Read Southern Rengma Naga TESHAKESHÜ 4 Bible Online

TESHAKESHÜ 4 - Southern Rengma Naga bible

TESHAKESHÜ 4

¹Higü hi sika ale nrishü laryü, tsangge kakhin nme khinshye njü. Lo ale nyülo kerigü le shu kekhun khwe hontse a nthon-o zo, “Hiki küryülo, ale hisiki thyü mvulo keho dan tsin pe nhishü ti.”

²Tsonshü nyemhun ale Kapu gü nyu binla, lo hire, tsangge keda bin nme thyü pe bin njü, lo keda bin gü ge nme le dun bin.

³Lo tsüge dun kebin gü shwipe Jasper lo Sardius hontse, lo zengo süpe emeral hontse kethyü nme le keda bin tsügü hunpvü bin.

⁴Lo keda bin tsügü le kedabin nki pezi no a-hunpvü bin, lo keda bin tsü dan ge pelü min nki pezi le phi kechon ben nya lo a-pe ge suna keda perün pvü kü bin.

⁵Tson-o keda bin tsügü ge tsangkekechwe, tha khwen lo tsangkesen le chwiryü lo kedabin gü mhundyü nyu mah kemben khin tsenyü le nben bin, tsüdan tsüle Sunggigü Kapu tsenyü dan.

⁶Lo kedabin tsügü mhundyü nyu shyeshwi pe kethyü züda, kristol hontse kethyü nme hyu. Lo kedabin kehun a-te lizin hizin nyukhu rhün kehü pezi le bin, nyukhu tsüdan le a-mhundyü zin lo a-sizin a-yhütyü le swüpvü.

⁷Lo rhün kehü nyukhu kerigü le shünyho hontse, kenyhun gü le methu tse hontse, kenshen gü le a-mhun le temi mhun hontse, lo pezi gü le nye kehü logi nme hontse.

⁸Lo rhün kehü nyukhu pezi dan le nme le a-sekin tseroro, lo a-min aphu lo a-nyunzin a-yhütyü le swüpvü hü; lo nhennyu-e khejeki-e sun mvu tse: “Kenshün, Kenshün, Kenshün Npugü Sunggigü kekvu tsingü, nduka kehü lo ntsoka kehü lo siki ryü nrün gü.”

⁹Lo nyukhu rhün kehü pezi dan le kethonthen rhün kehü kedabin tsügü ge dun kebin gü zan shwe, rühvu lo chenkeno zoshü.

¹⁰Tsükatsü pelü nki pezi dan le kedabin tsügü ge kebin gü mhundyü nyu nkhün tsügü kethonthen rhün kehü gü rüshvu, lo anyugun npvü anyugun keda perün thope kedabin tsügü ge kebin gü mhundyü nyu shüo;

¹¹“Agun Npugü lo agun Sunggigü, zankechwi kerühvu lo kekvu hyulo kekü gü le nle. Kechamvule nle tha aphu nyhun shü, lo nkendo genyu tsüdan le bin lo yhun kelo le,” tsonshü.