Read Southern Rengma Naga 1 SAMUEL 11 Bible Online

1 SAMUEL 11 - Southern Rengma Naga bible

1 SAMUEL 11

¹Shyeme siki Amon nyu raja Nahash le a-rihü zenryü Gilead kazünyu kebin Jabesh ntsun-o tsü hunpfü lola. Jabesh temi dan le Nahash kazo, “Agun zen gwatho lalo, lo agun le nno agun so gon ti,”tse zoshü.

²Nahash le anyu jokenishü, “Hagun le thakonme hi thyü yatselo ale hagun zen gwatho ti: ale hagun aphu yhütyü nzhügü tseritho lati, tson-o Israel nyu aphu no keja pfü ti.”

³Jabesh nyu sharhi ju le zoshü, “Jon tsenyü gwenkho pe agun tsüo agun no lilo nipe Israel nyu kazü aphu ka shülo. Tson-o nme-e agun chemvu yatselo agun le nben nyu yüryü lati.”

⁴Lilonyu le Saul le yhun kebin Gibeah ka ryü jolo zoshü ntsin temi aphu rhokedyü thyü chü sola.

⁵Saul le methu tse zen low ki tsüo ryüzhü, “Nyuthyüla sela? Nyu genyu temi aphu chübin nla?” tse ketso shü. Tsüka anyugun le Jabesh nyu lilo nyu le zokeshü pe a-ka zoshü.

⁶Saul le jo hi nyülo ntsin Sunggigü kapu le a-ge ryüo nthün sa lola.

⁷A-le methu tse kenyhun duthü durü lo-o lilo nyu no sen Israel nyu kazü aphu kenjün-o “Ligü higü Saul lo Samuel then-o terinyu gükemvu gü methu ge hihontse thyü lati!” tse zoshü. Israel nyu temi le Npugü le anyugun aphu ge nyuthyü shü tiyo nshvu lao aphu chwiryü la.

⁸Saul le anyugun zenryü Bezek ka kequen lo: Israel temi lak kenshen lo Juda temi yie shenryü.

⁹Anyugun le Jabesh nyu lilo dan ka zoshü, “Hagun temi dan ka sendu ki nhenyu lvu mhundyü anyugun kenishwi shü lati tse zo shülo.” Jabesh temi dan le jolo tsü shalo njüo anyugun sherhün sa lao

¹⁰Nahash ka zoshü, “Senduki agun le nben nyu yüryü lati, lo nle agun ge nyuthyü nyüyo thyü logwa.”

¹¹Tsüje Saul le a-temi kenjün pe danshen thyü lo-o nshweka kehü tsügü Amon nyu dan kensenbin whe. Tson-o nhenyu tsüle anyugun dushvula. Rhünkelo dan le nren nru tinla.

¹²Tsüselo Israel nyu le Saul ka zoshü, “Saul no agun raja thyü loho tse kezo temi dan tsüle dikipon bin nla? pe agun ben ka shülo agun le dushvu lati!”

¹³Ai Saul le zoshü, “Nthu temi nme dushvu loho, hile Npugü le Israel nyu kenishwikeshü jon genyu.”

¹⁴Samuel le anyugun ka zoshü, “Ngun aphu gwengwa Gilgal ka nigü Saul le ngun raja tse zoshwi tile nu.”

¹⁵Tson-o anyugun aphu Gilgal ka gü Saul le raja le tse zoshwi shüla. Anyugun le kepvüshe kerüshvu thyü shü, tson-o Saul lo Israel nyu aphu shekerhün thyü salo.