Read Southern Rengma Naga TESHAKESHÜ 18 Bible Online

TESHAKESHÜ 18 - Southern Rengma Naga bible

TESHAKESHÜ 18

¹Tha hidan hisika, tsangge jolonyu kecha nme le tsangge tsüryü kejü ale hyu. A-le kekvu keda sen lo a-keben le kazü aphu benla.

²Lo a-le nra sen-o, “Babilon kedagi le che laso! Che laso! A-le che laso! Hasun a-rin nshün kemvu kapu dan kensenbin lo nshün kemvu lihi lo tegü kentsü kenchen dan aphu kebin bin thyü laso.

³Kechamvule a-le a-keyüla zu khipe temi aphu no tsüo nzeü laso. Lo kazü nyu rajanyu ju le a-zen-o keyüla, lo kazü nyu hakethyü nyu dan le a-keyüla sari kethyü gü genyu nnyalo kela genyu.”

⁴Tsüselo ale tsangge thakhwen nme nyü kelo le, “Chwiryüla lo, a temi dan! Hagun a-kemu dan kerhün mvu nrün genyu lo a-shaja dan kenjün mvulo nrün genyu, a-nken chwiryüla lo!

⁵Kechamvule a-kemu le kügü tsang ti laso, lo Sunggigü le a-seri kemvu rüchün bin kela genyu.

⁶A-le mege thyü keshü hontse thyü pe a-ge shü shülo; a-le thyü keshü jünhvu pe a-tsü shülo. Tsügi le khipe me la kehü zu nyeki jünhvu kvu kvu kethyü khipe a-honpe sü tsülo.

⁷A-le a-npvü a-shwen kethyü lo yhun ketegvü kehü kho kenjün kethyü lo nyungwakemvu khipe a-tsülo. Kechamvule a-le a-npvü a-nthon-o: ‘Hika ale dun bin nyo, rajagi thyü! ale maginyu mvu, ale thame ka-e nyungwa kemvu hyu loho!’

⁸Tsügenyu khenyüme jon thyü a-kenjün kethyü khvü dan- kempen, nyugwa kemvu, lo chenda le a-gwün lati. Tson-o mah no a-rola ti, kechamvule a-nmu kelagü Npugü Sunggigü le kekvu tsingü genyu.”

⁹Tson-o kazü nyu raja dan azen-o keyüla lo nshün kemvunyu yhun ketegvü kehü dan le a-ro kebin mah kekhu gü hyu ntsin rünyi tsügü chechü nra soti.

¹⁰A-nthyü nnyü kethyü gü tsü nshvuo anyugun le nithen ki bin-o, “Ketetsin! Kenke kemhü le Babilon rünyi nyida lo kekvu gi ge ryü laso! Tegi kevüja nme ka n shaja khishü laso!”

¹¹Lo kazü nyu hakethyü nyu dan ko a-chechü, kechamvule temi nme-e anyugun hathyüni mvu kela genyu.

¹²Anyugun ha tsüle suna, rakagi, tso minketsen, tyü, linen phi kegwa, nyunkaron phi, lo phi nhon meren kethyü, lo shweshwe tse kethyü, lo tesan a-rün kegwa, lo chunhü dan, lazo, lo tegi lo marbel pe kethyü dan.

¹³Lo senthyü, mosela, n shünchün, senche lo tharün kegwa, zu lo terzü, tho lo thoshye, methu lo tanyü, keru lo keru gari, do lo temi phou-e.

¹⁴Ha kethyü nyu dan le tsügi ka zo, “Nle tepen kehü hon dan tsü aphu hyu mvu laso, ketegvü kethyü dan lo kezegwa tsü aphu tin bu laso, lo tsüdan tsü hyu sin mvu laso!”

¹⁵Hidan hi sen-o hathyüo nnya kelo dan le a-nthyü nnyü kethyü shwi nshvuo nithen ki so-o a-chechü, tson-o

¹⁶“Hei, ketetsin kethyü le rünyi nyidagi linen phi kegwa, phi shweshwe tsekethyü lo nhon meren kethyü, lo suna ronye, tso minketsen lo tyü a-min ketsen khipe nthyü nzen pvü kehü gi ge ryü laso!

¹⁷Tegi kevüja nme ka a-kenya hi aphu nke bu laso!” Lo run nyu kedanyu, lo tsünyu kenjwen nyu aphu, run kethu nyu lo zü nyu hakethyü nyu aphu nithen ki so-o,

¹⁸a-kero mah kekhu hyu shü ntsin nra sen-o: “Rünyi nyida hitsülaki kethyü rünyi kecha ndi le!”

¹⁹Tson-o anyugun le kemphü khipe anyugun pe ge shüo nra chüo: “Ketetsin kethyü kenke kenmhü le nyida gi ge ryü laso! Züda nyu run sen kehünyu aphu a-kenya genyu nnya külo! Lo tegi kevüja nme ka a-kenya aphu nke laso!”

²⁰Hire, tsang nsherhünlo, Sunggigü temi dan lo apostel nyu dan lo sidyükeshanyu dan, a-nke kela genyu hagun sherhünlo! Kechamvule a-le hagun ge thyü keshü hontse Sunggigü le a-jün kera keshü genyu!

²¹Tsüselo tsangge jolo kenko nme le tso tha kerü kehü tso tsülaki nme khilo njüo shwe pe züda nyu shüo zo, “Hihontse Babilon rünyi gi kemvu thyüo shwe pe shü lati, lo tsü hyu sin mvu lati.

²²Tson-o baja kekhun, lükethyü, kheli kekhun lo shu kekhun dan tsü nyü sinlo mvu lati; lo thathyü keshanyu ndan nyu hyunilo hoso; lo ndan nyu tha kekerü khwen nyünilo mvu lati.

²³Lo mah kemben nme-e ndan nyu chwikeryü hyuni mvu lati; tson-o ndan nyu senhügi lo senhügü khwen nyü sin mvu lati. N hakethyü temi le kazü nyu kekvu nyu dan, lo nketümvu genyu kazü nyu temi aphu sa laso!”

²⁴Tson-o rünyi tsünyu sidyükeshanyu ju lo Sunggigü temi ju lo kazü nyu dushvu kela aphu zi hyulo laso.