Read Southern Rengma Naga TESHAKESHÜ 16 Bible Online

TESHAKESHÜ 16 - Southern Rengma Naga bible

TESHAKESHÜ 16

¹Tsüsika kershvuka gü nyu thakhwen ketetsin nme le tsangge jolonyu tsenyü ju ka, “Hagun gü Sunggigü nyunkekhü honpen tsenyü dan run pe kazü soge shü shülo!” tse kezo khwe ale nyülo.

²Tsüselo tsangge jolo kerigü le a-honpen gü run pe kazü ge shü shü. Tsontsin tehenthyü gü zansü pvü, lo a-men kershvu temi dan ge kethyü kenyü shvu le chwiryü la.

³Lo tsangge jolo kenyhun gü le gü a-honpen gü run pe züda gü nyu shü shü. Tsontsin züda züle kesinyu zi hontsela, lo zü nyu yhun kehü nyukhu aphu sila.

⁴Lo tsangge jolo kenshen gü le a-honpen gü run pe züri dan lo zükepen bin dan ka shü. Tsontsin tsüle tezi thyüla.

⁵Lo zü dan kentsen gü tsangge jologü le hihontse kezo ale nyülo, “O Kenshüngü, ntsokae lo ndukae kehü gü, nle kentsen nyu hihontse me ketso hünyo.

⁶Anyugun le Sunggigü temi kenshün nyu ju lo sidyükeshanyu ju zi no tsun, tsügenyu nle tezi khipe anyugun no tsü; anyun no tson zü kethyü genyu.”

⁷Tsüselo kershvubin gü nyu ale thakhwen nme nyü kelo le, “Npugü Sunggigü kekvu tsingü, nle me ketso kethyü dan le ketsin lo njü le!”

⁸Lo tsangge jolo pezi gü le a-honpen run pe yhüko ge shü, lo tsüno a-kenyün mah no pe temi ro lotse shü.

⁹Lo nyünsa kethyü pe temi roshü, tsontsin anyugun le kenjün kethyü khvü hidan so kekvu kebin Sunggigü zan swetsü la, tson-o anyugun kemu nyu ranilo-o a-shwenlo mvula.

¹⁰Lo tsangge jolo pvün gü le a-honpen run pe tehenthyü gü raja bin ge shü. Tsontsin a-raja kazü le züntin la, tson-o anyugun kethyü genyu anyugu yi nka sola.

¹¹Lo anyugun kenjün kethyü lo kethyü shvu gü genyu tsangge kebin Sunggigü swetsü la, tson-o anyugun serikemvu tson nyu anyugun nyunkelu lo mvula.

¹²Tsüsika tsangge jolo tsero gü le a-honpen run pe züri keda gü Eufrate ge shü. Tson-o yhüko kechwi kipon raja ju tson thyü shü nrün genyu züri tsü gü le sinla.

¹³Tsüsika ale dragon gü mün nyu, lo tehenthyü gü mün nyu lo kenku sidyükesha gü mün nyu nshün kemvu kapu kenshen le tsegu hontse chwikeryü hyu.

¹⁴Tsüdan tsü le ndun tho thyü shü kehü nshünkemvu gü kapu dan. Kapu kenshen hidan le kazü aphu nyu raja dan fü kequen sen gunryüo kekvutsin Sunggigü jon kedagü nyü teri thyü nrün genyu chwila.

¹⁵“Hire! Ale kerühyu nyu hontse ryü jünyo, temi ligühigüe kemben hümvu lo meno a-kejokepvü hyu mvu nrün genyu a-phinya ndo sen kebinnyu le jochü kepvü tsin!”

¹⁶Tson-o kapu dan le raja ju fü kequen zen Ibri khwenki Armageddom tsekethyü bin gü ka shülo.

¹⁷Tsüsika tsangge jolo tsenyü gü le a-honpen run pe tsangne ki shü. Tsontsin kershvuka gü nyu raja bin ge thakhwen ketetsin nme le, “Thyülo so!” tson.

¹⁸Tsontsin tsangkekechwe, thakhwen, tsangpera lo kazü nnu pe ketetsin thyüla. Kazü nyu temi nyhun keshü kazü nnu pe tsühontse shwi kemvu kazü kennu gwa kemvutsin nme thyüla.

¹⁹Rünyi nyida gü sükho pe kenshen thyüla, lo kazü aphu nyu rünyi nyida dan nkela. Lo Sunggigü le a-nyunkekhü ketetsin kethyü zu honpen gü pe Babilon gi la titse rüchün lo.

²⁰Lo zükehun kazü aphu hyumvula, lo kazüthun dan ndila.

²¹Lo tegwün le gon pe kilo henzi kensu khokho le tsangge cheo temi ge tsüryü. Tsontsin kenjün kethyü khvü tegwün gü genyu temi le Sunggigü swetsü la, kenjün kethyü khvü tsügü le ketetsin thyüri kethyü genyu.