Read Southern Rengma Naga TESHAKESHÜ 17 Bible Online

TESHAKESHÜ 17 - Southern Rengma Naga bible

TESHAKESHÜ 17

¹Tsüsika honpen tsenyü kepen tsangge jolonyu tsenyü dan nyu nme le gunryüo a-ka, “Ryülo, ale züri kechon khoka rünyi nyida keyüla gi shaja tsin pe nhishü tile.

²Kazü nyu raja ju le a-zen keyüla lo a-keyüla zu pe kazü temi dan la pe no nzeü laso.”

³Tsüselo Kapugü le a ntsenlo, lo tsangge jolo gü le a khipen-o tehenyhun kemvu kazü nme ki gunla. Lo tsüka ale zan gwakemvu thu pe sü kepvü tehenthyü a-pe tsenyü lo a-tse tseryü tsekethyü tehenthyü kenhon nme ge tenunyu nme le kebin hyu.

⁴Lo tenunyu tsügi le phinya shweshwe tse lo nhon nshwen kethyü ben nya, lo suna tso a-min ketsen lo tyü a-min ketsen pe a-nthyü nzen pvü hü, lo a-ben nyu suna honpen nme nyu a-keyüla nshün kemvu lo kentsükenchen pe sü kethyü khipen hü.

⁵Lo a-senpvü ge zan kekebu ki a-kon le kebin nme, “Babilon kedagi, kazü nyu a-keyüla chün ketyü dan lo kentsükenchen thyü kehü jvügi,” tse thu pvü hü.

⁶Lo tenu tsügi le Sunggigü temi ju zi lo Jisu jokezen genyu dushvu kela dan zi tsü pe nzeü kebin ale hyu. Ale a-hyu kethyü ka a-shwi pe adun thyü sala.

⁷Tsontsin tsangge jologü le aka, “Nle nyu thyüo ndun thyü hü nla? Ale tenugi, lo a-khipvü kehü tehenthyü, a-pe tsenyü lo a-tse tseryü gü hvu rüla kekebu kon gü zope nhi tile.

⁸Tehenthyü nle kehyugü tsüle, gwüngwa bin, ai bin sin mvu laso; tsügü le tekhwün kentsun gü nyu chwiryüo kenke gü nyu gun lati. Kazü thyükelo mhundyü nyu kerhüntsü lesü nyu a-zan thulo kemvunyu le tehenthyü gü shwipe anyugun dun thyü ti. Kechamvule tehenthyü gü le gwüngwa yhun hü, ai yhun sin mvula, lo tsüle nichwiryü nrün genyu.

⁹“Hika hi nnyun nyu tha rüchün kekho kethyü sen mvulo shvu bin nyo. Pe tsenyü dan tsüle tenugi le a-ge kebin rincho tsenyü dan. Lo tsüdan tsü le raja tsenyü dan-e le.

¹⁰Pvün dan le chela so, lo nme le bin zun, lo kecha nme le chwiryü tizun; a-le soryülo keshanyu joka nti binti.

¹¹Lo tehenthyü gwüngwa yhun hüo ndi kelagü tsüle tetse gü, tson-e tsüle tsenyü dan nyu nme, tsüle kenke nyu gunla ti.

¹²“Lo nle kehyu tsenyü dan tsüle raja tsenyü raja thyü so mvuzun kethyü dan, ai anyugun no tehenthyü gü zen-o raja thyü nrün genyu tegi kevüja nme kekvu khipe anyugun tsüla.

¹³Hidan hile anyugun kerüchün le nme, lo anyugun kekvu lo keda kethyü khipe tehenthyü gü tsüla.

¹⁴Anyugun le Tanyü Nyugü lo a-le kolo kela, lo kejülo kela lo ketsin nyu a-sithen kehü dan le anyugun nye kvulo lati, kechamvule a-le npu dan Npugü lo raja dan Raja gü genyu.”

¹⁵Lo tsangge jolo gü le aka, “Tenugi le a-so ge dun kebin nle kehyu zü gü tsüle, temi dan, lo danda dan, lo tsipwen dan, lo khwen jo dan le.

¹⁶Tson-o nle kehyu tse tseryü dan lo tehenthyü gü le a-keyüla chün ketyü gi tsü shwi rüchün ti, lo anyugun le a-hon aphu khilo la njüo a-no a-kemben lati, anyugun le a-thyü tyü lo mah pe a-nke lati.

¹⁷Sunggigü jo dan thyü penlo kemvuthen a-kerüchün gü thyülo nrün genyu anyugun no nyun me thyüo anyugun kekvu khipe tehenthyü gü tsü lotseo Sunggigü le anyugun nyun thyü shü.

¹⁸“Tenunyu nle kehyu gi tsüle kazü nyu raja dan so gon kehü rünyi nyida gi le.”