Read Southern Rengma Naga TESHAKESHÜ 9 Bible Online

TESHAKESHÜ 9 - Southern Rengma Naga bible

TESHAKESHÜ 9

¹Lo tsangge jolonyu pvün gü le a-shu khun shü, tsontsin tsangge shyenyü nme le nrhio kazü nyu tsü kela ale hyu, lo tekhwün kentsun gü chabi pe a-tsüla.

²Tson-o a-le tekhwün kentsun gü khinshye shü ntsin, tekhwün tsügü nyu mahmi keda kekhu hontse khu chwiryü, lo tekhwün tsügü nyu mah kekhu gü genyu yhüko-e lo tsang-e zünla.

³Tsontsin mah kekhu tsünyu tsekhvü le kazü nyu chwiryü; lo kazü nyu Zukeshonyu dan kekvu hontse kekvu pe tsekhvü dan ko tsüla.

⁴Lo anyugun no kazü nyu tehen, nmvue tehen kenjvü, nmvue senbin nme-e pe kedukeru thyüla nya lotse la, ai temi a-senpvü ge Sunggigü mehor bin kemvu dan nthyü nnyü lotse zoshü la.

⁵Lo anyugun no tsüdan boshvu nya, ai shyepvün tsüdan nchün ndyü lotse zoshüla, lo zukeshonyu le me tsü shü lo thyü kehü tsühontse, tsüdan le nchün ndyü kethyüe tsühontse.

⁶Lo tsükatsü temi le kesi fü soti, ai tsü hyu loho; anyugun le kesi nnyü ho ti, ai kesi le anyugun kebu tinla ti.

⁷Lo tsekhvü tsüdan joja le teri thyü titse ndo sen kehü keru hontse, lo anyugun pe ge shwikeshü le suna perün kepvü hontse, lo anyugun mhun le temi mhun hontse.

⁸Lo anyugun pehü le tenunyu pehü hontse, lo anyugun hyü le shünyho hyü hontse.

⁹Lo anyugun nyun kesun le tegi lope kethyü nyun kesun hontse, lo anyugun sekin kenye khwen le keru gari kechon le tin sen-o teri nyu gü kejü khwen hontse.

¹⁰Lo zukeshonyu hontse anyugun ma lo anyugun shin le bin, lo shyepvün temi nthyü nnyü nrün genyu anyugun kekvu le anyugun ma ge bin.

¹¹Anyugun le tekhwün kentsun gü nyu jologü lope anyugun so raja hontse thyü hü; Ibrinyu khwen ki a-zan le Abadon, lo Griknyu khwen ki Apolyon.

¹²Che, tsekethyü kerigü le gü laso; hire, che, tsekethyü kenyhun gü le ryü sin ti zun.

¹³Tsüsika tsangge jolo tsero gü le a-shu khun shü, tsontsin ale Sunggigü mhundyü nyu kebin suna kershvubin gü quenzi nyu thakhwen nme nyülo.

¹⁴Thakhwen tsügü le shu sen kehü tsangge jolo tsero gü ka, “Eufrates züri kedagü ka jolonyu minzi phin pe kebin dan shwe shü lalo,” tsonshü.

¹⁵Tsontsin temi ju jünshen thyüo jünme dushvula nrün genyu jolonyu minzi no tegi kevüja tsügü, jon tsügü, shye tsügü lo chen tsügü genyu ndo pe kebin dan shweshü la.

¹⁶Ale nyü kelo le, teri temi tsüdan swü kethyü le yie tseryü ryü thyü yie tseryü gwünhvu ge.

¹⁷Lo ale tsemin ki hyu kethyü le keru dan lo tsü ge kebin dan shwi pe hihontse; anyugun nyunkesun le mah hontse nhon, tsela, lo nyhün, lo keru dan pe le shünyho pe hontse; lo anyugun mün nyu mah lo mah kekhu lo mahtso le chwiryü.

¹⁸Anyugun mün nyu chwikeryü mah, mah kekhu lo mahtso, kenjün kethyü kenshen hidan hipe temi jünshen thyüo jünme nkela.

¹⁹Kechamvule keru dan kekvu le anyugun mün nyu lo anyugun ma ka bin kethyü genyu; anyugun ma le peri hontse, lo tsü denzin-e a-pe le bin, lo tsü lope me nthyü nnyü hü.

²⁰Kenjün kethyü hidan hipe boshvu kensen temi dan le, anyugun npvü anyugun ben lope kethyü tho dan nyu anyugun nyun kelulo, nmvue tero kershvu lo tha hyu hü kemvu, nmvue thakhwen nyülo hü kemvu, nmvue tsonchülo hü kemvu suna, nmvue raka, nmvue lazo, nmvue tso, nmvue tesen teromen kezü kershvu kheshülo mvula.

²¹Lo anyugun le me dukeshvu, nmvue tümvu, nmvue keyüla nmvue kerühu nyu anyugun nyun kelulo mvula.