Read Southern Rengma Naga TESHAKESHÜ 1 Bible Online

TESHAKESHÜ 1 - Southern Rengma Naga bible

TESHAKESHÜ 1

¹Jisu Khrista kanyu teshakeshü, Sunggigü le a-no nshwe thyüla nrün dan pe a-gonyu dan tesha shü lotse kethyü genyu khipe a-tsü keshü; lo a-le a-jolonyu nishüo no zope a-gogü Johan hikeshü,

²a-le Sunggigü jo lo Jisu Khrista jün kezo kesha kehyu dan jünzo shü.

³Ligühigüe swü kethyü nyu, lo ligühigüe sidyükesha jo hidan nyü kethyü nyu, lo tsü nyu thu pe bin kenjü dan thyü zen kehünyu le a-henkegwa nyu; kechamvule a-gwünkho gü le a-kho nni kela genyu.

⁴Johan le pe Asia nyu kehun tsenyü dan tsü keshü: Ntsoka kehü gü lo nduka kehü gü lo hisiki ryü nrün gü kanyu lo a-raja bin mhundyü nyu bin kehü Kapu tsenyü dan ka,

⁵lo kazü nyu raja dan so kekvu gü, lo kesinyu dan nyu nnyulo kerigü, jo ketsin jün kezo gü Jisu Khrista kanyu shwikenjün lo nyun kebwen gü no hagun ge ryü kelo gü thyü lota. Nso kehü gü, lo a-zi pe kemunyu nsülo kelagü,

⁶lo a-le nthyü pe nno raja kazü lo peshükeda ju thyüo Pvügü lo a-Sunggigü lothyü kelo gü, a-no kethonthen zankechwi lo kekvutsin gü thyülo lo! Amen.

⁷Hire, a-le nmhu dan zen ryü zhü nyo, lo yhütyü aphu a-hyu ti lo a-jen keshü dan aphu a-hyu ti; lo kazü nyu kebin temi tsipwen aphu a-hyuo chü ti, tsühontse ti! Amen

⁸Npugü Sunggigü le zo, “Ale Alfa lo Omega le,” ntsoka kehü gü lo nduka kehü gü lo siki ryü nrün kekvutsin gü le.

⁹Ale Johan hagun pvügü, Jisu zen-o kenjün kethyü nyu lo keda kethyü lo nyhenhi kethyü nyu nme thyü kehü gü, Sunggigü jo lo Khrista jün kezo genyu Patmos tsekethyü zükehun kazü nme nyu bin hünyo.

¹⁰Ale Npugü jon nyü kapu nyu bin ketse ka asi kipon shu kekhun khwen hontse thakhwen ketetso nme nyülo.

¹¹Tsügü le, “Nle nyu hyu yo pe lesü nme nyu thulo-o nipe kehun, tsenyü dan, Efesa, lo Smirna, lo Pergama, lo Thiatira, lo Sardia, lo Filadelfia lo Laodikia ka shü shülo,” tsonshü.

¹²Tsontsin ale rani gü a nthon kebin khwen gü nrishü titseo rani keshü ka suna makemben bin tsenyü hyu,

¹³lo makemben bin dan janyu temi nyu nme hontse hyu, a-phi le tsügü a-pha ti, lo suna senkephin nme pe a-gün khinpvü hü.

¹⁴A-pe lo a-pehü le chon pe thyühü kechon hontse, lo khütso hontse; lo a-yhütyü le nnyü pe mahyi hontse;

¹⁵lo a-pha le lazogi pe mah nyu ro nhon kenjü hontse, lo a-khwen le züda khwen hontse.

¹⁶Lo a-ben njüzin shyenyü tsenyü sen hü, lo a-mün nyu zhethon yi kepen kethyü nme le chwiryü, lo a-mhun le tsangkenyü kethyü luka yhüko hontse.

¹⁷Tson-o ale a-hyu shü ntsin kesinyu nme hontse a-pha ka chetsü la. Tsontsin a-le a-ben njüzin pe akesü-o, “Nshvu nyalo! Ale kerigü lo kekhin gü le.

¹⁸Lo ale rhünzin bin kehü gü le! Ale sila, lo hire, ntsoka we ale kethonthen rhün tinla so, lo ale Kesi lo Hades chabin dan sen hünyo.

¹⁹Tsügenyu nle kehyu dan, ntsoka kebin dan, lo hisiki ryü nrün dan thulo chi.

²⁰Aben njüzin nle kehyu shyenyü tsenyü dan lo suna makemben tsenyü dan kebu kenjü jo kentsun kon gü le hihontse: Shyenyü tsenyü ju le jolo dan lo makemben bin tsenyü dan tsüle kehun tsenyü dan le.