Read Southern Rengma Naga TESHAKESHÜ 2 Bible Online

TESHAKESHÜ 2 - Southern Rengma Naga bible

TESHAKESHÜ 2

¹“Thu pe Efesa nyu kehun jolo gü ka shülo: “A-ben njüzin shyenyü tsenyü sen kehü gü lo suna makemben bin tsenyü dan nyu nsin nshye kehü gü jo dan.

²Ale ntho dan sha; nle nhokeli kehü lo nyhenhi kehü, lo temi gwakemvu nyu shwinyü mvu kehü lo anyugun npvü anyugun le apostel letse hü, ai kemvu, tsüdan rüla shao anyugun kenku shalo kehü ale sha bin nyo.

³Ale nle nyhenhi binlo kehü lo ntsonrüzi lahü kemvu shabin nyo.

⁴Ai nle nkeso kerigü khela kethyü ale higü hi nge akenyü mvu.

⁵Tsügenyu nle dika chela yo nsi rüchün nilo-o nnyun kelulo njüo raniryüo ntho keri dan thyülo. Nle nmvu yatselo, nnyun kelulo kemvu we ale nki ryüo a-bin gü nyu n makemben gü khisen tinla ti.

⁶Ai Nikolaitan ju tho dan a ai ntsü kehü gü, nko ntsü kehü nle hile bin nyo.

⁷“Temi ligühigüe a-nyetin kebin gü no, tsügü no Kapu le kehun dan ka kezo khwe nyülo lo! “ Ale Sunggigü kebwen bin nyu bin kehü kerhüntsü bin gü ge khipe ligühigüe kvulo kehünyu no tyü ti.

⁸“Kerigü, lo kekhin gü silao rhünni kelogü, jo dan thu pe Smirna nyu Kehun jolo gü ka shülo.

⁹“Ale nkenjün kethyü sha; ale nle rhokedyü tse kethyü sha- ai nle nnya ketsin! Lo judanyu mvule Satan sinagog; ai nkuo anyugun npvü anyugun le Judanyu letse kehü dan sha!

¹⁰Kenjün kethyü nka ryü kezhü dan nshvu nya chi. Hire, hagun kegwa keshvu sha nrün genyu satan le hagun peha ten pe doka nyu shüla ti tse bin laso, lo jon tseryü hagun le kenjün thyü ti. Nle si ai joketsin zobin lo, lo ale kerhün perün khipe ntsü ti.

¹¹“Temi ligühigüe a-nyetin kebin gü no, tsügü no Kapugü le kehun ka kezo khwen nyülo lo! “Ligühigüe kvulo kehünyu, tsünyu le kesi kenyhun gü no a-nthyü nnyü loho.

¹²“Zhethon yi kepen kethyü sen kehü gü jo dan: “Thu pe Pergama nyu kehun jologü ka shülo!

¹³Ale nkebin bin sha, nle satan keda bin kebin nyu bin nyo; hagun dan nyu satan le bin kehü nyu ketsin thyüo ajün zo kehü gü Antipas dushvula kethyü jon ka-e nle azan sen tsekho binlo kethyü, lo a ketenyen zoshwi mvu lamvu.

¹⁴Ai ale nge a kenyü kemvu peha le bin nyo: nle satan senkethyü jo kezen peha le bin nyo; a-le Balak no Israel nyu nyenyu ju mhundyü phakensü nme khishü lotse senthyü, tsüle teromen kerüshvu hon dan tyü lotse lo keyüla tho thyülo tse kethyü.

¹⁵Tsühontse nle Nikolaitan senkethyü kethen peha ko bin nyo.

¹⁶Tsügenyu nnyun kelulo! Nmvu yatselo ale gwen tse nka ryü ti, lo amün zhethon gü pe tsüdan zen kega ti.

¹⁷“Temi ligühigüe a-nyetin kebin gü no Kapu gü le kehun ka kezo khwen nyülo chi! “Ligühigüe kvulo kehünyu le ale kekebu manna pe tsünyu tsüti, lo ale tso kechon nme khipe a-tsüti, tso tsügü ge zan keshün nme thu pe kenjü, tsügü hyu kelogü kemvu we temi nme-e shamvu.

¹⁸“Sunggigü nyugü, a-yhütyü le mahyi hontse kethyü gü lo a-pha le lazo rope nhon kenjü hontse kethyü gü jo dan: “Thu pe Thiatira nyu kehun jologü ka shülo.

¹⁹Ale ntho dan lo nkeso, lo ketenyen, lo n lotho, lo nle nyhenhi kehü, lo ntho kekhin dan le keri dan nyeki gwakvu kethyü sha.

²⁰Ai ale nge tha higü hi a kenyü mvu. tsüle nle Jazebel a-npvü a-lope sidyükeshagi letse, lo tson-o a-gonyu ju senthyü lo tson tsinzü pe anyugun no keyüla lo teromen kershvu hon dan tyü kehü gi rüchün nshvu kemvu genyu.

²¹Ale a-no a-nyun kelulo kegwa gwünkho khishü, ai a-le a-keyüla kelula nyü mvula.

²²Hire, ale a-shwen pe keho zhü nme ge shüla ti, lo a-zen-o keyüla kehü dan anyugun shwe pe kenjün thyüsa kehü nyu shü lati, anyugun le tenunyu tsügi tho nyu anyugun nyun kelulo kemvu we.

²³Lo ale kesi khipe a-nyenyu ju nke lati. Lo kehun aphu no ale meki menyun kese kehü gü letse kethyü shalo ti, lo ale hagun nme me tse kethyü hagun tho hontse hagun chün thyü pe tsüti.

²⁴“Ai hagun Thiatira nyu kebin kechanyu ju, senkethyü jo hidan sen hü kemvu ju, lo ‘satan jo kentsun dan’ tse ko kehü sha hü kemvu ju ale hagun ka zohü nyo. Ale hagun ge khvü kensu kecha pe hüni loho.

²⁵Ai ale ryü kemvuthen hagun le sen kebin dan sen nko binlo.

²⁶Temi ligühigüe kvulo kehünyu, lo ale a-no thyülo tse kehü dan thyü bin-o a-keni ti kelonyu, ale rünyi kecha dan so kekvu khipe tsüti.

²⁷Tson-o a-le nnyonla boren la kehü hontse tegi thün sen-o tsüdan kekheni ti, ale apvü ka nyu kekvu hyu kelo hontse.

²⁸Lo ale lonyü shyepvü khipe a-tsü ti.

²⁹“Temi ligühigüe a-nyetin kebin gü, tsügü no Kapu gü le kehun dan ka kezo khwe nyülo chi!