Read Southern Rengma Naga JUDA 1 Bible Online

JUDA 1 - Southern Rengma Naga bible

JUDA 1

¹Jisu Khrista gogü lo Jakob sikezen gü Juda le khipe kolo kela dan, Sunggigü so kepvü lo Jisu Khrista le ntsen sen kehü dan tsü shü le.

²Shwikenjün, nyun kebwen lo keso no hagun kesü kela thyükelo gü thyü lo.

³A keso ju, agun aphu kenikelo rüla thu pe hagun ka shü nyü keso ka, ale thu pe hagun thukeyhun shüo hagun no gwüngwa nme khipe kenshün nyu ju tsü shü kela ketenyen gü genyu kenren binlo mvulo keshvu rüchünlo.

⁴Kechamvule himhundyü kinyu nmu pe bin kela temi peha le kebuo shamvu tse hagun dan nyu yüryü kelasi genyu. Tsüdan le ketsin rüchün hü kemvu, Sunggigü kanyu chwikeryü shwikenjün gü keli pe yhun ntsen serikemvu nyu shü, lo a-le ngun so keda thyü titse, lo Npugü Jisu Khrista zan zoshwi hümvu.

⁵Lo hagun le sha kü bin nyo, ai ale hagun no nduka Npugü le Ijipt kazü nyu temi dan me keni zen chwiryüo tsüsiki tenyen kemvu ju nke kela tsü rüchün nishü nye.

⁶Lo tsangge jolonyu ju me ko anyugun npvü anyu bin khoto nyu bin mvuo anyugun kebin bin gü khe kela genyu, a-le tsüdan khipe kezün gü nyu kethonthen phin pe ketso nrün tsangkeben jon kedagü khwen bin laso.

⁷Tsühontse Sodom lo Gomora rünyi ko lo tsühvu kehun rünyi dan-e tse keyüla tho thyü lo temi jvü rüla kemvu serikemvu tho dan thyü tinla, tsügenyu kethonthen mah nyu shaja kethyü hyulo-o tsinhi nme thyü pe bin laso.

⁸A-min ki tha nshün kemvu nmin kehü temi hidan hiko tsühontse anyugun npvü anyugun thyümin bo nrhu lo kekvu kesen nyu khwe nyü mvu, lo zankechwi kethyü jue shwinyü tse hünyo.

⁹Ai tsangge jolo kedagü Mikail le Mosa min rüla genyu tero serikemvu gü zen kega-o kenyi keso ka a-kenshwe jo zo-o a-nmu nshvuo a-ka, “Npugü le nrho ti,” tse zo.

¹⁰Ai temi hidan hile tha anyugun le shakemvu dan-e shwinyü hünyo, lo tha rüchün kekholo hü kemvu thyü dan hontse a-npvü a-nyun nyu shahü, ai tha tsüdan tsü nyu nkela hünyo.

¹¹Tsüdan we thyülo tiso! Kechamvule anyugun le Kain tson nyu tsonchü, lo kechwi hyulo nrün genyu tin sen-o Balam thyüzü kela kipon gü, lo Korah hontse me khwe nyü mvuo nkela kethyü genyu.

¹²Temi hidan hile hagun le shwikenjün keho ka hagun zen-o ho kethyü nyu tha gwün nrhu kehü dan, anyugun le nshvu mvu tse anyugun gin fütyü kehü dan, tsangkenbu no whün sen kehü tsangrishü hü kemvu nmhu dan me; kenda ki a-sha kendi, kesi siki-e sini kela a-men nla kela sanbin hontse kethyü dan me.

¹³Züda kethyü hontse anyugun kejo kemvu tho dan ketyü shwishü hünyo, anyugun le hozinkehü shyenyü hontse kethyü, Sunggigü le kethonthen kezün kentsun bin nme nda pe khwenbin kela dan me.

¹⁴Lo tsüdan rüla Adam ge yhun keryü phou tsenyü gü ka Inok le sidyükesha jo zo-o, “Hire, Npugü le a-temi kenshün ju yie tseryü zen ryü;

¹⁵tson-o a-le tsüdan aphu jün kera ti, lo anyugun le ketsin rüchün kemvu tho thyü kela, anyugun le ketsin rüchün kemvu tho aphu rüla ketsin rüchün kemvu temi dan, lo ketsin rüchün hü kemvu kemu nyu dan le a-ge jo ketsen zo kela dan kemu tsin pe hiti.

¹⁶Temi hidan hile kebükerü kehü, lo kenyon zin kehü dan me, anyugun le anyugun thyümin kenyü yhüdyü then kehü dan le; anyugun le ketekho jo zo bin hünyo, ai me kerühvu rothyüo anyugun kechwi gü fü kehü gwünzin.

¹⁷Ai a kesonyu ju, hagun we Npugü Jisu Khrista apostel dan le kezo jo dan rüchünlo mvulo shvu.

¹⁸Tsüdan le hagun ka kezo le, “Kekhin gwünki me shwinyü kehü, a-npvü a-thyümin kenyü yhüdyü thyü kehü temi dan me le soryü ti,” tse kethyü zo.

¹⁹Temi tsüdan tsüle me pvükho kehü, kazü gü rüla rüchün kehü a-me kapu gü ndi le.

²⁰Ai hagun a kesonyu ju, hagun ketenyen kenshün tsin gü soge gwakenye külo; Kenshün Kapu gü nyu kehi thyü binlo,

²¹hagun npvü hagun khipe Sunggigü keso gü nyu bin lo; lo kethonthen kerhün hyulo nrün genyu Npugü Jisu Khrista shwikenjün gü khwen binlo.

²²Lo peha le kenyun hvu kebin nyu dan tsü shwinjün lo.

²³Lo mah nyu nlo lo-o tsünyu kenilo; lo thyümin le nrhu kela phinya dan tsü ntsü bin nsen nshvuo peha shwinjünlo.

²⁴Tsüselo hagun le chela lo kegwa nyu hagun ntsen zen binlo kegwa gü, lo a-zankechwi thyü nrün gü mhundyü nyu hagun no shekerhün thyüo rhu mvu binlo nrün gü-

²⁵ngun Npugü Jisu Khrista genyu, nkenikelo le a-nti, lo n Sunggigü kethyü gü no tha aphu mhundyü ntsoka-e lo kethonthen zankechwi, kegon, keda, lo kekvu gü thyülo. Amen.