Read Southern Rengma Naga TESHAKESHÜ 22 Bible Online

TESHAKESHÜ 22 - Southern Rengma Naga bible

TESHAKESHÜ 22

¹Tsüsika a-le Sunggigü lo Tanyü Nyugü Raja bin bin nyu tsunchwikeryü kerhün tsü züri kristol kenshwen hontse kethyü nme le;

²Rünyi nyida pvüthü gun kebin tsinpe ahi, lo züri kho lizin hizin shye kechwi nshao chenme ka gwün tseryü kenyhun che nsha kehü kerhüntsü bin le bin, lo senbin gü nyü le temi gwün kesherhün hü.

³Tsünyu tha nme-e swetsü sin loho so, Sunggigü lo Tanyü Nyugü Raja bin le tsünyu bin ti, lo a-gonyu ju le A-rüshvu ti.

⁴Anyugun le a-mhun hyuti; lo a-zan le anyugun senpvü ka binti.

⁵Anyugun le mah kemben nmue yhüko keben sen mvue gwa, Npugü Sunggigü le anyugun keben thyü ti, tson-o anyugun le nthenteyhen nyu Raja thyü ti.

⁶Lo a-le aka, “Jo hidan hile tenyenlo kü lo ketsin le. Lo Npugü sidyükeshanyu Kapu dan Sunggigü le a-jologü nishüo no nshwen thyüla nrün dan pe a-gonyu ju hishü le.”

⁷“Hire!” Jisu le zo, “Ale whütse ryü jü nyo! Lesü hinyu sidyü jo dan thyü zenkehünyule jochü kepvünyu le!”

⁸Ale Johan, ale tha hidan hi nyülo, lo hyu le, ale nyülo, lo hyushüo tha hidan hi tsin pe ahi keshü tsangge jologü rüshvu titse a-phanyu nkhün tsü.

⁹Tsontsin a-le aka, “Nle tson nya! Ako nhontse lo npvünyu sidyükeshanyu ju lo lesü hinyu thu kenjü thyü lo zen kehü ju zen-o me lokethyü nyu le. Sunggigü rüshvulo!” tson.

¹⁰Lo a-le aka, “Lesü hinyu sidyü jo dan mehor vüla nyalo, a-gwünkho nni kelasi genyu.

¹¹Tha gwakemvu thyü kehünyu no gwakemvu thyü bin, lo nshün kemvunyu no nshün mvu bin, lo kentsen keserinyu no kentsen tho thyü bin, lo kenshün nyu no nshün binlo.” tson zo shü.

¹²“Hire!” Jisu le zo, “Ale whütse ryü jü nyo, temi nme me tsekethyü a-le nyu thyü shü yo, kethun nrün genyu chün sen hünyo.

¹³Ale Alfa lo Omega gü, kerigü lo kekhin gü le, binzen gü lo keni gü le.”

¹⁴Kerhüntsü bin gü nyu lo chwida khenpvü nyu yüo rünyi nyida gü nyu yülo kezü thyülo nrün genyu a-phi thu kelanyu le a-henkegwa nyu.

¹⁵Tegwen zin tehi dan, lo tümvu nyu ju, lo keyüla ju, lo me dukeshvu dan, lo teromen kershvu ju, lo kenku nyu dan lo kenku le a-kenyü kehünyu aphu bin.

¹⁶“Ale Jisu jo hidan pe kehun dan ka zoshülo tseo ale a jolonyu nipe hagun ka shü shü le. Ale David jwi lo a-tsi gü le, lo lonyü shyepvü gü le.”

¹⁷Kapu gü lo Senhü gü le, “Ryülo!” Lo ligühigüe nyülo kehü gü ko no, “Ryülo!” tse koshülo. Lo teri kebin gü no ryülo, nnyü kebin gü no kerhüntsü zügü a-min thyümvu tse khilo lo!

¹⁸Ale lesü higü nyu sidyü jo dan nyü kebin nyu aphu no petsülo lo tse zoshü bin nyo: Ligühigüe tha peha pe jo hidan hi sin yatselo, Sunggigü le lesü hinyu thu kenjü kenjün kethyü dan khipe a-sin shü ti.

¹⁹Lo ligühigüe sidyükesha lesü hinyu jo dan peha khela yatselo, Sunggigü le lesü hinyu a-rüla zo kenjü kerhüntsü lesü gü nyu a-jün khisen tinla ti.

²⁰Jo hidan jünzo keshü gü le zo-o, “Ketsin le! Ale whütse ryüzhü nyo!” Amen. Ryülo, Npu Jisu!

²¹Npugü Jisu Khrista shwikenjün gü no kenshün nyu ju aphu zen bin kelo gü thyülo. Amen