Read Southern Rengma Naga TESHAKESHÜ 12 Bible Online

TESHAKESHÜ 12 - Southern Rengma Naga bible

TESHAKESHÜ 12

¹Lo tsangge tha zansü keda nme le chwiryü. Tenunyu nme le yhüko khiben, lo shye kedü pen, lo keda perün shyenyü tseryü kenyhun le kebin nme le a-pe ge bin.

²Lo a-le nyuphou pvüo nnyu nrün genyu a-gin thyüo nra bin.

³Lo tsangge tha zansü kecha nme le chwiryü. Lo hire, Dragon kenhon keda a-pe tsenyü lo a-tse tseryü, lo a-pe dan ge keda perün tsenyü le kebin nme hyu.

⁴A-le a-ma pe tsangge shyenyü dan jünshen thyüo jünme süshye pe kazü nyu shüla. Lo Dragon tsügü le tenugi nnyu gü kejügi le nnyu shü yatselo a-nyugü tüntyü titseo a-mhundyü ka bin.

⁵Tsontsin tenunyu tsügi le pechenyu nme nnyulo, tsügü le tegi thün sen-o kazü aphu so gonti, Nyu tsügü zen-o Sunggigü lo a-Raja bin nyu gunla.

⁶Lo tenugi le jon yie nme-o tsihvuo hentsero anyugun no a-nucha nrün genyu Sunggigü le a-bin ndo kebin kazü kesi gü nyu gunla.

⁷Tson-o tsangge teri thyü. Mikael lo a-jolonyu ju le; Dragon gü zen kega, lo Dragon lo a-jolonyu ju ko teri thyü.

⁸Ai dragon nyeki kvulo la, tson-o dragon lo a-jolonyu jue tsangge anyugun no bin sinlo mvula.

⁹Lo dragon keda gü tsü hüla, lo tsüle peri whegü, kazü aphu sa kehü serikemvu kedagü lo satan letse kehü gü tsü lo a-jolonyu ju aphu pe a-sin-o shwen pe kazü nyu shüla.

¹⁰Tsontsin ale tsangge thakhwen ketetso nme nyü kelo le, “Tsüselo ntsoka we Kenikelo, lo Kekvu, lo Raja, le Sunggigü lo A-Khrista kekvu gü gwünkho laso; kechamvule tsangben tsangzün Sunggigü mhundyü nyu npvünyu dan nkhin kehü gü hü pe shwen kela si genyu.

¹¹Lo anyugun le Tanyü Nyugü zi genyu lo anyugun jünkezo jo gü genyu a-nyeki kvulo laso, lo anyugun le anyugun keyhun ai tepen mvu gungü kesi-e ti.

¹²Tsügenyu tsang dan lo tsünyu kebin ju hagun kenyülo, ai kazü gü we che! Satan le a-gwünkho rho kela shao a-nyun nta sa tse hagun ki nshye kelasi genyu.”

¹³Lo dragon gü tsüle a-hü pe kazü nyu shü kela shao pechenyu nme nnyu shü kela gi hü sola.

¹⁴Ai tenu tsügi no peri gü hyu kemvu bin ki chenshen-o peha a-nuchalo nrün genyu nye-o a-bin ki gunlo lotseo logi keda nme sekin kenyhun pe a-tsüla.

¹⁵Tsüselo peri gü le zü no tenugi chün sen tinla nrün genyu a-mün nyu züri hontse zü run shü.

¹⁶Ai kazü gü le tenugi cheo a-mün kvu shüo dragon mün nyu zü le chwikeryü tsü nyilo la.

¹⁷Tsontsin dragon le tenugi ge a-nyun nta sao gü tenugi tsipwen a-sen dan Sunggigü jo zen kehü ju lo Jisu le zokeshü dan thyü zenkehü ju zen kega sola.

¹⁸Lo dragon gütsü le züda se ge so bin.