Read Southern Rengma Naga KERATHÜ 9 Bible Online

KERATHÜ 9 - Southern Rengma Naga bible

KERATHÜ 9

¹Gideon nyugü Abimelech le Shechem kigü, tsünyu a-jvü shvunye aphu bin hü, lo a-le anyugun ka,

²anyugun no Shechen temi ka, “Digü le hagun kendo tila? Gideon nyu peche hentsenyü no tile temi nme no mon? Rüchünshü Abimelech le hagun thyüzi le.”

³A-jvü shvunye jule hi rüla zope Shechem nyu zenshü, tsontsin Abimelech le anyugun shvunye genyu Shechem nyu le Abimelech sithen titse rhilo.

⁴Anyugun le Baal zen kejozenkelo kerüshvu ka nyu rakagi hentsenyü pe a-tsü, lo a-le pisa tsüpe temi basü dan me jonshe pe a-sithen lo.

⁵A-le apvü ka Ophrah ki gü, tso nme soge a-pvü Gideon nyu, a tsasikezen peche hen tsenyü dushvula. Ai Gideon nyupin gü Jotham le kebu tinlao dushvu lomvula.

⁶Tsüselo Shechem lo Bethmillo temi aphu Shechem ka teshobin kenshün gü ka gü Abimelech pe anyugun raja thyülo.

⁷Jotham le tsü rüla nyülo njüo Gerizim kazüthun sun ge kü gü sen-o anyugun ka, “Hagun Shechem temi, Akhwenyü lo, lo Sunggigü no hagun khwenyü lo nda!

⁸Gwengwa me senbin dan le anyugun npvü anyu raja kejü titse kekhwenlo. Anyugun le Oliv bin ka, ‘Nle agun raja thyülo,’ tson.

⁹Oliv bin le zonishü, ‘Hagun so gon tiya tselo, sen-o teronyu nmvue temi-e rühvu kehü aterzü khishü lomvu kelai le,’ tsonla.

¹⁰Tsüselo senbin dan le Kherobin ka, ‘Nle ryü agun raja thyülo,’ tson.

¹¹Ai kherobin le zonishü, ‘Hagun so gon tiya tselo, ale asha keyüh kegwa khishü lomvu kelai le,’ tsonla.

¹²Tsüselo senbin dan le vain bin ka, ‘Nle ryü agun raja thyülo,’ tson.

¹³Ai vainbin le zonishü, ‘Hagun so gon tiyatselo, teronyu lo temi-e a-kenyü kehü avainzu khishü lomvu kelai le,’ tsonla.

¹⁴Tsügenyu senbin aphu, tsehüphun ka, ‘Nle ryü agun raja thyülo,’ tson.

¹⁵Tsehüphun güle zonishü, ‘Hagun le ano hagun raja thyünyü ketsin yatselo, ryü akengü ka techwen lota. Hagun le nmvu yatselo a tsehüphun nyu mah le nnyü chwiryü Lebanon nyu Sedar bin dan ro lati.’

¹⁶“Tsügenyu ntsoka, hagun le kenjü lo ketsin nyu Abimelech pe raja thyü bin nle? Hagun le Gideon tho kegwa dan rüchün-o a-rühvu lo a-kami ge thyükezü thyü bin nle?

¹⁷Apvü le hagun genyu teri kethyü tsü rüchün shüta. A-le a-phu tepen mvutse Midiannyu ben nyu hagun kenishü.

¹⁸Ai nthu hagun le rani ryü apvü kami ntsunla. Hagun le a-gogi nyugü Abimelech le hagun shvunye genyu pe Shechem nyu raja thyülo-o tso nme so ge apvü nyu peche hentsenyü dushvu laso.

¹⁹Tsügenyu nthu hagun le Gideon lo a-kami ge thyükeshü hile ketsin lo kenjü nyu yatselo hagun no Abimelech ge hagun kenyü lo a-no hagun ge a-kenyü tse lota.

²⁰Ai nmvuyatselo, mah no Abimelech ge chwiryüo Shechem lo Bethmillo temi ro lalo. Mah no Shechem lo Bethmillo temi ge chwiryü Abimelech ko rola lo.”

²¹Tsonshüo Jotham le asikezen gü Abimelech kenshvu genyu tin gü Beer ki yhun tin la.

²²Abimelech le chen shen Israel nyu so gon.

²³Sunggigü le Abimelech lo Shechem nyu thyü pe no kenrhi shü, tson-o anyugun le a-ntsun so.

²⁴Shechem temi dan le Abimelech thyü kepeche pe no Gideon nyu peche hentsenyü dushvu kela kemu kethun nrün genyu hihontsela.

²⁵Shechem temi le me no kazüthun sun ki kebuo Abimelech tsonkhweo tsü nken kegünyu aphu hon selo la. Lo hi rüla pe Abimelech ka zoshü.

²⁶Tson-o Ebed nyugü Gaal le a tsasikezen nyu zen Shechem ka ryü, lo Shechem nyu le atenyen ngwa la.

²⁷Tsüselo anyu aphu anyu vainlow ki tsügü vainsha lü pfüryü zu thu lo-o nga nme thyü. Anyugun le anyu tero kerüshvu kanyu yügü tyütsüo Abimelech keta jozo.

