Read Southern Rengma Naga RUTH 4 Bible Online

RUTH 4 - Southern Rengma Naga bible

RUTH 4

¹Boaz le rünyi gü khinrun ka kenthon bin ka gü dun bin. Tsontsin Boaz le zo kebin Elimelek khokeni tsin a-shvunye gü tsüle ryü laryü Boaz le, “Apvü gü hika ryü dun lota,” tse a-koshü. Tson-o a-le tsüka dunlo.

²Lo Boaz le rünyi nyu sharhinyu mi tseryü zenryüo tsüdan kono dunlo. Anyugun le dun kelo ka,

³a-le a-nyenyu gü ka zoshü, “Naomi le Moab ki bin tseo raniryü laso, lo a-le ngun shvunye gü Elimelek lobu nme jwe nyü bin,

⁴lo a kerüchün le nno tsü rüla shazü. Tsügenyu nle heinyü yatselo ntsoka hika dun kebin temi dan mhundyü ka hei lola. Ai nle lonyümvu yatselo zoshülo, hei kezü le nle kerigü lo tsüsika ale genyu.” Temi gü le zoshü, “Ale hei ti.”

⁵Boaz le zoshü, “Gwasa, ai nle Naomi ka lobu gü hei yatselo Moab nyu magi gü Ruth ko hei ti, tson-o lobu gü no sikela gü kami hon thyü bin ti.”

⁶Tsüselo temi gü le zoshü, “Tsonkethyü we ale lobu gü hei lokegwa akenjü kebin gütsü khe lati, tsüle a-kon le a npfü anyenyu le tsü gwekemvui genyu. Nle hei lota. Ale hei mvu lati.”

⁷Tsügwenkho ka, thajwe nmvue,kelu tiyatselo jwe kethyü gü le a-phakü tho pe hei kebin gü tsü kehü tejvü le bin. Hihontseo Israel nyu le jopenron kela tsin shü hü.

⁸Tsügenyu temi gü le Boaz ka, “Nle tsü heilo lalo,” tsezo keshü ka, a-le a-phakü tho pe Boaz tsüla.

⁹Tsüselo Boaz le tsünyu kebin sharhi kecha ju aphu ka zoshü, “Nthu ale Naomi ben nyu Elimelek lo a-nyu Chilion lo Mahlon au hon aphu heilo laso tse kethyü hagun aphu le tsü shahu dan.

¹⁰Tsünyeki , Mahlon nu magi gü Moab nyu Ruth tsü le anu so. Hile kesigü hon no kesigü kaminyu bin lo a-kami no a-temi dan nyu lo a-rünyi nyu bin ti. Nthu hagun le hi shahu ju le.”

¹¹Tsontsin sharhi ju lo kecha dan le zoshü, “Ele, agun le shahu dan le. Npugü no nnu thyü pe nyu kechon zen pe Jakob ketsü Rachel lo Leah au hontse shü nda. Nno Efrath pfüphun dan nyu kenyanyu thyü lo Bethlehem nyu zankechwi thyülo nda.

¹²Tenunyu higi ge Npugü le khishü nrün nnyenyu no nkami thyü pe Juda lo Tamar au nyugü Perez kami hontse lo nda.”

¹³Tson-o Boaz le Ruth pe a-nu thyülo-o zen a-kaki gun la. Npugü le jochü pe a-tsüo a-le nyuphu pfülo-o pechenyu nme nnyu shü.

¹⁴Tsüselo tenunyu jule Naomi ka zoshü, “Npugü shwe! A-le n nucha nrün genyu nthu ntsenyu nme khishü laso. Ponyu gü no Israel nyu dan nyu a-zanchwi lo nda!

¹⁵Nmogi le nso hü lo a-le pechenyu mi tsenyü nyeki kerüche thyü pe ntsü laso. Lo ntsoka a-le nnyugü nyu khipe ntsü laso, a-le nno yhun nsherhün lo nkethen gwenki n ntsen loti.”

¹⁶Noami le nyugü pen lo, thün pen, lo a-ntsenlo la.

¹⁷Kajon nyu tenunyu ju le ponyu gü zan pe Obed tholo. Anyugun le temi aphu ka, “ pechenyu nme nnyu pe Naomi tsüla sele tse zoshü!” Obed nyu le Jesse, David a-pvü.

¹⁸Hi le Perez ka gü David keti kamidan: Perez, Hezron, Ram, Amminadab, Nahshon, Salmon, Boaz, Obed, Jesse, David.