Read Southern Rengma Naga TESHAKESHÜ 6 Bible Online

TESHAKESHÜ 6 - Southern Rengma Naga bible

TESHAKESHÜ 6

¹Tsüselo Tanyü Nyugü le mehor tsenyü dan nyu nme khinshye kelo ale hyu, tsontsin rhün kehü nyukhu pezi dan nyu nme le tsangkesen khwen hontse, “Ryülo,” tse kezo khwen ale nyülo.

²Lo hire, ale keru kechon nme hyu, lo tsügü ge kebin gü ben nyu levü nme le bin, lo keda perün nme khipe a-tsüla, tsontsin a-le kvulo hü lo kvulo titseo chwila.

³Lo a-le mehor kenyhun gü khinshye lo ntsin, rhün kehü nyukhu kenyhun gü le, “Ryülo” tse kezo ale nyülo.

⁴Tsontsin keru kecha nme le chwiryü, lo tsüle keru kenhon nme; tsüge kebin gü no kazü nyu kengü kegwa khinla kegwa kekvu pe tsüla, tsügenyu temi le khinyunyu dushvu ti, lo zhethon keda nme khipe a-tsüla.

⁵Lo a-le mehor kenshen gü khinshyelo ntsin, rhün kehü nyukhu kenshen gü le, “Ryülo” tse kezo ale nyülo. Tsontsin hire, ale keru kemetsen nme hyu, lo tsüge kebin gü ben nyu kesükü nme le bin.

⁶Tsontsin rhün kehü nyukhu pezi dan dan nyu thakhwen nme hontse kethyü nyülo, “Tho kesü nme le khenyüme chün, lo shye ketewhen kesü kenshen le khenyü me chün, ai terzü lo vain zu bonshvula nyalo!”

⁷Lo a-le mehor pezi gü khinshye lo ntsin rhün kehü nyukhu pezi gü le, “Ryülo” tse kezo ale nyülo.

⁸Tsontsin hire, ale keru kepvü nme hyu lo tsügü ge kebin gü zan le kesi, lo Hades le a-then hü; lo zhethon, lo chenda kethyü, lo kenpen lo kazü nyu tehenthyü dan no kazü kenjün pe jünzi thyüo jünme boshvulo kegwa kekvu khipe anyugun tsüla.

⁹Lo a-le mehor pvüngü khinshyelo ntsin, Sunggigü jo genyu lo anyugun le sen kehü jünkezo genyu dushvu kela ju kapu dan le kershvubin gü hensin kebin ale hyu.

¹⁰Anyugun le nra sen-o, “O Npu keda tsingü, Kenshün lo Ketsin gü, nle jon dithen ki binlo rio kazü nyu keyhun nyu ju jünkera lo agun zi khen zo tila?”

¹¹Tsontsin phinya kechon pe anyugun nme me tsüla, lo anyugun kengüo mego thyü kehü ju lo anyugun pvünyu anyugun hontseo dushvula nrün dan penlo kemvuthen sun tselo tse anyugun ka zola.

¹²Lo a-le mehor tserogü khinshyelo ntsin, ale shwishü laryü, hire, kazü nnu sala; tson-o yhüko le metsen pe thyühü phi hontse la, lo shye le nhon pe tezi hontsela.

¹³Lo tsangkenbu terhi le kherosha kenjvü whün kerhi kela hontse tsangge shyenyü dan tsüle nrhio kazü nyu tsüryüla.

¹⁴Tson-o tsang tsüle lesü sü keto kela hontse ndila; tsontsin kazüthun lo zükehun kazü aphu anyugun bin nyu anyugun khi kelu la.

¹⁵Tsontsin kazü nyu rajanyu ju lo kedanyu ju, lo teri temi ju so keda dan, lo kenya nyu lo kekvunyu, lo medo nyu lo medo thyü kemvu nyu tsüdan aphu kazü kepekü nyu lo kazüthun ge lo tsokhin nyu gü kebu.

¹⁶Tson-o kazüthun dan lo tsokhin dan ka, “Agun ge chetsüryü lo, tson-o kedabin gü ge kebin gü mhundyü nyu lo Tanyü Nyugü nyunkekhü nyu agun kebulo lo.

¹⁷Kechamvule au nyunkekhü jon kedagü le ryü kelasi genyu, lo segü le sunbin logwa tila?”