Read Southern Rengma Naga 1 SAMUEL 15 Bible Online

1 SAMUEL 15 - Southern Rengma Naga bible

1 SAMUEL 15

¹Samuel le Saul ka zoshü, “Npugü le nishüo terzü no n yün pe Israel nyu raja thyü keshü gü tsüle ale. Ntsoka Kekvutsin Npugü le zokebin nyülo.

²Israel nyu le Ijipt nyu chwiryü kejü ka anyugun bon nyu le Israel nyu ntsun kethyü genyu a-le shaja pe Amelek nyu tsüti.

³Gü Amelek nyu wheo anyugun le kebin aphu nke lalo. Thame-e khenya; pechenyu, tenunyu, ntsenyu lo nyuhanyu; methu, tanyü, ut, lo gada aphu dushvu la.”

⁴Tsontsin Saul le a-rihüdan ko kequen lo-o Telem ka anyugun nrishü: Israel nyu shüpahü le lak kenyhun lo Juda temi yie tseryü.

⁵Tson-o a-le a-temi dan zen Amelek nyida gü ki gü züri zhe kesin nme ka khwebin.

⁶A-le me nipe Israel nyu le Ijipt nyu chwiryü kejü ka anyugun bon nyu le Israel nyu njün keshü Kenitnyu kishüo: “Ano Amelek nyu kesin hagun dushvula mvu nrün genyu anyugun kheo tinla lo.” Tson-o Kenitnyu le tinla.

⁷Saul le Ijipt nphozin Havilah ka gü Shur keti tson then Amelek nyu zen kegao anyugun sa kvula;

⁸a-le temi aphu dushvu lao Amelek raja gü Agag tenlo.

⁹Ai Saul lo a-temi dan le Agag keyhun nrhoshü lo tanyü, methu,methunyu, lo tanyünyu nmvue kecha lihi-e kegwatsin dan tsü dushvu mvula; anyugun le lonyü kemvu nmvue a-min kendi dan nti nke gwenzin la.

¹⁰Npugü le Samuel ka zoshü,

¹¹“Ale Saul pe raja thyükela genyu rünyu mvu laso; a-le akipon rani tinla lo a johokeshü zen mvu laso.” Samuel le a-nyuntao khensin Npugü ka shwikenjün hi.

¹²Lonyü nshwe a-le Saul fü gü. Lo a-le nyükelo le Saul le Karmel rünyi ki gü a-zan ka tsokhwe nme khwe shüo Gilgal ki güla sele tse shalo.

¹³Samuel le Saul ki gü laryü, Saul le a-keluo, “Npugü nojochü pe ntsülo, Samuel! Ale Npugü johokeshü thyüshü laso.”

¹⁴Samuel le ketsoshü, “Tsonlo nyutse thyü methu lo tanyü kekhun khwe nyülo bin nla?”

¹⁵Saul le zoshü, “Atemi dan le Aamelek nyu hon khilo le. Anyugun le tanyü lo methu kegwatsin dan nsen pe Npugü n Sunggigü r"shvu titse bin njü lo a-sen nke shü la sele.”

¹⁶Samuel le ahza hoshü, “Sunlo,” “Npugü le nje aka nyuzo shüyo ale nka zoshü ti.” Saul le, “Aka zoshülo,” tseshü.

¹⁷Samuel le zoshü, “Nle nrüchün pe lihikemvu thyü bin-e nle Israel nyu tsipwen dan sharhi gü. Npugü le n yün pe nno Israel nyu raja thyüshü,

¹⁸lo a-le nno Amelek nyu temi serikemvu dan nke lalo tse ahza pe ntsüo n nishü. Nno anyugun aphu dushvula kemvuthen kega lotse shü.

¹⁹Tsonlo nle nyuthyüo a-jozen mvula? Nle nyuthyüo mehon nke kelo dan khilo-o Npugü kenyükemvu thyü hü nla?”

²⁰Saul le a-jokenishü, “Ale Npugü jozen le.” “A-le aka zo keshü hontse ale Amelek nyu aphu dushvula lo Raja gü Agag zen ryü bin nle.

²¹Ai atemi dan le tanyü lo methu tse kegwatsin dan dushvu kela gü mvule pe Gilgal ka kerüshvu thyü pe Npugü Sunggigü tsü titse senryü bin nle.”

²²Samuel le zoshü, “Jokezen lo tha hope kerüshvu digü Npugü le a-kenyü kvu tila? Tanyü kegwatsin pe kerüshvu nyeki a-jokezen gü le gwakvu.

²³A-jo zen kemvu le gwamvu pe temvü kethyü hontse lo nyunkerü le mu pe teromen kerüshvu hontse. Nle Npugü johokeshü kenikela genyu Npugü le nno raja thyümvu tse nkhe laso.”

²⁴Tsontsin Saul le a-jokenishü, “Ele, ale mu laso.” “Ale Npugü johokeshü lo nsenkethyü zenmvu laso. Ale atemi dan nshvu lao anyugun kenyü gü thyü lale.

²⁵Ai ale ntsoka nka hi bin nle, akemu jüshüo ano Npugü rüshvu nrün genyu azen ni gülo.”

²⁶Samuel le zoshü, “Ale nzen loho.” “Nle Npugü johokeshü kenikela genyu Npugü le nno Israel nyu raja thyü loho tse nkhe laso.”

²⁷Tson-o Samuel le tinla titse ranishü, ai Saul le a-phi sülo laryü sürhen la.

²⁸Samuel le a-ka zoshü, “Npugü le nthu nben nyu Israel nyu rajaphen sürhen sen gü temi n nyeki kegwa nyu peha tsü laso.

²⁹Israel Raja Sunggigü le nku nmvue anyun kelu hümvu. A-le temi nme kemvu- a-le anyun kelu hümvu.”

³⁰Saul le a-jokenishü, “Ale mu laso.” “Tson ai atemi sharhi ju lo Israel nyu aphu mhundyü nyu arühvu shüta. Ano Npugü n Sunggigü rüshvu nrün genyu azen güta.”

³¹Tson-o Samuel le a-zen rani güo Saul le Npugü rüshvu.

³²“Raja Agag zenryü hika atsü shülo,” tse Samuel le ahza hoshü. Agag le a-npvü a-rüchün pe nshvu ndün-o, “Si titse kethyü hile kenjün kethyü dihontse nme sela!” tse a-kiryü.

³³Samuel le zoshü, “Nzhethon genyu tenunyu kechon no nyu kendinyu thyükela hontse, ntsoka njvü no nyu kendi nme thyü lati.” Tsonshüo a-le Gilgal kershvubin mhundyü ka Agag duthürü la.

³⁴Tson-o Samuel le Ramah ki güla lo Saul raja le Gibeah nyu a-ka ki gunla.

³⁵Samuel le a-rhün ka raja gü teno nimvu la; ai a-rüchün rünyu mvu hü. Npugü le Saul pe Israel nyu raja thyü kela genyu rünyu mvula.