Read Southern Rengma Naga TESHAKESHÜ 20 Bible Online

TESHAKESHÜ 20 - Southern Rengma Naga bible

TESHAKESHÜ 20

¹Tsükatsü ale tsangge jolonyu nme le tekhwün kü kentsun gü chabi lo a-ben nyu tegiron kegon nme sen-o tsangge nshye keryü hyu.

²A-le perigü, peri whegü, tsüle shwikerüchün tun gü, Satan tsü tenlo-o chen yie nme a-phin pe binla.

³Lo a-shwe pe tekhwün kü kentsungü nyu shülao khinla, tson-o a-so mehor vüla, a-le chen yie nme penlo kemvuthen a-no temi sa sinmvu nrün genyu; hisiki jon keshanyu a-shwü shü ti.

⁴Lo ale Raja bin dan me hyu, temi le a-ge bin, lo anyugun no me jokera lotse shü. Jisu jünkezo genyu lo Sunggigü jo kezo genyu a-pe gwen kelanyu, tehenthyü gü lo a-men-e rüshvu kemvu dan, lo a-senpvü ge nmvue a-ben ge tha zansü kendi ju kapu dan tsü ale hyu; anyugun le rhünlo-o chen yie nme Khrista zen-o raja thyü.

⁵Ai kecha dan we chen yie nme tsü penlo kemvuthen rhünlo mvu. Hile rhünni keso kerigü.

⁶Temi ligü higüe rhünni keso kerigü nyu a-jün le kebin nyu le nshün lo a-henkegwa tsin. Kesi kenyhun gü le tsüdan so a-kekvu ndi so; tsünyeki a-nyugun le Sunggigü lo Khrista peshü thyü tinla tiso, lo chen yie nme a-zen-o Raja thyü ti.

⁷Chen yie nme penla ntsin doka tsünyu Satan shwüshü ti.

⁸Tson-o kazü quenzi nyu kebin temi dan, Gog lo Magog senlo-o tsüdan fü kequen zen-o teri nyu gunryü titse chwiryü ti. Tsüdan rüchün keshwi le züda nyu hachon hontse.

⁹Tson-o anyugun le kazü kegon ge gun-o kenshün nyu dan bin, lo nkenyü rünyi nyida gü tsü hunpvülo; ai tsangge mah le tsüryüo tsüdan rola.

¹⁰Lo Satan shwe pe mah lo mahtso zi gü nyu shüla, tsünyu tehenthyü gü lo kenku sidyükesha güe bin; lo khenyütsen, khejetsen kethonthen anyugun nthyü nnyü ti.

¹¹Ale Raja bin kechon keda nme hyu, tsüge kebingü yhühyu ka tsang lo kazü le tinla, lo au bin hyunilo mvula.

¹²Lo ale kesinyu, keshen lo keda le Raja bin gü mhundyü nyu so kebin hyu; tsüselo lesü nme hielo. Lo lesü kecha nme hielo, tsüle kerhüntsü lesü gü. Lo kesinyu tho tsü aphu lesü gü nyu thu kenjü lope anyugun jünkera.

¹³Tsüselo züda gü le kesinyu le a-nyu kebin dan hoshü. Kesi lo Hades au ko kesinyu le au zen kehü dan hoshü; temi aphu tse a-pepvü pvü a-tho hontse anyugun jünkera.

¹⁴Tson-o kesi lo kesinyu rünyi au shwe pe mah nyu shüla. Mahzi higü hile kesi kenyhun gü.

¹⁵Ligühigüe kerhüntsü lesü nyu a-zan thu njüo hyulo kemvunyu tsünyu shwen pe mahzi nyu shüla.