²⁸Gaal le zoshü, “Ngun Shechem nyu hile temi nyutse kethyü la? Nyugenyu ngun le Abimelech lothyü bin nla? A-le segü ola? Gideon nyugü! Zebul le a-ka ahza khilo, ai ngun le nyu thyüo a-lothyü bin mon? Hagun pfüphun fü keshü hagun bon Hamor thenlo!

²⁹Ale temi hidan sharhi thyübin ya tse kethyü we! Ale Abimelech khe lati! A-le a-ka, ‘Nrihü thyü nko lo-o, ryü kega tile tseti!’ ”

³⁰Nyida tsünyu keda gü Zebul le Gaal jotsü nyü lo-o a-nyun ntala.

³¹A-le lilo nipe Arumah ki Abimelech kishüo a-ka, “Ebed nyugü Gaal lo a tsasikezen ju le Shechem kiryüo n no nyida günyu ryümvu le tse bin nle.

³²Tsügenyu nle ntemi zen-o khejenyu low ki kebu tseo.

³³Sendu ki yhüko chwiryü lo gwen tse nyida gü whelo. Tson-o Gaal lo a-temi dan le n ntsun ryülo, thyülo kegwa then a-nyugun nkhün lalo!”

³⁴Tsüselo Abimelech lo a-temi dan aphu kheje nyu chwigü dan zi thyüo kebu bin.

³⁵Abimelech lo a-temi dan le Gaal le chwi ryü khinrun ka so kebin hyu shüo, anyugun kebu bin nyu chwi ryü.

³⁶Gaal le anyugun hyushüo Zebul ka zoshü, “Shwishü!” Zebul le zonio, “Tsüle temi kemvu.” “Tsüle kazüthun ge kengü gwenzin le.”

³⁷Gaal le zonishü, “Shwishü! Temi le kazüthun zun ki tsen ryü jü lo dan me le temvü kehü gü teshobin ki tsonda then ryü jü nle!”

³⁸Zebul le a-ka zoshü, “Nle zokeda zokehü le ntsoka we nyu thyüla sela? Nle ngun nyuthyüo Abimelech lothyü tila tse ketso kehü güle. Hidan hile nle ta kehü temi dan laso. Gü zen kega gwenlo.”

³⁹Gaal le Shechem temi zen chwigü Abimelech zen kega.

⁴⁰Abimelech le Gaal hü pe shwela. Nyida gü khinrun ka temi kechon le jünla.

⁴¹Abimelech le Arumah ka bin lo Zebul le Shechem nyu Gaal lo a tsasikezen nyu hüla, tson-o anyugun le tsünyu bin lomvula.

⁴²Tsüsinyü Shechem temi le low ki tsüti tse rhi kebin Abimelech le sha lola.

⁴³Tson-o a-le temi kenjün pe jüshen thyüo low nyu kebuo khwebin. Tsüka anyugun le nyida gü nyu chwikeryü hyulo-o a-le anyugun dushvula.

⁴⁴Abimelech lo a-logwa le nmhen ryü nyida gü khinrun khwelo, lo a-dan kecha hvu le low nyu temi aphu dushvula.

⁴⁵Jongwen kega. Abimelech le nyida gü lolo njüo temi dan dushvula, tsü boren la-o tsi pe tsünyu kezen shüla.

⁴⁶Shechem chwida ka kebin sharhi nyu aphu hi rüla nyüshüo Baal zenkejozen kelo kerüshvu ka günyu yü küla.

⁴⁷Anyugun le tsünyu kequen kebin Abimelech ka zoshü,

⁴⁸tsügenyu a-le a-temi dan zen Zalmon kazüthun ge kü. A-le tsüka nri nme khi pe senro nme thü pe a-bu ge shü lo- lo a-temi dan kono a-hontse thyü whü lolo tseshü.

⁴⁹Tson-o anyugun aphu sen nmeme thü sen Abimelech sithen ryü khünpvü gü khwen khin la. Tson-o temi dan le anyuki bin lo anyugun le tsü roshüo tsüka kebin peche tenu kesin temi yieme kho roshvula.

⁵⁰Tsüselo Abimelech le Thebez ka gü nyida tsügü hunpfü lo njüo lolo la.

⁵¹Nyida tsünyü tsokhwe kenko nme le bin, tsü genyu nyida tsünyu peche-tenu aphu sharhinyu sin-o tsünyu kehü yügü kakhin lo njüo ka soki küla.

⁵²Abimelech le ryü tsokhwe tsügü whe-o a-le kakhin ka gü mah pe tsü robin.

⁵³Ai tenu nyu nme le kekerütso nme shwe pe a-pe jon renla.

⁵⁴Tsüselo a-le whütse a-teri kanyü pfü kehü ponyu nme ka zo shüo, “Njenthon pe adushvu lalo. Ale me no tenunyu nme le aboshvu la letse zonyü mvule.” Tson-o ponyu gü le a-jenshvula.

⁵⁵Israel nyu le Abimelech le sikela hyu shüo ka ki gunla.

⁵⁶Hihontse Sunggigü le Abimelech le a-tsasikezen nyu hentsenyü dushvuo a-pvü ge kemu thyü kela chün thyüshü.

⁵⁷Sunggigü le Shechem nyu kono anyugun serikemvu genyu kenjün thyü shü, Gideon nyugü Jotham le shochün pe anyugun ketsü ka kezo hontse.