Read Southern Rengma Naga TESHAKESHÜ 8 Bible Online

TESHAKESHÜ 8 - Southern Rengma Naga bible

TESHAKESHÜ 8

¹Lo Tanyü Nyugü le mehor tsenyü gü khinshyelo ntsin, tegi kevüja peha kho tsangge nramvu nyen tsela.

²Tsontsin ale Sunggigü mhundyü nyu so kehü tsangge jolonyu min tsenyü hyu, lo shu tsenyü khipe anyugun tsüla.

³Lo tsangge jolonyu kecha nme le chwiryü, lo tharün kegwa kerokhin suna pe kethyü nme khisen-o kershvubin ka so bin; lo kedabin gü mhundyü nyu suna kershvubin gü ge kenshün nyu ju aphu kehi kerhünlo lotse tharün kegwa kechon khipe a-tsü shü.

⁴Lo tsangge jolo gü ben nyu tharün kegwa gü kekhu le kenshün nyu ju kehi sin-o Sunggigü mhundyü nyu küla.

⁵Tsüselo tsangge jologü le tharün kegwa kero khin gü khilo njüo kershvubin gü nyu mah khipe sülo-o shwen pe kazü nyu shü shü; tsontsin tsangpera thyü, tsangsen, tsangkechwe lo kazü nnu la.

⁶Lo shu tsenyü pen kehü tsangge jolonyu min tsenyü dan le shu khun shü titse ndo sen bin.

⁷Lo tsangge jolonyu keri gü le a-shu khun shü ntsin tezi kerhün kethyü tegwün lo mah thyüla, lo tsüdan tsü ja pe kazü nyu shü, tsontsin kazü gü kenjün pe jünshen thyüo jünme rola, lo senbin dan kenjün pe jünshen thyüo jünme rola, lo tehen kenjvü aphu rola.

⁸Lo tsangge jolo kenyhun gü le a-shu khun shü, tsontsin mah nnyü kebin kazüthun hontse kethyü nme shwe pe züda nyu shüla; tsontsin zü keda jünshen thyüo jünme le tezi thyüla,

⁹lo züda nyu rhün kehü nyukhu dan ko jünshen thyüo jünme le sila; lo züda nyu kehü run dan-e jünshen thyüo jünme nkela.

¹⁰Lo tsangge jolonyu kenshen gü le a-shu khun shü ntsin, tsüselo mah kenyü hontse shyenyü keda nme le tsangge nrhi tsüryü züri jünshen thyüo jünme nyu, lo zü kepün dan ka tsüla.

¹¹(Lo shyenyü gü zan le “kekhü.”) Tsontsin zü dan jünshen thyüo jünme le kekhü thyüla, lo zü le khü kela genyu temi kechon le zü gü genyu sila.

¹²Lo tsangge jolo pezi gü le a-shu gü khun shü, tsontsin yhüko jünshen Jünme, lo shye jünshen jünme, lo shyenyü jünshen jünme vüla, tson-o tsüdan jünshen jünme le zünla, lo nhennyu jünshen thyüo jünme le benshü mvula, lo khejenyue jünshen jünme no tsühontse la.

¹³Tsontsin ale shwishü laryü, logi nme le tsangne ki nyeo nra sen kehü khwen nyülo, “Tsangge jolonyu kecha mishen le shu khun shü titse kebin dan genyu kazü gü nyu kebin dan we che! che! che!” tse zobin.