Read Southern Rengma Naga 1 SAMUEL 12 Bible Online

1 SAMUEL 12 - Southern Rengma Naga bible

1 SAMUEL 12

¹Samuel le Israel nyu dan ka zoshü, “Hagun le aka nyuhiyo ale tsü thyüshü laso. Ale raja nme khipe hagun so keda thyüshü laso,

²lo ntsoka we a-le hagun tsonri tiso. A we then-o ape pfü laso, lo anyu dan le hagun zen bin nyo. Ale a nchenyu ryü ntsoka keti hagun sharhi thyüryü.

³Ale hika bin nyo. Ale hagun mhundyü nyu tha lihi-e thyüzü njü yatselo ntsoka Npugü lo a-le kejü kelo raja gü mhundyü ka a nmu shülo. Ale temi ligü higü methu nmvue gada khilo lale? Ale ligü higü sala nmvue nshwe lale? Ale ligü higü jvüjwe khilo lale? Ale tha hidan peha thyü njü yatselo, ale khilo kela pu thonila tile?”

⁴Temi dan le a-jokenishü, “Nmvu, nle agun sala nmvue nshwe lamvu; Nle temi nme-e hon thame khilo lamvu.”

⁵Samuel le anyugun jokenishü, “Ale thame thyüzü kenjü hagun le hyulo mvutse kethyü nthu Npugü lo a-le kejü kelo raja gü le kemisha le.” Anyugun le zoshü, “Ele, Npugü le ngun jaka kemisha gü le.”

⁶Samuel le zonio, “Mosa lo Aron kejü kelo gü lo Ijipt ki hagun bon nyu zen chwiryü kelo gü tsüle Npugü.

⁷Hagun bin ka so tselo, ale Npugü mhundyü nyu hagun nmuo Npugü le hagun lo hagun bon nyu kenikeshü a-tho kekvu aphu zope hagun no rüchün ni loti.

⁸Jakob lo a-kami jule Ijipt ki ketsü ka Ijipt nyu le anyugun nshwela, ts"genyu hagun bonnyu le Npugü ko-o keche hishü lo a-le Mosa lo Aron nishüo no anyugun zen chwiryü kazü higü nyu binlo.

⁹Ai temi dan le anyugun Npugü Sunggigü nmhinla, tsügenyu a-le Filistian lo Moab nyu raja gü lo Hazor nyida nyu rihü dan so keda gü Sisera no hagun bon nyu zen kenren-o anyugun nyeki kvu lola.

¹⁰Tsontsin anyugun le Npugü ko-o zoshü, “Agun le rani gü Baal lo Asharte teromen rüshvu tinkela genyu mu laso. Agun shwikerüchün nyu ben nyu agun kenishwi shülo, agun le nrüshvu tile!”

¹¹Lo Npugü le Gideon, Barak, Jephthah lo kenkhin ki a nishü. Agun aphu shwikerüchün nyu ben nyu hagun kenishwishüo hagun no kenshvu ndio yhun.

¹²Ai hagun le Amon nyu raja gü Nahash le hagun whe titse kebin hyukeshü ka Npugü pe hagun raja thyü mvuo, ‘Agun le raja nme no agun so gon nyü le tse aka zoshü.’

¹³“Tsügenyu hagun le kejü kelo raja gü le hi kare; hagun le a-hi kethyü genyu Npugü le a-khipe hagun tsüshü laso.

¹⁴Hagun le Npugü, hagun Sunggigü rühvulo, a-lothyülo, a-khwenyülo, a-johokeshü zenlo, hagun lo hagun raja-e a-sithenlo yatselo tha aphu hagun genyu gwa loti.

¹⁵Ai hagun le Npugü khwenyümvu lo a-johokeshü zen mvuya tselo, a-le hagun lo hagun raja ntsun ti.

¹⁶Tsügenyu hagun bin ka so tseo Npugü le hagun ge nyu thyüshü nrün tha keda dan nrishülo.

¹⁷Hile kenda gwenkho tson le mvula? Ai ale kehi thyüshü lo Npugü le tsangkesen lo tsangri nishü ti. Tsonshü yatselo, hagun le raja nme hi kethyü tsüle hagun le Npugü kentsun kemu keda thyü laso tse kethyü rüchün lota.”

¹⁸Tson-o tsünyu Samuel le kehi thyüshü, tsünyü Npugü le tsangkesen lo tsangkenri nishü. Tsüselo temi aphu Npugü lo Samuel au nshvula,

¹⁹tson-o anyugun le Samuel ka zishü, “Kedagü, Ncheno-e agun no sila mvu nrün genyu Npugü nSunggigü ka gun genyu hishülo. Ntsoka we agun le, agun kemvu kecha aphu nyeki raja nme hio mu laso tse kethyü rüchünlo lao.”

²⁰Samuel le anyugun ka zoshü, “Nshvu nya, Hagun le serikemvu tsühontse thyü lae Npugü kheo rani lanya, ai hagun nyun aphu sen a-lothyü lo.

²¹Ketsinkemvu tero dan then günya; anyugun le ketsin kemvu genyu hagun keche nmvue kenishü loho.

²²Npugü le hagun pe a-npvü a-temi thyü titse rhilokela genyu a-le hagun khela loha, a-le swe laso.

²³A genyu we, ale hagun genyu kehi thyümvu lao mupe a-ntsun kela Npugü le a-kendo mvu. Tsonkethyügü mvule, hagun le nyuthyülo hagun genyu gwa lo a-zü yo ale pe hagun senthyü ti.

²⁴Hagun nyun aphu sen-o Npugü jozen lo a-lothyü lo. A-le hagun genyu thakeda thyükeshü dan rüchün hülo.

²⁵Ai hagun le kemu thyüzin bin yatselo hagun lo hagun raja-e nke lati.”