Read Southern Rengma Naga 2 JOHAN 1 Bible Online

2 JOHAN 1 - Southern Rengma Naga bible

2 JOHAN 1

¹Peshü gü le khipe Sunggigü le kejülo kela gi, lo a-nyenyu ju, ale ketsin so kehü, lo a npfü mvule ketsin gü sha kehü nyu aphu so kehü dan tsü shüle.

²Kechamvule nnyu nyu bin kela lo kethonthen nzen zin hü nrün ketsin gü genyu le.

³Pvügü Sunggigü lo Pvügü nyugü Jisu Khrista kanyu keso, shwikenjün lo nyu kebwen gü no ketsin lo kesonyu ngun zen bin loti.

⁴Pvügü le johokeshü hontse ale anyenyu ju peha le ketsin günyu yhun kehü hyulo-o akenyü sa bin nyo.

⁵Lo ntsoka we tenugi, ale nka hishü kebin gü le johokeshü keshün nme mvule ngun le sokeri kanyu hyulo kela, nle khinyunyu solo mvulo keshvu jo thu keshü le.

⁶Lo nle a-johokeshü dan zen kethyü hile keso le. Hagun le sokeri kanyu nyülo kela higü hile: keso nyu yhunlo lo tse kethyü higü hile.

⁷Kechamvule mesa kehü kechon le chwiryüo kazü nyu hükela genyu. Tsüdan le Jisu Khrista le thyümin thyü pfü ryü le tse kethyü zoshwi hümvu. Tsüle mesa kehü lo Khrista zen kenrhi kehü gü le.

⁸Hagun le thyü kebin gü nmhenla mvule hagun chün hyu penlo nrün genyu hagun petsü sa binlo nye.

⁹Temi lihigüe Khrista senkethyü jo gü nyu bin mvuo nkenchwila kehü nyu le Sunggigü le a-ge ndi; temi lihigüe senkethyü jo gü nyu bin kehü nyu le Pvügü ko lo Nyugü ko bin nyo.

¹⁰Keshanyu laka temi peha le senkethyü jo higü hi sen mvuo hagun ka ryü yatselo, a-zen hagun kaki gun nya; lo a-kelu-e nya nye.

¹¹Kechamvule temi lihigüe a-kelu kehü nyu le a-zen-o a-tho gwakemvu dan kerhün kethyü genyu.

¹²Ale tha kechon thu keshüi le bin nyo, ai ale lesü lo lesü zü sen nyü mvu, n gun kenyü penlo nrün genyu ale ryüo kehyuo mhuntsun kenthon kethyü rüchün bin nyo.

¹³Kejükelo nsikezen gi nyenyu jule n kelushü le.