Read Southern Rengma Naga TESHAKESHÜ 13 Bible Online

TESHAKESHÜ 13 - Southern Rengma Naga bible

TESHAKESHÜ 13

¹Tsüsika ale züda gü nyu tehenthyü nme le chwikeryü hyu. A-tse tseryü lo a-pe tsenyü, a-tse tseryü dan ge keda perün tseryü, lo a-pe ge zan serikemvu nme le bin.

²Lo ale tehenthyü kehyu gü tsüle teme hontse, a-pha le thyügwen pha hontse, lo a-mün le shünyho mün hontse. Dragon gü le a-kekvu, a-raja bin lo a-keda khipe a-tsü shü.

³A-pe dan nme le shwi pe dushvu nsen kela hontse, lo dushvu nsen kelagü tsü thyü ngwa shüla, lo kazü aphu a-dun thyüo tehenthyü gü sithen tinla.

⁴Dragon gü le kekvu khipe tehenthyü gü tsü kethyü genyu temi aphu a-rüshvu, lo anyugun le tehenthyü gü rüshvuo, “Segü le tehenthyü gü hontse tila? Lo segü le a-zen kega logwa tila?” tsonzo.

⁵Lo jo keda da lo Sunggigü kenkhin jo dan kezo mün pe tehenthyü gü tsüla, a-no shye henzi kenyhun tson bin lo tse kekvu pe a-tsüla.

⁶Tsontsin a-le Sunggigü, Sunggigü zan lo a-kebin bin, tsüntimvule tsangge kebin dan aphu swetsü so.

⁷Lo a-no kenshün nyu ju zen kega lotse, lo tsüdan so kvulo lo tse la. Tson-o senye kechacha kethyü aphu lo temi lo khwen jo lo tsipwen aphu so kekvu khipe a-tsüla.

⁸Tsontsin kazü thyü kelo mhundyü dushvu kela Tanyü Nyugü kerhüntsü lesü nyu a-zan thulo kemvu kazü nyu yhun kebin aphu a-rüshvu ti.

⁹“Temi ligühigüe a-nyetin le bin yatselo tsünyu no nyülo!

¹⁰Temi ligühigüe me ten pe dothyü yatselo a-le do nyu gunti. Temi ligühigüe zhethon pe me dushvu yatselo zhethon pe tsünyu dushvu mvulo shvu. Hinyu hi Kenshün nyu ju no nyhenhi kethyü lo ketenyen no binlo lotse hünyo.”

¹¹Lo tsüsiki ale kazü nyu tehenthyü kecha nme le chwikeryü hyu; lo tsüle tanyü nyu hontse a-tse kenyhun pvü lo dragon hontse jo zo.

¹²Lo tsüle tehenthyü kerigü mhundyü nyu a-kekvu aphu sen-o thathyü, a-le kazü lo tsünyu keyhun nyu no tehenthyü kerigü tejün pvüo thyü ngwa kelo gü rüshvu.

¹³Lo a-le ndun kethyü tho kedada thyü pe mehi, tson-o me mhundyü nyu tsangge mah ai no kazü nyu tsüryü.

¹⁴Lo tehenthyü gü mhundyü nyu a-no ndun kethyü tho thyü keshü dan genyu kazü so kebin dan sa pe no zhethon le a-jünlae rhün kelogü men zülo lotse zoshü.

¹⁵Lo tehenthyü gü rüshvu kemvunyu dushvula nrün genyu a-no kehen teshye pe tehenthyü gü ge shüo no jo zolo lotse shü.

¹⁶Tsüntimvule temi kedagüe keshegüe, kenya lo kendigüe lo donyue aphu no a-ben njüzin nmvue a-senpvü ka shazü kemvu kon nme thyüla.

¹⁷Tson-o tehenthyü gü zan nmvue a-number pvü kemvu we temi nme-e thahei nmvue thajwen lomvu la.

¹⁸Hile thakesha sen mvulo shvu bin nyo, thasha kekholo kehü gü no tehenthyü gü number swü shü, lo tsüle temi number laryü, tsügü le tsitsero-o hentsero-o tsero.