kega gü kethyü ka agun koshümvu la?” Anyugun le tsügenyu kenya sala.

²Ai a-le zoshü, “Ale nyuthyü logwa yo tsü pe hagun le nyu thyü shüyo thame kendyü keloimvu. Hagun Efraim temi dan le tha keshanyu thyü keshü tsü le apfüphun apentha le thyükeshünye chonle.

³Sunggigü kekvu ka hagun le Midiannyu raja mihvu Oreb lo Zeeb au dushvulo. Tsü zenkendyü shülo a we nyuthyü lo ola?” A-le johi zokeshü ka, anyugun nyun ntasa mvula.

⁴Gideon le a-temi tsishen zen Jordan ka ryü tsü pfüthü tinla. Anyugun hokelisa la, ai shwikerüchün nyu hübin zun.

⁵Anyugun le Sukkoth nyu ryü kelo ka, a-le rünyi tsünyu temi dan ka, “Hagun cheno-e tensü peha pe atemi dan tsü shülo. Anyugun le hokeli laso, lo ale Midian nyu raja Zebah lo Zalmunna au hü bin nyo,” tsonshü.

⁶Ai Sukkoth nyu sharhi dan le zoshü, “Nyuthyü agun le ketyü ketsü pe nrihü dan tsümon? Hagun le Zebah lo Zalmunna au ten lo kemvu zunle,” tsonla.

⁷Tsüselo Gideon le zoshü, “Gwasa! Npugü le Zebah lo Zalmunna au pe aben nyu shü lalo, ale tehenyu hüron lo tsehü khipe hagun vüshü ti!”

⁸Gideon le Penuel ka güo, tsü kenme tse temi dan ka hishü, ai Penuel temi dan ko Sukkoth nyu jo hontse zo la.

⁹Tsügenyu a-le anyugun ka zoshü, “Ale gwa bin-o rani ryü lo ale hagun chwida borho lati!”

¹⁰Zebah lo Zalmunna au le rihü zen-o Karkor kabin. Nphozin rihü dan apentha le 15,000 nti le bin gwenzinla; shüpahü 120,000 le sila so.

¹¹Gideon le Nobah lo Jogbehah nphozin, kazü kesi te tson gü then güo rihü dan le shamvu kebin ka whe.

¹²Midian nyu raja Zebah lo Zalmunna au le tinla, ai a-le au hü gü ten lola, lo au rihü apentha kejenkejvü la.

¹³Gideon le terinyu ranio Heres kazükenchon tson ryü kejü,

¹⁴ka a-le Sukkoth nyu selo nme tenlo-o a-ketsoshü. Selo gü le Sukkoth nyu sharhi temi hentsenyüo tsenyü zan thu pe Gideon tsüshü.

¹⁵Tsüselo Gideon le gü Sukkoth temi dan ka zoshü, “Hagun le dicheka akeche mvule tse layo rüchün shü? Hagun le ale Zebah lo Zalmunna tenlo kemvu ka, ketyüketsü nme pe hokeli kebin arihü dan tsü kemvui tse zola. Au le hika kebin re!”

¹⁶Tsonshüo a-le tehennyu hüron lo tsehü pe Sukkoth nyu sharhi ju senthyüshü.

¹⁷A-le Penuel nyu chwida ko borho la lo nyida tsünyu temi dan dushvula.

¹⁸Tson-o Gideon le Zebah lo Zalmunna au ka, “Hai le Tabor ka dushvu kela tsüle dihontse kethyü nyu la?” tse ketsoshü. Au le a-jokenio, “Anyugun shwikeshü le nhontse-- anyugun aphu raja nyu nyu hontse le.”

¹⁹Gideon le zoshü, “Anyugun le asikezen nyu, ajvü nyukenyu le. Ale swe-o zo bin nyo, hai le anyugun dushvu mvulo ale hai dushvu mvu nrün.”

²⁰Tsonshüo a-le anyuri gü Jether ka, “Gü au dushvu lalo!” Ai Ponyu gü le a-jensütho mvuo, kesedun la, a-le ntsenyu zun genyu.

²¹Tsüselo Zebnah lo Zalmunna au le Gideon ka, “N npvü ryü ayi dushvu lata. Püshünyu le püshünyu thothyü hü nyo.” Tson-o Gideon le au dushvu la, lo au ut gunda ka tyüdan khilo la.

²²Tsüsiki Israel nyu le Gideon ka zoshü, “Nle agun so gon lo, nle lo siki ntsipwen-e no. Nle Midiannyu ben nyu agun kenishü laso.”

²³Gideon le anyugun jokenishü, “Ale, nmvue anyu no hagun so gon loho. Npugü le hagun so kegon gü thyüti.

²⁴Ai a-le zo-o, ano tha nme hagun ka hi ta. Hagun aphu hagun le nye khi kelo pe atsülo.” (Midiannyu le nphozin temi kecha dan hontse suna nye ra hü.)

²⁵Temi dan le zo, “Agun sherhün satse tsü pe ntsüti.” Anyugun le phi nme pe la shüo anyugun aphu a-le khikelo nye tsüpe tsünyu shüshü.

²⁶Gideon le hyukelo suna nyedan kensu le kilogram nki pen kesa, hile ronye, tyü, lo Midiannyu raja ju le ben kehü phikemeren nmvue anyugun ut dan gunda kehun dan sin mvu.

²⁷Gideon le suna tsüpe teromen nme thyüpe a-rünyi Ophrah nyu shü. Israel nyu aphu Sunggigü khelao gü teromen gü rüshvu tinla. Tsüle Gideon lo a-kami nyu genyu chwa nme thyüla.

²⁸Tson-o Israel nyu le Midiannyu sokvula-o kenshvu binsin mvula. Gideon le sila kemvuthen kazü gü le bwenye tse chen henzi binlo.

²⁹Gideon le a-ka ki rani gü tsünyu yhun hü.

³⁰A-le a-nu kechon kebin genyu anyu peche le hentsenyü le bin.

³¹A-le Shechem nyu tenu nme le bin: tsügi le peche nme nnyu shü, lo a-le a-zan pe Abimelech tholo.

³²Joash nyugü Gideon le then sao si, lo a-lope Abiezer pfüphun rünyi Ophrah nyu a-pvü Joash sika nyu sunla.

³³Gideon kesi siki Israel nyu le Sunggigü khelao rani gü Baal rüshvu tinla. Anyugun le Baal zen kejozen-o pe anyu tero gü thyülo,

³⁴lo anyugun hun kebin shwikerüchün ben nyu anyu kenikeshü Npugü anyugun Sunggigü lothyü mvula.

³⁵Lo anyugun le Gideon le Israel nyu genyu tha kegwathyü keshü aphu genyu a-kami chen keno-e ndila.