Read Southern Rengma Naga 1 SAMUEL 17 Bible Online

1 SAMUEL 17 - Southern Rengma Naga bible

1 SAMUEL 17

¹Filistian nyu le terithyü titse ryü Juda kazü rünyi nme Socoh ka kequen lola; anyugun le Ephes Dammim, tse ko kehü Socoh lo Azekah au jaka nsenlo.

²Saul lo Israel nyu dan le Elah ketejon ka kehun-o nsenlo, tsüka anyugun le Filistian nyu zen kega titse ndalo.

³Filistian nyu le rincho nme ge lo Israel nyu le rincho kecha nme ge donlo lo anyugun jaka ketejon nme le bin.

⁴Tsüka a-zan le Goliath tse kethyü Gath nyida nyu temi nme le Filistian nyu kensenbin nyu chwiryü Israel nyu khen sola. A-kethon le meter kenshen pen kesa

⁵a-le lazo pe kecha terikanyü a-kensu le kilogram henpvün-o tsenyü kho pfü lo lazo pe kecha perün pfühü.

⁶A-le lazo pe kecha pha kesun lo bu kerün pfühü.

⁷A-züle gon pe dyükeda nyu dyübu hontse lo tegi pe kecha a-min pwe kensu le kilogram tsenyü kho. Shüpahü nyu nme le a-mhundyü ka a-gida pen hü.

⁸Goliath le so-o nra Israel nyu ka, “Hagun le tsüka nyuthyü bin nla, terithyü titse don bin nle? Ale Filistian nyu, hagun Saul do dan! Hagun temi nme kejü pe azen kenren lo.

⁹A-le kvulo-o adushvu laya tselo agun le hagun do thyüti, ai ale kvulo-o a-dushvu la yatselo hagun le agun do thyüti.

¹⁰Ntsoka hika ale Israel nyu rihü dan khen bin nle. Ale hagun temi peha no azen kenrenlo tse bin nyo!”

¹¹Saul lo a-temi dan le johi nyülo-o nshvu sala.

¹²David le Efraim temi Juda kazü Bethlehem nyu Jesse nyugü. Jesse le anyu peche min tetse lebin, lo Saul le raja thyü kebin gwenkho hile a-le thensa laso.

¹³A-nyuri mishen jule Saul zen-o teri nyu güla. Püshütsin gü le Eliab, tsüsika le Abinadab lo kenshen güle Shammah.

¹⁴David le nchetsin gü lo a-tsanyu püshütsin mishen le Saul zen hü;

¹⁵khika ka David le Bethlehem ki nigü a-pvü tanyü khwe hü.

¹⁶Goliath le lonyü lo ngwengü jon henzi Israel nyu khen.

¹⁷Khenyüme Jesse le David ka zoshü, “Shyekeshvu kilogram tseryü lo tensü tse hi khilo-o sen whü gü kensenbin ki ntsanyu ju tsüshü lo.

¹⁸Lo chees khin tseryü hi sen gü yie sokeda gü tsü shülo. Ntsanyu jule dihontse bin yo shashü lo anyugun le gwa bin nle tse kethyü zansü tha peha sen niryü lo.

¹⁹Saul raja, ntsanyu ju, lo Israel nyu kecha aphu Elah ketejon ki Filistian nyu zen kega bin nyo.”

²⁰David le lonyü nshwe so-o tanyü dan pe kechanyu tenyen lao Jesse le a-ka zokeshü hontse ketyüketsü khi sen gü. A-le Israel nyu le terikhwe thyü teribin nyu gü kejü ka kensenbin tilo.

²¹Filistian nyu lo Israel nyu rihü dan le terithyü titse gwen ndo lo-o kentsun bin.

²²David le ketyüketsü tsü pe ketyüketsü ketsen kehü kedagü ben ka shü lao tin teribin kigü a-tsanyu jule dihontse bin nyo ketsoshü.

²³A-le anyugun zen kenthon kebin ka Goliath le chwiryü himhundyü hontse Israel nyu khen shü. Lo David le a-khwenyü lo.

²⁴Israel nyu le Goliath hyushü ntsin nshvuo tesen tinla.

²⁵Anyugun le khinyu nyu ka, “Ashwishü ta! A-le khen kebin nyüshü! Raja Saul le segü le temi tsügü dushvu loyo; a-chün kechon pe tsüti; raja gü le a-nyugi ko no a-ka kalu ti, lo a-pvü kami no khajana shü loho tse zoshwi shü bin nle.”

²⁶David le a-khoka kebin nyuketsoshü, “Filistian nyu higü dushvu lao keja kepfü hinyu Israel nyu no chwikelo gü le nyu hyulo tile tse? Rhünkehü Sunggigü rihü dan nshwe kebin Juda kemvunyu higü le segü ola?”

²⁷Anyugun le Goliath dushvu kelo gü ge nyu thyüshü tiyo pe a-ka zoshü.

²⁸David a-tsa püshütsin gü Eliab le a-le temi dan zen kenthon kebin nyülo. A-le David ge anyuntao zoshü, “Nle hika nyu thyü bin la? Segü le tsüki tehen ka ntanyü dan khwe bin nla? Nkelikelu! Nle teri kega shwi titse ryü kebin hile!”

²⁹David le ketsoshü, “Ale nyuthyü shüo?” “Ale thame ketsolo nrün ndi le?”

³⁰Tson-o a-le rani gü kechanyu nme kako tsü hontse ketsoshü, lo a-le ketso keshünyu aphu kemetse a-jokenishü.

