Read Southern Rengma Naga 1 SAMUEL 13 Bible Online

1 SAMUEL 13 - Southern Rengma Naga bible

1 SAMUEL 13

¹Saul le a-keyhun chen henpvün ka raja thyülo lo a-le chen hvu Israel raja thyü kebin ka temi yie shen kejü lo-o anyugun yie hvu no a-zen Bethel rincho ki Michmash ka binlo yie me nipe Benjamin tsipwen kazü Gibeah ki shüla. Lo a-sen dan nipe kaki shüla.

³Jonathan le Geba nyu Filistian nyurihü so kedagü dushvu la, lo Filistian nyu aphu tsü rüla nyülo la. Tsüselo Saul le lilo nishüo Ibrinyu kope terithyü nrün genyu kazü apentha ka shukhun shü lotse nishü.

⁴Israel nyu aphu ka Saul le Filistian nyu rihü so kedagü dushvu lao Filistian nyu le anyugun nrhibin nle tse zoshüla. Tsügenyu temi dan le Gilgal ka Saul ki ryü.

⁵Filistian nyu le Israel nyu zen kenren titse kequenlo; anyugun le terigari yie shenryü, keru shüpahü yie tsero lo shüpahü le chon pe zida se nyu hachon hontse bin. Anyugun le Bethaven nphozin gü Michmash ka kensenbin thyülo.

⁶Tson-o anyugun le kvusa tse Israel nyu whe ryü anyugun no rhokedyü thyü lola. Israel nyu peha le tsokü lo thakü nmvue tsokhin ki nmvue tekhwün lo zülvu nyu kebu sola;

⁷kechanyu le Jordan pfüthüo Gad lo Gilead lojvü ki güla. Saul le Gilgal nyu bin zun lo a-zenkehü temi dan le nshvu pe ndün bin.

⁸A-le jon tsenyü Samuel khwebin, Samuel le tsü hontse a-kazokeshü genyu, ai tsü keti-e Samuel le Gilgal ki ryümvu. Temi dan le Saul kheo tin sola,

⁹tsügenyu a-le anyugun ka zoshü, “Rope kerüshvu lo kepvüshe kerüshvu senryü atsülo.” Tson-o a-le rope kerüshvu thyüshü,

¹⁰lo a-le thyü pen gü kejü ka Samuel le ryü. Saul le chwi gü a-teno-o a-kelushü,

¹¹ai Samuel le zoshü, “Nle nyuthyüla sela?” Saul le zoshü, “Nle ryüti tse keshü ka ryümvu lo temi le akhebu gü jüla; tsünyeki Filistian nyu le Michmash ka kequen binla.

¹²Tsügenyu, `A kerüchün le Filistian nyu le hika Gilgal ka a whe ryü jü lo ale Npugü kenyü kon thyü kelo nda shwimvu, tsügenyu akerüchün le ale kerüshvu hoshü mvuloshvu tse lale.”

¹³Samuel le zoshü, “Tsüle kephokela tho thyü laso. Nle Npugü nSunggigü le johokeshü zenmvu laso. Nle a-jozen yatselo a-le nle lo n tsipwen no kethonthen Israel nyu sa gon nrün.

¹⁴Ai ntsoka we nno keda thyüzin bin loho so. Nle a-jozen mvu kela genyu Npugü le temi a-le lonyü kebin temi fü pe no a-temi sa keda thyüti.”

¹⁵Tson shüo Samuel le Gilgal kheo tinla. Temi tsüka kebin dan le SAul then-o a-shüpahü dan ki güla. Anyugun le Gilgal nyu bin-o Benjamin lojvü Gibeah ki gü. Saul le a-rihü tsi tsero khole kebin dan shwishü.

¹⁶Saul, a-nyugü Jonathan lo au temi dan le Benjamin lojvü Geba ka kensenbin thyülo; Filistian nyu le Michmash ka nsenbin.

¹⁷Filistian shüpahü le anyugun kensenbin nyu danshen thyüo anyugun hun chwiryü; dan me le Shual lojvü kipon Ophrah denzin,

¹⁸kecha gü le Beth Horon denzin gü lo kecha gü le Zeboim ketejon tehenyhunkemvu kepen kipon terhi ki gü.

¹⁹Tsügwenkho ka Israel nyu dan nyu tegi kecha nyu nme ndi, Filistian nyu le Ibrinyu no zhe mi thyü loho tse rhilo kela genyu.

²⁰Israel nyu le Filistian nyu ki gü dyü, kathi, nri lo jonkhi yi thyülo lo tse kehü genyu;

²¹nri yi kethyü lo methutse kehü vü chani kethyü le pisa nme lo methudyü, lo kathi yi kethyü le pisa kenyhun thyü hü.

²²Tsügenyu teri kethyü jon nyü tsü Saul lo a-nyugü Jonathan au nyeki Israel nyu shüpahü nme zhethon nmvue mi senmvu.

²³Filistian nyu le shüpahü dan me nipe Michmash ka pfükethü tson khwen lola.