Read Southern Rengma Naga 1 SAMUEL 1 Bible Online

1 SAMUEL 1 - Southern Rengma Naga bible

1 SAMUEL 1

¹Efraim tsipwen nyu Elkanah tse kethyü temi nme le Efraim rincho ki Ramah rünyi nyu yhun hü. A-pvü le Jeroham lo a-bon le Elihu, Zuf Pfüphun nyu Tohu kaminyu.

²Elkanah le a-nu mihvu bin, Hanah lo Peninnah. Peninnah le a-nyenyu bin ai Hannah we nyu ndi.

³Chen kechwi Hannah le Ramah nyu bin-o Shiloh ki gü kerüshvu thyü pe Kekvutsin Npugü tsü hü, tsüka Eli nyu mihvu Hophni lo Phinehas tsele Npugü püshükeda thyü hü.

⁴Elkanah le kerüshvu kethyü tsen thyü gü jün me pe Peninnah tsü lo jün meme pe tsügi nyudan nmeme tsü hü.

⁵Lo a-le Hannah sosa hüe jünme nti pe a-tsü hü, Npugü le a-no nyuzen mvu kela genyu.

⁶Npugü le tsügi no nyu ndi kela genyu a-kentsun gü Peninnah le a- nshwe lo a-kemeni hü.

⁷Chen kechwi tse anyugun Npugü ka ki gülo Peninnah le Hannah nyun thyü nshvushüo no chüo thame tyütsü mvula la tse.

⁸A-nyepvü Elkanah le a-ketso-o, “Hannah nle nyuthyüo nnyungwamvu hü nla? Ale pechenyu nyu mitseryü nyeki-e nso gwakvu hümvu ole?”

⁹Khenyüme anyugun Shiloh ka Npugü kanyu tyütsü lo kela sika Hannah le solo. A-le a-shese ritsin-o Npugü ka kehithyüo chübin. Tson kebin ka, Püshükeda gü Eli le kakhin khoka a-bin ge dun bin.

¹¹Hannah le swe-o: “Kekvutsin Npugü, n gogi a higü nrishü ta! A kenjün kethyü hi shwishüo a rüchün shülo! A nmhinla nya ta! Nle pechenyu nme pe atsü yatselo ale a-rhünthen a-khikho pe ntsü lati lo a-no thame ka-e a-pethu loho tse ale zoshwishü bin nle.”

¹²Hannah le khe mvutse Npugü ka kehithyü thonsa kebin Eli le a-müntse nribin.

¹³A-le nramvuo hibin; a-müntse nnu bin, ai a-khwethyü mvu. Tsügenyu Eli le a-no nzeü bin ado tse rüchün la,

¹⁴tson-o a-ka zoshü, “Nkenzeü pe mehi bin nya! Nzu ketsü khe lao tsentsü lo!”

¹⁵Tsontsin tsügi le zoshü, “Nmvu, ale nzeü mvule, Kedagü.” Ale zu tsümvu! Ale a shese ritsin-o a kenjün kethyü pe Npugü mhundyü nyu shüo kehithyü kebin gwenzin.

¹⁶Ale tenunyu serikemvu nyu nme le tse rüchün nya. Ale kenjün thyü ritsin kethyü genyu hihontse kehithyü bin nle.”

¹⁷Tsüselo, Eli le zoshü, “Nnyun bwe-o gunlo, Israel Sunggigü no nle nyu hishüyo pe nketsü gü thyülo.”

¹⁸Tsügi le a-jokenishü, “Nno a-zintse a njün hü nda.” Tson-o a-le gü tha peha tylo, lo a-nyun gwamvu nimvula.

¹⁹Lonyü gü Elkanah lo a-kaminyu le nshwe so-o Npugü r"shvu shüo anyugun ka Ramah ki rani gunla. Elkanah le a-nu Hannah zen kengü shü, tsontsin Npugü le tsügi kehi kenishü.

²⁰Tson-o a-le nyuphu pfü lo-o pechenyu nme nnyu lo. Lo Tsügi le, “Ale Npugü ka a-hilo le tson-o a-zan pe Samuel tholo.”

²¹Elkanah lo a-kami nyu le Shiloh ki gü tha khipe Npugü rüshvu lo a-le zoshwishü kenjü kerüshvu kerüche kethyü gwenkho le niryü.

²²Ai gwenkho higü ka Hannah le gü mvula. A-le a-nyepvü ka zoshü, “Nyu güle a-hontsü mvulo nyemhun ale a-zen Npugü kaki güti, lo a-le a-yhunthen tsü nyu bin ti.”

²³Elkanah le a-jokenishü, “Gwale, nmhundyü ka kegwatsin gü thyülo; a-le a-hontsü kebin then kanyu bin lo. Nle zoshwikeshü tsü ketsin thyü Npugü no thyü shü nda.” Tson-o Hannah le kanyu bin-o a-nyu gü nucha tin la.

²⁴Tsügi le a-leyi shükela sika; a-zen Shiloh ki gü, methu tse chenshen nyu nme, tho kilogram tseryü lo vainzu thyügitsun nme tse sen-o. Tsügi le Samuel zen-o Shiloh nyu Npugü kaki kegü tsüle Samuel le bwe bin zun.

²⁵Anyugun le methu tse gü dushvu kela siki ntsen nyugü zen Eli ki gü.

²⁶Hannah le a-ka zoshü, “Akemu jü shülo, kedagü. Nle a shabin le mvula? Hika so-o Npugü ka kehithyü kebin nle kehyu tenunyu gü tsü le ale le.

²⁷Ale a-ka ntsenyu higü hishü laryü a-le pe atsü laso.

²⁸Tsügenyu ale a-khikho pe Npugü tsü bin nle. A-le rhünkebin then Npugü hon thyü ti.” Tson-o anyugun tsüka Npugü rüshvu.