Read Southern Rengma Naga TESHAKESHÜ 5 Bible Online

TESHAKESHÜ 5 - Southern Rengma Naga bible

TESHAKESHÜ 5

¹Lo kedabin gü ge dunkebin gü ben nyu a-njüzin, a-nyunzin lo a-sozin thu kenjü lesü nme sü-o mehor tsenyü pe vü kela nme le kebin ale hyu.

²Lo ale tsangge jolonyu kenko nme le nra sen-o, “Segü le lesü higü hie-o, lo mehor vü kela dan khinshye-o lesü sügü swülo gwa tila?” tse kebin hyu.

³Ai tsangge, nmvue kazü nyu, nmvue kazü hensin nyu temi nme-e lesü sü tsügü hielo, nmvue nrilo kekü min ndi la.

⁴Lo lesü sü tsügü hielo nmvue nrilo kekü min ndi kela genyu ale chüsa lola.

⁵Tsontsin pelünyu nme le aka, “Nle chü nyalo; hire, Juda tsipwen shünyho gü, David jwigü, le kvulo laso, tsügenyu a-le lesü tsügü, lo mehor tsenyü dan khinshyelo gwa so,” tsonshü.

⁶Tsontsin kedabin gü bin lunyu lo rhünkehü nyukhu pezi dan lo pelü ju dan nyu dushvu kela hontse kethyü tanyünyu nme le so kebin ale hyu, lo tsüle a-tse tsenyü lo a-yhütyü tsenyü, lo tsüle nipe kazü aphu nyu shü kehü Sunggigü Kapu dan.

⁷A-le ryüo kedabin ge kebin gü njüzin lesü sügü tsü khilo.

⁸Lo a-le lesü sügü khilo ntsin, rhün kehü nyukhu pezi dan lo pelü min nki pezi dan le tsügü Tanyü Nyugü mhundyü nyu nkhünrün pvü tinla; anyugun nme me tse kethyü aphu ben nyu lükhin lo chün a-rün kegwa pe sü kethyü suna khun sen kü hü, lo tsüle kenshün nyu dan kehi.

⁹Tson-o anyugun le lü keshün nme thyü, “Nle lesü sügü khilo, lo tsüge mehor dan khinshyelo kekü gü le. kechamvule ndushvulao nzi pe tsipwen lo khwen jo lo temi lo rünyi aphu rhinhi pe Sunggigü hon thyülo laso.

¹⁰Lo nle anyugun thyü pe anyugun Sunggigü genyu peshükeda raja kazü thyü shü laso; lo anyugun le kazü so keda thyü ti.”

¹¹Tsontsin ale shwishü laryü kedabin gü lo rhün kehü nyukhu dan, lo pelü dan kho lizin hizin tsangge jolonyu kechon khwen nyülo, tsüdan swü kethyü le yie tseryü thyü yie tseryü lo yieyie thyü yieyie,

¹²anyugun le nra sen-o zo, “Tanyü Nyugü dushvu kela gü tsügü le kekvu lo kenya lo thakesha lo kenko lo zankechwi lo teshwen hyulo kü le!” tson.

¹³Lo ale nyü kelo le tsangge lo kazü, lo kazü hensin lo zükedanyu lo tsünyu kebin nyukhu aphu jo hidan kezo ale sha: “Kedabin ge bin kehügü lo Tanyü Nyugü, no kethonthen kerühvu, zankechwi, keshwe lo kekvu gü thyülo!” tson.

¹⁴Tsontsin rhün kehü nyukhu pezi dan le, “Amen!” tse zoshü. Lo pelü dan le chetsügü rüshvu.