Read Southern Rengma Naga TESHAKESHÜ 7 Bible Online

TESHAKESHÜ 7 - Southern Rengma Naga bible

TESHAKESHÜ 7

¹Tsüsika ale tsangge jolonyu minzi le tsangkenbu no kazü so nmvue züda nmvue senbin whün mvu nrün genyu kazü nyu tsangkenbu pezi dan tünsen kebin hyu.

²Lo yhüko kechwi kipon tsangge jolonyu kecha nme le, rhün kehü Sunggigü mehor sen tsükeryü ale hyu A-le nra sen-o, kazü lo züda tse kekvu pe tsü kela tsangge jolonyu minzi dan ka,

³“Ale Sunggigü gonyu dan senpvü ge mehor vüla kemvuthen hagun kazü nmvue züda nmvue senbin bokenthyü nyalo,” tsezo.

⁴Lo ale nyü kelo le a-ge mehor vükela Israel nyu tsipwen aphu kesin le temi yie tsime-o yie henzi pezi letse kethyü shalo.

⁵Juda tsipwen mehor vülo kela le yie tseryü kenyhun, Ruben tsipwen yie tseryü kenyhun, Gad tsipwen yie tseryü kenyhun,

⁶Asher tsipwen yie tseryü kenyhun, Naftali tsipwen yie tseryü kenyhun Manasseh tsipwen yie tseryü kenyhun;

⁷Simeon tsipwen yie tseryü kenyhun, Levi tsipwen yie tseryü kenyhun, Isakar tsipwen yie tseryü kenyhun,

⁸Zebulon tsipwen yie tseryü kenyhun, Josef tsipwen yie tseryü kenyhun, Benjamin tsipwen mehor vülo kela yie tseryü kenyhun

⁹Lo tsüsika ale shwishü laryü, hire, rünyi aphu nyu, tsipwen aphu nyu lo temi dan lo khwen kechacha kethyü temi le swülobu keho phi kechon keben temi danda le kedabin gü mhundyü nyu lo Tanyü Nyugü mhundyü nyu so bin, lo anyugun ben nyu kvunyü sen hü.

¹⁰Lo anyugun le nra sen-o, “Kenikelo le kedabin ge kebin gü Sunggigü lo Tanyü Nyugü kanyu gunryü le!” tson.

¹¹Lo tsangge jolonyu so-o kedabin bin hunpvü kebin dan lo pelünyu dan lo rhün kehü nyukhu pezi dan aphu kedabin mhundyü nyu nkhün tsügü Sunggigü rüshvuo,

¹²“Amen! Jochü, lo zankechwi, lo thakesha, lo chenkeno, lo kerühvu, lo kekvu, lo kenko le kethonthen Sunggigü hon le! Amen!”

¹³Tsükatsü pelünyu ju dan nyu nme le a nthon-o aka, “Phi kechon keben hidan hile dikipon nyu la, lo anyugun le dikipon ryü la?” tsonshü.

¹⁴Tsontsin ale a-ka, “Kedagü, nle sha bin nyo,” tsonshü. Lo a-le aka, “Hidan hile kenjün thyü sa kethyü gü nyu gunkeryü ju le, lo anyugun le Tanyü Nyugü zi nyu anyugun phinya thula lo thyü pe chon laso.

¹⁵Tsügenyu anyugun le Sunggigü kedabin mhundyü nyu hünyo, lo anyugun le nhennyue khejekie a-kershvuka nyu a-lothyü bin hünyo, lo kedabin ge kebin gü le anyugun sun bin hünyo.

¹⁶Anyugun le nnyo niloho, lo teri sin loho. Yhüko kenyü le anyugun pho nmvue kenyün nme-e anyugun gwün loho..

¹⁷Kechamvule kedabin lunyu kebin Tanyü Nyugü le anyugun kekhwen thyü ti, lo anyugun tsonri sen-o kerhüntsü zülvu nyu gunti; lo Sunggigü le anyugun yhütyü ge anyugun yhüphu shon kü lati.”