Read Southern Rengma Naga TESHAKESHÜ 3 Bible Online

TESHAKESHÜ 3 - Southern Rengma Naga bible

TESHAKESHÜ 3

¹“Sunggigü kapu tsenyü lo shyenyü tsenyü dan sen kehü gü jo dan: “Thu pe Sardia nyu kehun jologü ka shülo. Ale ntho dan sha; nle a-zan nti rhün bin nyo, ai nle a-kesi.

²Chonsoryü lo, lo sitügü zhü kela nsen kebin dan thyü nkolo, kechamvule ale Sunggigü mhundyü nyu ntho nme-e gwapen kethyü hyulo kemvu genyu.

³Tsügenyu nle nyu hyulo, lo nyülo yo nsi rüchünlo, tsü ntsenlo lo nnyun kelulo, nle chon bin mvu yatselo, ale kerühunyu hontse ryüti; lo ale nyu gwünkho ka nka ryü tiyo nle tsü sha loho.

⁴Ai a-phinya nrhula kemvu temi peha le hagun Sardia nyu bin zun; lo anyugun le phinya kechon sen-o azen-o nsin nshye ti, kechamvule anyugun le tsonlo kü kethyü genyu.

⁵Temi ligühigüe kvulo kehü gü le tsühontse phinya kechon pe nben ti, lo ale kerhün lesü nyu a-zan shonla loho; lo ale Apvü mhundyü nyu, lo a-jolonyu mhundyü nyu a-zan zoshwi shüti.

⁶“Temi ligühigüe a-nyetin kebin gü, tsügü no Kapu gü le kehun dan ka kezo khwe nyülo lo.

⁷“Kenshün gü, Ketsin gü, David chabin sen kehü gü, a-le khinshye shülo temi nme-e khinlo kehogü, lo khinla lo temi nme-e khinshye nilo kehogü jo dan: “Thu pe Filadelfia nyu kehun jologü ka shülo.

⁸Ale ntho dan sha; hire, ale temi nme-e khinla lokeho, kakhin shye kebin nme khipe nmhundyü nyu shü bin nyo; nle nkekvu keshanyu le kebin ale sha; ajo zen hü, lo azan zomvu lamvu.

⁹Hire, ale satan sinagog nyu anyugun npvü nkuo anyugun le Judanyu letse hü, hire, ale tsüdan no npha nyu nkhün tsü ti, lo ale nso hü tsekethyü shalo ti.

¹⁰Nle nyhenhio ajo zen bin kelo genyu, kazü nyu yhun kebin nyu dan kegwa keshvu sha titseo kazü aphu semen ryü kezhü gü ka ale n ntsenlo ti.

¹¹Ale whütse ryü zhü nyo; temi nme-e no nkeda perün gü se sentinla mvu nrün genyu nle sen kehü gü tsü sen nko binlo.

¹²Temi ligühigüe kvu kelogü ale tsügü khipe a Sunggigü kershvuka nyu kachon nme thyü ti; lo a-le tsünyu thame kae chwila loho, lo ale a-ge a Sunggigü zan, lo a Sunggigü rünyi nyida gü, tsangge a Sunggigü ka nyu tsüryü kezhü Jerusalem keshün gü, lo azan keshün gü thu ti.

¹³“Temi ligühigüe a-nyetin kebin gü tsünyu no Kapu gü le kehun ka kezo khwe nyülo chi!

¹⁴“Amen, tenyenlo kekü gü lo jünkezo ketsingü, Sunggigü le nyhun keshü binzen gü jo dan: “Thu pe Laodikia nyu kehun jolo gü ka shülo.

¹⁵Ale ntho dan sha; nle kun-e mvu lo nyen-e mvu. Nle kun nmvue nyenlo akenyü nrün atale!

¹⁶Tsügenyu nle kun-e mvu lo nyen-e mvu tse nyenjwi kethyü genyu ale amün nyu n nthüyi lati tse bin laso.

¹⁷Kechamvule nle rüsü rükhü nyu, njün kehonyu, rhokedyü nyu, yhükepo nyu, lo kenyhün nyu tsekethyü shalo mvuo ale kenya nyu, akenya le bin nyo; lo ale thame rhokedyü ndi; tse zobin hünyo.

¹⁸Nno nnyalo nrün genyu ale nno aka mah pe ro nshün kela suna, lo nkenyhün nkejokepvü meno hyu mvulo nrün genyu phinya kechon lope henlo lotse, lo tha hyulo nrün genyu n yhütyü keyün dawa heilo lotseo nka zo hünyo.

¹⁹Ale temi ligühigüe so kehünyu tsünyu kemu tsin pe hi, lo nthyü nnyüo senthyü hünyo; tsügenyu nyhen thyüo nnyun kelulo.

²⁰Hire, ale kakhin ka so-o kakhin kekho bin hünyo; temi ligühigüe akhwe nyülo-o kakhin shye shü yatselo ale a-nyu yügü a-zen-o tyütsü ti, lo a-ko azen-o tyütsü ti.

²¹Temi ligühigüe kvulo kehü gü le ale kvulo-o apvü zen-o a-keda bin nyu bin kelo hontse ale tsünyu no azen-o akeda bin nyu binlo ti.

²²“Temi ligühigüe a-nyetin kebin nyu, tsünyu no Kapu gü le kehun dan ka kezo khwe nyülo chi!”