Read Southern Rengma Naga TESHAKESHÜ 10 Bible Online

TESHAKESHÜ 10 - Southern Rengma Naga bible

TESHAKESHÜ 10

¹Tsüsika tsangge jolonyu kekvu nme le, nmhu lope a-je pvü, lo a-pe ge zengo no hunpvü lo a-mhun le yhüko hontse, lo a-pha le mah kachon hontse tsangge tsüryü kejü ale hyu.

²Lo a-le a-ben nyu lesü sü keshe nme hie sen hü. A-le a-pha njüzin lope züda nyu lo ngwazin lope kazü ge tsu bin.

³Lo a-le shünyho khwen hontse nra sen shü. Tson-o a-le nra sen shü ntsin tsangkesen tsenyü dan le jozo shü.

⁴Lo tsangkesen tsenyü dan le jo zoshü ntsin ale thulo titse so; ai ale tsangge thakhwen nme nyü kelo le, “Tsangkesen tsenyü le thazo keshü dan mehor vüla lo, lo tsü thu nyalo,” tson zoshü.

⁵Lo züda nyu lo kazü so ge so kebin ale kehyu jologü le a-ben njüzin shwe pe tsang kipon shüo,

⁶tsang, kazü lo zü keda lo tsünyu kebin aphu nyhun keshü gü lo kethonthen rhün bin kehü gü zan sen-o swe-o kezo le, “Kenye sinshü loho so! tson.

⁷Ai tsangge jolo tsenyü gü le a-shu khun shülo, tsükatsü Sunggigü le kebu kenjü a-le a-gonyu ju sidyükeshanyu ju ka zo keshü dan thyü penlo ti.”

⁸Tsontsin ale tsangge thakhwen nyü kelogü le a nthon nio aka, “Nle gü zü keda lo kazü so so kebin gü ben nyulesü sü hie senkebin gü khilo lo.”

⁹Tsügenyu ale jologü ki gü a-no lesü sü keshe gü lope atsü lo tse zoshü; tsontsin a-le aka, “Khilo, lo tyülo; tsüle nginda nyu khü lati, ai nmün nyu we nnye pe khuzü hontse ti,” tson zoshü.

¹⁰Lo ale jologü ben nyu lesü sü keshe gü tsü khipe tyülo, lo tsüle amün nyu we nnye pe khuzü hontse, ai tyülo ntsin aginda nyu we khü la.

¹¹Tsontsin aka, “Nle temi, lo tsipwen, lo khwen jo, lo raja kechon rüla sidyü jo zoni mvulo shvu,” tse zo.