Read Southern Rengma Naga TESHAKESHÜ 21 Bible Online

TESHAKESHÜ 21 - Southern Rengma Naga bible

TESHAKESHÜ 21

¹Tsüsika ale tsang keshün nme lo kazü keshün nme hyu; tsang kerigü lo kazü kerigü ndi kelasi genyu; lo züda güe bin mvu kelasi genyu.

²Ale rünyi nyida kenshün, Jerusalem keshün gü, senhügi le a-nthyü pvüo a-nyepvü kaki kegun hontse tsangge Sunggigü kanyu tsüryü kezhü hyu.

³Ale raja bin gü nyu thakhwen nme le gingvü tse nyü kelo le, “Hire, Sunggigü Then le temi zen bin laso, lo a-le anyugun dan nyu hü ti, lo anyugun le a-temi thyü ti, Sunggigü le anyugun zen hüo anyugun Sunggigü thyüti.

⁴A-le anyugun yhütyü ka anyugun yhüphu aphu shonla ti; tsünyu tsü le kesi ndi; nyungwakemvu, kechü kehokenyü-e bin sin loho so. Tha keri dan le ndi laso.”

⁵Tsükatsü Raja bin ge kebin gü le, “Hire, ale tha aphu thyü ketsinni laso!” tson. Tson-o a-le, “Thulo, jo hidan hile joketsin lo ketsin le,” tson zo.

⁶Tson-o a-le aka, “Thyüla so! Ale Alfa lo Omega gü, Kerigü lo Kekhin gü. Ale kerhüntsü zü kenrun nyu pe teri kehünyu lati.

⁷Temi ligühigüe kvulo kehünyu le tha hidan hi gwen loti; lo ale anyugun Sunggigü thyü ti, lo a-le anyu thyü ti.

⁸Ai tha nshvu kehü dan, tenyen kemvunyu, medukeshvu nyu, keyüla nyu, tümvu nyu, thamen kezü kershvu nyu, lo kenku nyu aphu mah tso lo mah nnyü kebin mahzi gü nyu anyugun jün hyulo ti; tsüle kesi kenyhun gü.”

⁹Lo honpen tsenyü kesen gü lo kenjün kethyü tsenyü kekhin dan pe sü kepvü tsangge jolo tsenyü dan nme le gunryü; a-le azan kenthon-o, “Hiki ryülo, Senhügi, Tanyü Nyugü nu tsin pe nhishü tile,” tson.

¹⁰Tson-o a-le Kapu nyu akhi pen-o kazüthun keda ketetso nme ge gun-o tsangge Sunggigü kanyu Sunggigü keben kenshwen sen-o tsükeryü, lo Jerusalem, Rünyi Nyida Kenshün gü tsin pe ahi.

¹¹A-keben le tso a-min ketsen, jasper tso hontse, lo kristol shyeshwi kenshün hontse.

¹²A-kehun chwida le gon lo tetso; chwida khenpvü le tseryü kenyhun; lo tsüdan ge zan dan me thu njü, lo tsüle Israel nyu tsipwen tseryü kenyhun dan zan.

¹³Npho kipon khenpvü kenshen,tesin zin khenpvü kenshen, teso zin khenpvü kenshen, lo nkhün kipon khenpvü kenshen.

¹⁴Lo Nyida gü chwida gü bin kezen-e tseryü kenyhun, lo tsüdan ge Tanyü Nyugü apostel tseryü kenyhun dan zan tseryü kenyhun le bin.

¹⁵Azen kethen kehü gü le nyida gü lo a-chwida dan, chwida khenpvü dan, lo chwida aphu ndo nrün genyu suna no kethyü tha kendo thün nme sen hü.

¹⁶Nyida gü a-quen pezi dan tsü ketun kü, a-kethon keda-e ketun kü, lo a-le a-thün lope nyida gü ndo keshü le, farlong ja yie tseryü kenyhun; a-kethon keda, lo ketetso aphu ketun kü.

¹⁷A-le chwida gü ndoshü laryü, temi le thakendo hontse tsangge jologü le ndo kelo le tsu tsio henzi pezi.

¹⁸Lo chwida gü le jasper lope thyü; lo nyida gü we suna kenshün shyeshwi hontse kethyü lope thyü.

¹⁹Nyida gü chwida bin kezen le tsomin ketsen lope thyü. Binzen kerigü le jasper, kenyhungü le safir, kenshen gü le agate, pezi gü le emeral,

²⁰pvün gü le onix, tsero gü le karnelian, tsenyü gü le kristol, tetse gü le beril, tekü gü le topas, tseryü gü le kalcedoni tseryü nme gü le turquoise, tseryü kenyhun gü le amethist.

²¹Chwida khenpvü tseryü kenyhun dan tsüle mukut tseryü kenyhun; khenpvü nme ge mukut nme me. Nyida gü tson le suna kenshün shyeshwi hontse tha hyu nshün kethyü lope thyü.

²²Tsünyu tsü ale kershvuka nme-e bin-o hyulo mvu, Npugü Sunggigü le tha aphu so, lo kekvu tsingü Tanyü Nyugü le tsünyu kershvuka gü thyü.

²³Nyida gü tsü le shye, yhüko keben sen mvue gwa. Sunggigü keben le tsü aphu gwün nben bin nyo, mah kemben gü tsüle Tanyü Nyugü.

²⁴Temi dan aphu a-keben nyu hü ti; lo kazü nyu raja nyu dan le anyugun zankechwi kethyü sen-o tsü nyu gun ti.

²⁵Lo nyida gü chwida le nhennyu khinla hü mvu, lo tsünyu tsü le kheje ki ndi.

²⁶Lo temi le teshwen lo zankechwi sen-o tsünyu gunryü ti.

²⁷Ai tha nshün kemvu nme-e, lo temi nshün kemvu nme-e, lo kenkunyu nme-e no tsünyu yü loho. Ai Tanyü Nyugü, Kerhüntsü lesü nyu a-zan thu kenjü dan nti le tsünyu yü loti.