Read Southern Rengma Naga TESHAKESHÜ 15 Bible Online

TESHAKESHÜ 15 - Southern Rengma Naga bible

TESHAKESHÜ 15

¹Tsüsika ale tsangge tha zansü kecha nme hyu, gon lo ndunthyü, lo tsangge jolonyu min tsenyü le kenjün kethyü kon tsenyü sen hü. Lo tsüle kenjün kethyü kekhin dan; tsüdan ge Sunggigü nyunkekhü dan le keni thyü lati.

²Lo ale mah lope kerhün kethyü shyeshwi zü keda nme hyu; lo tehenthyü gü lo a-men, lo a-zan number dan nye kvukelo ju tsü le Sunggigü baja dan sen-o shyeshwi züda khoka kebin hyu.

³Anyugun le Sunggigü gogü Mosa lü lo Tanyü Nyugü lü thyüo zo: “O Sunggigü kekvu tsingü, ntho dan le gon lo ndun thyü! Senye dan Raja gü, Ntson dan tsüle ketsin lo njü, O kethonthen Raja gü!

⁴segü le n nshvu mvu, lo nshwen mvula? O Npugü, kechamvule nle kenshün gü. Tsipwen aphu ryüo nmhundyü nyu nrüshvu ti; nle me jün kekera dan yhenshwi pe me hishü kela genyu,” tson.

⁵Lo hidan hi sika ale shwishü, lo tsangge jünkezo kershvuka gü khinshye njü.

⁶Lo kershvuka gü nyu tsangge jolonyu min tsenyü le kenjün kethyü kon tsenyü sen, linen phi kechon ben lo suna nyunkekhin khipe anyugun nyunkhin pvü tse chwiryü.

⁷Lo rhünkehü nyukhu pezi dan dannyu nme le kethonthen rhün kehü Sunggigü nyunkekhü lope sü kethyü suna khun tsenyü pe tsangge jolonyu min tsenyü dan tsüshü.

⁸Lo kershvuka gü le Sunggigü zankechwi kethyü lo a-kekvu nyu mah kekhu le süla, tson-o tsangge jolonyu min tsenyü dan le kenjün kethyü tsenyü dan tsü penla kemvuthen nme-e kershvuka nyu tsü yülo mvula.