Read Southern Rengma Naga 3 JOHAN 1 Bible Online

3 JOHAN 1 - Southern Rengma Naga bible

3 JOHAN 1

¹Peshü gü le khipe ale ketsin nyu so kehü akeso gü Gaya tsü shüle.

²A keso gü nkapu le gwa kebin hontse tha aphu nyu gwa gunlo lo nno nphu sherhün binlo nrün genyu ale ngenyu hibin hünyo.

³Kechamvule npfünyu peha le ryüo nle ketsin gü nyu yhun bin kehü hontse n ketsin kethyü rüla zo keshü ale asherhün sale.

⁴A nyenyu jule ketsin günyu yhun bin nle tse kethyü nyü kelo nyeki a kekenyü keda ndile.

⁵A keso gü, nle npfünyu ge lo tesin ge-e tha lihi ai ketsin thyüo thyü shü hünyo.

⁶Anyugun le kehun mhundyü nyu nkeso rüla zoshü. Nle a-lothyü kehü gü Sunggigü kenyü nyu thathyü kezü dan thyüo anyugun kenjwen tson nyu anyugun keche shü nye.

⁷Kechamvule anyugun le tenyen kemvu juka thame khilo mvuo zan tsügü genyu chwila kethyü genyu.

⁸Tsügenyu nle kengüo ketsin gü genyu thatho thyü kehü nyu thyülo nrün genyu temi tsü hontse kehünyu keche shü zü.

⁹Ale tha thu pe kehun tsüshü ai anyugun dan nyu sharhi thyünyü kehü Diotrefes le ale nyu zo bin yo nyü shü mvule.

¹⁰Tsügenyu ale ryü lo ale nyuthyü bin yo, a-le age jo gwakemvu zo-o a nkhin kebin dan tsü zoni shü tile. Lo tsüntimvule a-le npfünyu ju-e zenlo mvule tsela, lo zenlo titse kehünyu khin hünyo lo kehun nyu tsüdan zan khishwi la hünyo.

¹¹Akeso gü, gwakemvu sithen nya ai kegwa gü sithen lo. Thatho kegwa thyü kehü gü le Sunggigü kanyu; temi lihigüe gwakemvu thyü kehü gü le Sunggigü hyu mvu zun.

¹²Demetrias le temi aphu a-kegwa zo hünyo, lo ketsin güe a-jünzo hünyo; lo ale jün kezo le ketsin tse kethyü nko sha bin nyo.

¹³Ale tha kechon pe nka kezoi le bin nyo, ai ale penshün lo kethuzü sen-o thu pe ntsü nyümvu.

¹⁴Ale nshwe ryüo nzen kehyuo mhuntsun nhin kenthon titse rüchün bin nyo.

¹⁵Nyu kebwen güno nzen binlo. Npfünyu ju le nkelushü le. N pfünyu ju nmeme tse kelu küshü le nye.