Read Southern Rengma Naga RUTH 2 Bible Online

RUTH 2 - Southern Rengma Naga bible

RUTH 2

¹Naomi nyepvü Elimelek kami nyu kenya nyu mele a-khwe a-jo nyü kehü a-zan le Boaz tse kethyü nme le bin.

²Khenyüme Ruth le Naomi ka zoshü, “Ano low ki tsügü lowgvü nyu sifü lota. Temi peha le ano a-zen-o thatho kethyü mi hyulo tsentsü tile.” Naomi le zoshü, “Gülo anyugi.”

³Tson-o Ruth le low ki tsüo sifü bin. Lo tsüle Boaz low thyü bin.

⁴Tsüka Boaz le Bethlehem ki hü tseo ryü thatho thyü kebin dan ka, “Npugü no hagun zenbin kelo gü thyülo!” tsonshü. Anyugun le, “Npugü no jochü pe ntsülo,” tsonshü.

⁵Boaz le logvü nyu ketsen kebin gü ka, “Tenu gi lile segü la?”

⁶Tsontsin temi tsügü le zoshü, “A-le tesin Moab ki Naomi le zen keryü gi le.

⁷A-le aka a-no logvü nyu then-o sifü lolo tse hishü. Tson-o ntsenyü nshwe ka nyu thathyü tseo ntsoka rüyü bin nle.”

⁸Tsontsin Boaz le Ruth ka zoshü, “Ale nka tha peha zoshü tile. Low higü ka nti ame kecha ki sifü nya. Hika tenunyu ju zen-o thathyülo;

⁹anyugun le dika logvü yo shwio tsüka bin lo. A temi ju no nkevü ya lotse ale zoshü laso. Nle lihi gwenkho ka-e teri lo gü anyugun le laki nyu zü lü pfüryü kebin tsülo.”

¹⁰Tsüselo Ruth le nkhün tsügü kazü rün-o zoshü, “Nyuthyü letseo nle aphin rüchün sa bin nla? Nyuthyüo nle tesin nme shwinjün sa tila?”

¹¹Boaz le zoshü, “Nnyepvü kesi siki nle nnyügi ge nyu hontse thyü shüyo ale aphu nyülo laso. Nle dihontse npvü njvü lo nrünyi khe lao ryü nle himhundyü shahü kemvu temi dan nyu yhun titse ryü yo ale sha laso.

¹²Nle nyuthyü shüyo Npugü no nchün thyü pe ntsü nda. Israel nyu Npugü Sunggigü, nle a-tesun lo titse keryü gü no nchün thyü pe ntsülo!”

¹³Ruth le zoshü, “Kedagü, nle a njün sale. Ale ngonyu ju nme zen ketun mvu-e nle bwenye tse a nthon-o ano akenyü kvu laso.”

¹⁴Ketyüketsü gwenkho ka Boaz le Ruth ka zoshü, “Ryü tensü nme pe keshonzü ka ntsen tyü lota.” Tson-o a-le tha kethyünyu ju zen dun lo-o Boaz le shekeshvu peha kenye pe a-tsüshü. Tson-o a-le tyü kenyü kho tyülo-o peha nsenla.

¹⁵Tsüsiki a-le sifü nigü, lo Boaz le logvünyu ka zoshü, “Lowsin le che bin-e thame zo a-khin nyao no khi lolo. Tsünyeki lowsin nyue peha sütho pe hoshü njüo no khilo.”

¹⁷Tson-o Ruth le low nyu sifü bin-o ngwenkishü, lo a-le nyuh gü laryü kilogram tseryü kepen thyülo.

¹⁸A-le shye dikho fü kequen loyo pfüryü a-nyü hishü. Lo a-le tyükensen a-chvü tsü ko senryü a-tsü shü.

¹⁹Naomi le a-ka ketsoshü, “Nle dikipon hi fü kequen lola? Nle segü low ki thathyü hü ola? Sunggigü no jochü pe nshwi njün keshü temi gü tsülo!” Tson-o Ruth le Nami ka a-le Boaz tse kethyü temi nme low ki thathothyü letse zoshü.

²⁰Naomi le nrao, “Npugü no jochü pe Boaz tsü nda!” “Npugü le kerhün nyu lo kesinyu ge-e a-le zoshwishü kenjü tsü thyü shü hünyo.” A-le zosin-o, “Temi tsügü le ngun khokeni nshvunye, ngun nucha kethyüi nyu nme le.”

²¹Tson-o Ruth le zoshü, “Kegwatsin gü le lowgvü thüla kemvuthen ano a-thakethyü nyu then-o sifü lolo tse a-le aka zoshü le.”

²²Naomi le Ruth ka zoshü, “Ele, anyugi, Boaz low nyu thatho thyükebin tenunyu ju zen thakethyü güle ngenyu gwakvu ti le. Nle kechanyu low ki gü lo mele n nshwe so-e logwa!”

²³Tsügenyu Ruth le barley lo thoshe lowgvü bulo kemvuthen anyugun zen-o thathyü. Lo a-nyügi zen yhun bin.