Read Southern Rengma Naga RUTH 3 Bible Online

RUTH 3 - Southern Rengma Naga bible

RUTH 3

¹Kenkhin ki Naomi le Ruth ka zoshü, “Nno nnpfü nka no binlo nrün genyu ale n nyepvü nme füshü mvuloshvu.

²Rüchün lo nle a-temi zen-o thathyü kehü tenunyu ju npugü Boaz tsüle ngun shvunye nyu le. A khwenyülo. Ntsoje a-le barley shye nyuh ti.

³Tsügenyu zülu la, terzü rünkegwa peha pe nge shülo lo nphinya kegwatsin senlo. Tson-o a-le shyenyuh kebin bin ka gülo, ai a-le tyütsü lola kemvuthen nle tsüka kebin a-no sha nya.

⁴A-le dika zhübinyo shatsentsü lo, tson-o a-le zhütin kela siki a-phi sühvu gü a-pha ka zhü binlo. Tsonyatselo nno nyuthyü tiyo a-le nka zoshü ti.”

⁵Ruth le zoshü, “Nle kezo aphu ale thyüti.”

⁶Tson-o Ruth le shyekenyuh bin ki gü a-nyü le aka kezo hontse thyülo.

⁷Boaz le tyütsü lo njüo, a-shekerhün thyü gü barley shye thun khoka zhü güla. Lo Ruth le nkhvu tsegü a-pha kehen-o a-phanyu zhü bin.

⁸Khejenyu ki a-le chon soryüo kekhün gü laryü tenunyu nme le apha ka zhükebin hyulo-o a-dun thyüla.

⁹Tson-o a-le, “Nle segü la?” tse ketsoshü. Tsügi le a-jokenio, “Ruth le, kedagü.” “Nle a nucha kethyüi, akhokeni a shvunye nyu nme. Tsügenyu a khipe nnu thyü lota.”

¹⁰Boaz le zoshü, “Npugü no jochü pe ntsülo.” “Nle nnyü ge thyükeshü nyeki-e kaminyu ge joketsin kethyü gonkvu kethyü tsinshü. Nle ponyu kenyanyu nmvue kendinyue nrio tsüdan fü gü kethyüi, ai nle tsonmvu.

¹¹Tsügenyu ntsoka we nnyun nkhi nya, Ruth. Ale nle kehi aphu thyü ntsüti; rünyi nyu temi aphu nle tenunyu kentsen keserinyu nme tse shakebin genyu.

¹²Ai anyeki nkhokeni nshvunye lo n nucha kethyüi nshvunye nyu nme le bin zun

¹³Tsügenyu ntsoje hika sun tseo lonyü ki a-le n nuchalo tile nmvuyo kegwen sha loti. A-le tsonlo yatselo gwaso; nmvuyatselo ale nshwi loti tse kethyü rhünkehü Npugü zan sen-o swe bin nle. Tsenben kemvuthen hika zhü binlo.”

¹⁴Tson-o a-le Boaz phaka zhü bin-o tsangben chwiryü mele a-hyukemvuka sola, a-le tsüka hü tsekethyü Boaz le temi nme no shanyü kemvu genyu.

¹⁵Boaz le a-ka zoshü, “Nphi yhün pe hika lashü lo.” Tson-o a-phi pe lashü laryü Boaz le barley shye kilogram nki kepen ja shüo penso pe a-npfü shü. Tson-o a-le tsü pfü rünyi ki raniryü.

¹⁶A-le kaki keryü ka, a-nyü le, “Anyugi dihontsela,” tse ketso shü. Ruth le Boaz le agenyu thyükeshü aphu a-ka zoshü,

¹⁷A-le zosin-o, “A-le ano akenben rani nkiryü loshvu letse aka zo-o barley shye hi khishü le.”

¹⁸Naomi le a-ka zoshü, “Dihontse tiyo shalo kemvu ka we ma tse bin tse, Ruth. Thatho higü penkemvu ka we Boaz le sun bin kemvui so.”