³¹Peha le David jo nyülo-o Saul ka zoshü, tsüselo Saul le me nipe a-koshü.

³²David le Saul ka zoshü, “Raja gü, temi nme-e no Filistian nyu higü nshvulo nrün ndi. Ale gü a-zen kenren tile.”

³³Saul le a-jokenishü, “Nmvu.” “Nle dihontse a-zen kenren lomon? Nle ntsenyu nme, lo a-le a-yhunthen shüpahü thyü soryü laso!”

³⁴David le zoshü, “Raja gü, ale apvü tanyü khwe hü. Lo lihi gwenkho ka-e shünyho nmvue thyügwen nme le tanyü nyu nme ten sen tin lalo,

³⁵ale a-sithen gü wheo tanyü nyugü kenishü hü nle. Tson-o shünyho nmvue thyügwen güle rani awhe ryü lo ale a-gunda teche lo-o vüshvula hü nyo.

³⁶Ale shünyho lo thyügwen dan boshvula kehü hontse rhünkehü Sunggigü rihü dan nshwe kebin Juda kemvu Filistian nyu higü ge thyü shüti.

³⁷Npugü le shünyho lo thyügwen mün nyu akenishü; a-le tsühontse Filistian nyu higü ben nyu akenishü ti.” Saul le zoshü, “Gwasa.” “Gülo, Npugü le nzen hüti.”

³⁸A-le David no a-terikanyü senlo tse pe n pfü shü; lazo perün pe David pe rünshü, lo teri mirün pe n pfü shü.

³⁹David le Saul zhethon pe tsüsa phinlo, tson-o tsonchü nda nron, ai a-le tsü sen hü kemvu genyu senlo mvula. A-le Saul ka zoshü, “Ale hi aphu pfüo kega lo kemvui le, ale sen kenyemvu laryü.” Tson-o a-le tsü khila.

⁴⁰A-le a-tanyü kekhwe thün senlo lo rinyu gü nyu tsoketepen pvün pe a-jola ka shülo. Lo a-tso kezevü nda lo-o Goliath teno gü.

⁴¹Filistian nyu güle a-gida kepen gü no a-mhundyü ri tseo David danzin ryü. A-le khonni ryüo,

⁴²David nri kegwa thyü shü, tson-o a-le ntsenyu, zegwasa tse kethyü zun genyu shwipe a-nyunta sala.

⁴³A-le David ka zoshü, “Thün tsüpe nyuthyü titseo? Ale tehi nme letse nle rüchün bin nle?” Tson-o a-le a-tero gü ko-o shochün pe David ge shü.

⁴⁴A-le David khen-o, “Ryülo, ale nmi pe tegü lo thyü dan chvü thyüshü tile.”

⁴⁵David le zoshü, “Nle zhethon, mi lo gvürhün sen akiryü zhü, ai a we nle nshwe kehü Kekvutsin Npugü, Israel nyu rihü dan Sunggigü zan nyu n ntsun ryüzhü nyo.

⁴⁶Nthu Npugü le nkhipe aben nyu shü lati; ale n sokvu lao npe thülo lati. Lo ale Filistian nyu shüpahü dan min pe tegü lo thyü dan chvü thyü lati. Tson-o kazü aphu no Israel nyu Sunggigü le kebin sha loti,

⁴⁷lo hika kebin nyu aphu no Npugü le a-temi kenishü nrün genyu zhethon nmvue mi sen mvue gwa tse sha loti. A-le terikekvu gü lo a-le hagun aphu pe agun ben nyushü lati.”

⁴⁸Goliath le David kiryü, lo David le a-zen kega titse tin-o Filistian nyu teribin kho nni gü.

⁴⁹A-le a-ben pe a-jola nyu tson nme khilo-o tsü keze pe Goliath jon. Tsüle a-senpfü jon-o a-pekhunru jonren la, lo Goliath le teso tsügü kazünyu shwela.

⁵⁰Tson-o zhethon sen mvutse David le tso kezevü lo tso nme sen Goliath nyekvu la, lo boshvula!

⁵¹A-le tin gü a-ge kü-o solo-o Goliath zhethon sütho pe a-pe thü lola. Filistian nyu le anyugun kekvu gü le sikela hyu shüo kehü tinla.

⁵²Israel lo Juda temi dan le nra sen-o anyugun hügü Ekron khinrun ti. Filistian nyu jün kelo nyule Shaaraim tson nyu che gü Gath lo Ekron ti.

⁵³Israel nyu le Filistian nyu hü tseo rani ryü anyugun kensenbin nyu kanyü dan jünlo.

⁵⁴David le Goliath pe khilo-o sen Jerusalem nyu ryü; ai a-le Goliath terikanyü pe a-phi kanyu bin la.

⁵⁵David le Goliath zen kega gü kejü Saul le hyu shüo, a-rihü dan sokedagü Abner ka, “Abner, a-le segü nyula?” tse ketso. Abner le zoshü, “Raja gü ale shamvu le.”

⁵⁶Saul le ahza hoshü, “Tsonlo gü segü nyuyo sha lolo.”

⁵⁷Tson-o David le Goliath boshvu lao kensenbin nyu raniryü laryü, Abner le a-zen Saul kigü. David le Goliath pe sen hüzun.

⁵⁸Saul le a-ketsoshü, “Selo gü, nle segü nyu la?” David le zoshü, “Ale Bethlehem ki ngo gü Jesse nyu le.”