Read Southern Rengma Naga TESHAKESHÜ 11 Bible Online

TESHAKESHÜ 11 - Southern Rengma Naga bible

TESHAKESHÜ 11

¹Tsüselo teri tha kendo thün hontse kethyü nme khipe atsü shüo aka, “Nle sogü Sunggigü kershvuka gü, lo kershvubin gü ndolo, lo tsünyu rüshvu kehünyu swü shwilo.

²Ai kershvuka ngwen ki sin nya, lo ndo nya. Kechamvule tsü khipe rünyi kechanyu dan tsü kelasi genyu; lo anyugun le shye henzi kenyhun rünyi nyida kenshün gü kedü ti.

³Lo ale kekvu khipe a jünkezo minhvu tsü shü ti. Lo au le ronphi ben-o jon yie nme-e tsihvuo hentsero sidyükesha jo zoti.”

⁴Hihvu hile kazü Npugü mhundyü nyu so kehü oliv senbin hvu lo mahkemben hvu.

⁵Lo temi peha le au nthyü nnyü titse lo au mün nyu mah no chwiryüo au shwikerüchün nyu nkela ti; lo ligühigüe au nthyü nnyü nyü kehü nyu le tsühontseo siti.

⁶Lo au le sidyükesha jo zo kehü gwünkho ka tsangri mvu nrün genyu tsang khinla titse kethyü au kekvu le bin. Lo au le zü dan no tezi ngwala titse kethyü lo kenjün kethyü khvü lihie no kazü gü nthyü nnyü nyü yatselo thyülo kegwa au kekvu le bin.

⁷Lo au le au jünkezo gü tsü penla ntsin, tekhwün gü nyu chwikeryü thyü gü le au zen-o teri thyü ti, lo au nyeki kvula ti tson-o au dushvula ti.

⁸Tson-o au simin no rünyi nyida jo kendyü ki Sodom nmvue Ijipt letse ko kehü gü au Npugü khipe krus ge hü kela nyida gü tson nyu bin ti.

⁹Lo kazü temi aphu lo jat lo temi khwen lo tsipwen dan nyu jonshen-o peha kho au simin shwi bin ti, lo anyugun le au min pe sunla lotse shü loho.

¹⁰Tson-o kazü nyu keyhun nyu dan le au genyu anyugun kenyü sa lo shekerhün thyüo kenrun nyu tha khipe khinyunyu ketsü soti, sidyükesha tsühvu le kazü keyhun nyu dan nthyü nnyü kethyü genyu.

¹¹Lo jonshen-o peha siki Sunggigü kanyu kerhün teshye le ryüo au nyun nyu yülo ntsin au le au pha no rhun solo la, lo au kehyu nyu dan le nshvu sala.

¹²Tsontsin tsangge nra tetso kethyü nme le au ka, “Hiki küryülo,” tsekethyü khwen nme nyülo; lo au shwikerüchün nyu dan mhundyü nyu au le nmhu ge tsangge küla.

¹³Tsügwünkho katsü kazü nnu sala, lo rünyi nyida gü jün tseryü thyüo jünme le nrenla, tson-o kazü kenu tsügü le temi yie tseryü boshvula; lo a-sen dan le a-kerüshvulao tsangge Sunggigü shwenla.

¹⁴Che, tsekethyü kenyhungü le gü laso; lo hire, che thyü kenshen gü le whütse ryü jü nyo.

¹⁵Tsüselo tsangge jolo tsenyü gü le a-shu khun shü ntsin, tsangge nra tetso-o jo hidan zo, “Kazü nyu raja kethyü aphu ngun Npugü lo ngun Khrista hon thyü laso, lo a-le kethonthen keda thyü ti!”

¹⁶Tsontsin Sunggigü mhundyü nyu anyugun kedabin ge kebin pelü nki pezi dan le nkhün tsügü rüshvuo,

¹⁷hihontse zo, “Ntsoka kehü lo nduka kehü Npugü Sunggigü Kekvu tsingü! Nle nkekvu keda sen-o Raja thyü bin kela genyu agun le nshwen hünyo!

¹⁸Tsüselo temi dan le nthün la, kechamvule nnyu kekhü, lo kesinyu ketso nrün lo n go sidyükeshanyu dan lo kenshün nyu dan lo ntemi nshye nshvu kehü keshe-e kedae aphu chün thyü pe tsü nrün, lo kazü nke kehü dan nke nrün gwünkho le ryü kela genyu!” tson.

¹⁹Tsüselo tsangge Sunggigü kershvuka khinshye njü; tson-o kershvuka nyu kejozen kelo khingü hyu, lo tsangkekechwe, thakhwen, tsangkesen, kazü kennu, lo tegwün le tsünyu bin.