Read Southern Rengma Naga TESHAKESHÜ 14 Bible Online

TESHAKESHÜ 14 - Southern Rengma Naga bible

TESHAKESHÜ 14

¹Lo tsükatsü ale shwishü laryü, hire, Tanyü Nyugü le Sion kazüthun ge so bin, lo a-senpvü ge a-zan lo a-pvü zan thu kepvü temi yie tsio yie henzi pezi le a-zen hü.

²Lo ale tsangge züda kechon khwen hontse lo tsangkesen khwen ketetso hontse kethyü thakhwen nme nyülo. Lo ale nyü kelo khwen gü le baja kekhun nyu le a-baja dan khun kebin hontse.

³Lo anyugun le Raja bin gü mhundyü nyu lo nyukhu kerhün pezi dan lo pelü ju mhundyü nyu lü keshün nme thyü bin. Lo kazü nyu rhinhi kelo temi yie tsio yie henzi pezi nyeki kechanyu nme-e lü tsügü sha lomvu la.

⁴Hidan hile phusen kenshün dan le, anyugun le tenunyu zen-o anyugun thyü nrhula mvu. Lo hidan hile Tanyü Nyugü le lika hika güe a-sithen kehü dan. Hidan hile Sunggigü lo Tanyü Nyugü rasha keri hontseo temi dan nyu anyugun rhinhi kelo genyu.

⁵Lo anyugun mün nyu kenku nme-e hyulo mvu, ai anyugun le gwapen kethyü dan.

⁶Lo tsüsika ale tsangge jolonyu kecha nme le tsangne ki nye kehü hyu, a-le kethonthen bin kehü jolokegwa nme pe kazü nyu yhun kebin tsipwen, lo senye, lo khwen jo, lo temi ligühigü kae jünzo titseo,

⁷a-le nra sen-o, “Sunggigü nshvulo lo A-shwenlo! Kechamvule a-le mejün kera nrün tegi kevüja gü le ryü laso; tsang lo kazü, züda lo zükepen thyü keshü gü rüshvulo!”

⁸Lo tsangge jolo kecha nme, kenyhun gü le chwiryüo, “Babilon rünyi nyida gi le che laso, keyüla nshün kemvu zu lope tsipwen aphu la kehü gi le che laso,” tson.

⁹Lo tsangge jolonyu kecha nme, kenshen gü le tsüsika chwiryüo, nra pe ketetsin thyüo, “Temi ligühigüe tehenthyü lo a-men gü rüshvu, lo a-senpvü ge nmvue a-ben ge shazü kemvu kethyü sen hülo,

¹⁰a-ko Sunggigü nyunkekhü honpen gü nyu nyunkekhü zu tha pe rimvu tse thyü pe bin kenjü gü tsüti; lo tsangge jolo kenshün nyu ju mhundyü nyu lo Tanyü Nyugü mhundyü nyue mah lo mahtso sen-o nthyü nnyü ti.

¹¹Lo anyugun nthyü nnyü kethyü mah kekhu gü le kethonthen khu bin hünyo; lo tehenthyü lo a-men gü kershvu dan, lo a-zan shazü kemvu sen kehü dan le nhennyue lo khejenyue kebwen kerüyü nme-e ndi.”

¹²Hinyu hi Sunggigü johokeshü sen kehü lo Jisu tenyen kehü kenshün nyu ju no nyhenhilo lotse bin nyo.

¹³Lo tsangge thakhwen nme le, “Ntsoka gerho nyu Npugü nyu bin-o sikelanyu dan le henkegwa tsin!” “Ele ketsin!” tse Kapu gü le zo-o. “Anyugun le anyugun tho nyu rüyü tinla ti, kechamvule anyugun tho le anyugun then hünyo,” tse kezo nyülo.

¹⁴Lo tsüsika ale nrishü laryü, nmhu kechon nme, lo nmhu gü ge temi nyu hontse kethyü nme le, a-pe ge suna keda perün pvü lo a-ben nyu jonkhi a-yi kegwa nme sen hü.

¹⁵Lo tsangge jolo kechanyu nme le kershvuka gü nyu chwiryüo nra sen-o nmhu ge kebin gü ka, “N jonkhi pe gvülo lo, low kegvü tegi kevüja gü le ryü kelasi genyu, lo kazü shye gü tsüle nyün kegwa thyülo laso!”

¹⁶Lo tsonshü ntsin nmhu ge kebin gü le a-jonkhi pe kazü ge shüo kazü gü gvülo la.

¹⁷Lo tsangge jolo kechanyu nme le tsangge kershvuka gü nyu chwiryü, lo a-ko jonkhi a-yi kegwa nme sen hü.

¹⁸Lo tsükatsü mah soge a-kekvu kebin tsangge jolo kechanyu nme le kershvubin nyu chwiryü nra sen-o jonkhi yi kegwa sen kehü gü ka, “N jonkhi lope kazü vain low gü gvü kequenlo gwünlo.”

¹⁹Tson-o tsangge jologü le a-jonkhi pe kazü vainsha dan gvü kequenlo-o shwen pe Sunggigü nyunkekhü vainsha kethün bin gü nyu shüla.

²⁰Lo rünyi nyida gü chwida ngwen ki vainsha kethün bin gü kedüla, lo vainsha kethün bin nyu tezi le tsun chwiryüo fit pvün kho ntsun lo farlong ja yie nme-o tsitsero nken gunla.