Read Southern Rengma Naga TESHAKESHÜ 19 Bible Online

TESHAKESHÜ 19 - Southern Rengma Naga bible

TESHAKESHÜ 19

¹Tha hidan hi sika ale nyü kelo le tsangge temi danda nme le nra sen kethyü hontse tha zo-o: “Haleluyah! Kenikelo, zankechwi lo kekvu le ngun Sunggigü hon so.

²A-le me keketso le ketsin lo njü le! A-le keyüla genyu kazü aphu thyü nshvu kela keyüla kedagi nmu laso, lo tsügi ben ka a-le a-gonyu ju zi khün zo laso.”

³Anyugun le nra sen ni-o, “Haleluyah!” tson-o a-kero kekhu le nthenteyhen khu tinla.

⁴Lo pelü nki pezi lo rhü kehü nyukhu pezi dan le chetsügü Raja bin ge dunkebin Sunggigü rüshvuo, “Amen! Haleluyah!” tson.

⁵Tsüsika raja bingü nyu thakhwen nme le chwiryüo zo, “Ngun Sunggigü shwenlo, a-gonyu ju aphu, keda jue, keshe jue lo a-nshvu kehünyu aphu, Sunggigü shwenlo!”

⁶Tson-o ale temi danda khwen hontse, lo zü kechon khwen hontse, lo tsangkesen khwen hontse kethyü khwen nme nyü kelo le: “Haleluyah! Npugü ngun Sunggigü, kekvu tsingü le raja thyü bin laso.

⁷Ngun sherhün lo ngun nyun nyülo nu; tson-o a-zan shwenlo, kechamvule Tanyü Nyugü sunkethyü gwünkho le ryü laso, lo a-nu le tsügenyu a-npvü a-gwün ndalo laso!” tson.

⁸Lo a-no linen phi kegwa, kenshün lo kenshwen ben nyalo lotse shü. (Kechamvule linen phi tsüle Sunggigü temi dan tho kentsen kenjü gü genyu.)

⁹Tson-o tsangge jologü le aka, “Thulo: Tanyü Nyugü senhü keho nyu kope bin kelanyu le jochü kepvü tsin le!” tson. Lo a-le aka zonio, “Hidan hile Sunggigü jo ketsin le.”

¹⁰Tsüselo ale a-rüshvu titseo a-pha nyu nkhüntsü. Tsontsin a-le aka, “Tson nya! Ako nle lo npvünyu dan lo Jisu jünkezo then kehü ju zen-o me gonyu nme le. Sunggigü rüshvulo!” Kechamvule Jisu jünkezo le sidyükesha Kapu gü le.

¹¹Tsontsin ale tsang khinshye keshü hyu. Lo hire, keru kechon nme, a-ge kebin gü le tenyenlo kekü lo ketsin letse hü. A-le kenjün nyu mejün kera lo teri thyü hü.

¹²A-yhütyü le mah kenyü hontse, lo a-pe ge keda perün kechon le bin; a-le zan nme thu pvü hü, lo tsüle a-nti a-me kechanyu nme-e sha mvu.

¹³Tson-o a-phi le tezi kezen pe nye kethyü ben nya. Lo a-zan no Sunggigü jo gü tho.

¹⁴Lo tsangge kehü shüpahü dan le linen phi a-nikensen kechon lo kenshün ben küo keru ge dun-o a-sithen gunla.

¹⁵Lo a-mün nyu a-le pe temi dan dushvu nrün genyu zhethon a-yi kegwa le chwiryü. A-le tegi thün sen-o tsüdan ketsen ti; lo a-le kekvutsin Sunggigü nyunkekhü ketetsin kethyü vain zu kethün bin gü kedüla.

¹⁶Lo a-le a-phi ge lo a-din ge zan nme: “Raja so Raja lo npu so Npugü,” tsekethyü thu pvü hü.

¹⁷Lo ale tsangge jolonyu nme le yhüko ge kebin hyu; a-le a-khwen le gingvü tseo tsangne ki nye kehü tegü dan aphu ka,

¹⁸“Hagun le raja dan thyü, lo shüpahü, lo kedanyu thyü, lo temi kekvunyu thyü, keru lo a-ge kehünyu thyü, temi medo kethyü nyu lo dothyü kemvunyu, keshen keda aphu thyü tyü nrün genyu gunryüo Sunggigü keho keda nyu kequenlo lo!” tson zoshü.

¹⁹Tsüselo tehenthyü gü, lo kazü nyu raja ju, lo anyugun shüpahü dan le keru ge kebin gü lo a-shüpahü dan zen kega titseo gü kequen kelo ka ale hyu.

²⁰Tson-o tehenthyü gü tsü tenlo, lo kenku sidyükesha gü, a-yhühyu ka tha zansü thyü pe tehenthyü gü ge tha zansü hyukelo dan lo a-men kerüshvu ju sen kelogüe sin. Lo au minhvu nren a-kerhün shwen pe mahtso lope ro kenjü mahzi nyu rola.

²¹Lo a-sen dan le keru ge kebin gü mün nyu zhethon gü pe dushvula. Lo tegü dan le tsüdan thyü tyü pe anyugun gin nyülo.